Тартиби муайян намудани андозаи таъмини молиявии масъулияти шаҳрвандӣ барои зарари дар натиҷаи садамаи иншоотҳои гидротехникӣ расонидашуда

1. Тартиби мазкур дар асоси моддаи 16 Қонуни Ҷумҳурии Тоҷикистон "Дар бораи бехатарии иншоотҳои гидротехникӣ" ҷиҳати муайян намудани андозаи таъмини молиявии масъулияти шаҳрвандӣ барои зарари дар натиҷаи садамаи иншоотҳои гидротехникӣ расонидашуда (минбаъд - таъмини молиявии масъулият) таҳия карда шудааст.

2. Таъмини масъулияти молиявӣ аз ҳисоби маблағҳои моликони иншоотҳои гидротехникӣ ва ё истифодабарандагони онҳо шахсони воқеӣ ва ҳуқуқӣ анҷом дода мешавад.

3. Андозаи таъмини масъулияти молиявӣ бо дарназардошти баҳододашудаи зарари ҳадди аксар, ки мумкин аст ба ҳаёт ва саломатии шахсони воқеӣ, амволи шахсони воқеӣ ва ҳуқуқӣ дар натиҷаи садамаи иншооти гидротехникӣ (минбаъд - зарари имконпазир) расонида шавад, муайян карда мешавад.

4. Ҳисобкунии зарари имконпазир аз ҷониби молики иншооти гидротехникӣ дар мувофиқа бо мақомоти иҷроияи маҳаллии ҳокимияти давлатӣ, ки дар марзи он метавонад зарар расонида шавад, бо тартиби муайяннамудаи мақомоти мазкур мутобиқи ваколатҳои он гузаронида мешавад.

5. Андозаи таъмини масъулияти молиявӣ аз ҷониби мақоми ваколатдори давлатӣ дар соҳаи бехатарии иншоотҳои гидротехникӣ (минбаъд - мақоми ваколатдори давлатӣ) дар асоси маълумоти зерини аз ҷониби молики иншооти гидротехникӣ пешниҳодгардида муайян карда мешавад;

- ҳисоби зарари имконпазир, ки мутобиқи методика ва қоидаҳои тасдиқшудаи муайянкунии андозаи зарари ба ҳаёт ва саломатии шахсони воқеӣ, амволи шахсони воқеӣ ва ҳуқуқӣ дар натиҷаи садамаи иншооти гидротехникӣ расонидашаванда ва Тартиби мазкур иҷро карда мешавад;

- ҳуҷҷатҳои зарурӣ барои асосноккунии андозаи таъмини масъулияти молиявӣ (бо салоҳдиди молики иншооти гидротехникӣ).

6. Молики иншооти гидротехники ба мақоми ваколатдори давлати тибқи банди 5 Тартиби мазкур ҳуҷҷатҳоро якҷоя бо эъломияи бехатарии иншооти гидротехникӣ пешниҳод менамояд. Дар сурати набудани чунин эъломия, сенарияи асосноккардашудаи садамаи иншооти гидротехникие, ки дар натиҷаи он метавонад зарари имконпазир расонида шавад, дар мӯҳлати мувофиқашуда ба мақоми ваколатдори давлатӣ пешниҳод менамояд.

7. Мақоми ваколатдори давлатӣ дар мӯҳлати 3 моҳ аз рӯзи ворид гардидани ҳуҷҷатҳои дар банди 5 Тартиби мазкур зикргардида, андозаи таъмини масъулияти молиявиро ба мӯҳлати на зиёда аз 5 сол муайян мекунад ё оид ба рад намудани муайян кардани ин андоза ба молики иышооти гидротехникӣ мактуби асоснок мефиристад.

8. Мақоми ваколатдори давлатй ҳангоми муайян намудани андозаи таъмини масъулияти молиявӣ асоснокии ҳисобу китоб, мутобиқати он ба методика ва қоидаҳои тасдиқшудаи муайянкунии андозаи зараре, ки метавонад ба ҳаёт ва саломатии шахсони воқей, молу мулки шахсони воқеӣ ва хуқуқӣ дар натиҷаи садамаи иншооти гидротехникӣ расонида шавад, инчунин мавҷуд будани мувофиқакунонии лозима ва ба талаботи қонунгузории Ҷумҳурии Тоҷикистон ва Тартиби мазкур мутобиқат будани ҳуҷҷатҳои пешниҳодшударо тафтиш мекунад.

9. Андозаи таъмини масъулияти молиявӣ то ба охир расидани мӯҳлати муайяншуда мумкин аст аз ҷониби мақоми ваколатдори давлатӣ дар асоси ҳуҷҷатҳои асосноки пешниҳоднамудаи молики иншооти гидротехникӣ тағйир дода шавад.

10. Андозаи таъмини масъулияти молиявй ҳамасола бо дарназардошти сатҳи таваррум бояд индексатсия шавад. Индексатсия аз ҷониби молики иншооти гидротехникӣ вобаста ба нархи истеъмолии соли пешин гузаронида мешавад.

11. Назорати мутобиқати ҳолати иншооти гидротехникиро ба нишондодҳои ҳисобшуда, ки дар асоси андозаи таъмини масъулияти молиявй муайян шудааст, мақоми ваколатдори давлатӣ дар соҳаи бехатарии иншоотҳои гидротехникй дар доираи ваколатҳои худ дар якҷоягӣ бо мақомоти дигари дахлдор мегузаронад.