Тартиби гузаронидани тирпарронии санҷишӣ аз силоҳи оташфишони милаш рахпеч, ки бо мақсади коллексиякунӣ ва банамоишгузорӣ барои ташаккули махзани давлатии тиру гилзаҳо ҷамъоварӣ карда мешавад

1. Муқаррароти умумӣ

1. Тартиби гузаронидани тирпарронии санҷишӣ аз силоҳи оташфишони милаш рахпеч, ки бо мақсади коллексиякунӣ ва банамоишгузорӣ барои ташаккули махзани давлатии тиру гилзаҳо ҷамъоварӣ карда мешавад (минбаъд - Тартиб), аз ҷумла ташаккули махзани давлатии тиру гилзаҳо, объектҳои коллексиякунӣ ва банамоишгузории тиру гилзаҳо, талабот нисбати пешниҳод намудани тиру гилзаҳо барои коллексиякунӣ ва банамоишгузорӣ, нигоҳдорӣ ва мусодираи тиру гилзаҳои барои коллексиякунӣ ва банамоишгузорӣ пешбинишударо,ба танзим медарорад.

2. Ташаккули махзани давлатии тиру гилзаҳо

2. Махзани давлатии тиру гилзаҳо дар асоси коллексия ва банамоишгузории тир ва гилзаҳое, ки аз силоҳи оташфишони ҷангӣ, хизматӣ ва ғайринизомии милаш рахпеч парронда шудаанд, ташкил карда мешавад.

3. Тирпарронии санҷишӣ аз силоҳи оташфишони ҷангӣ, хизматӣ ва ғайринизомии милаш рахпеч, ки дар ҳудуди Ҷумҳурии Тоҷикистон дар гардиш мебошанд, бо мақсади сари вақт ба қайд гузоштани силоҳ дар махзани давлатии тиру гилзаҳои бахшҳои ташхисию (экспертию) криминалистии Вазорати корҳои дохилии Ҷумҳурии Тоҷикистон, дар ҳолати гум шудан, дуздида шудан ва пайдо намудани силоҳ, инчунин барои ошкор кардани ҷиноятҳо, ки бо истифода аз чунин силоҳ содир шудаанд, гузаронида мешавад.

4. Коллексиякунӣ ва банамоишгузории тир ва гилзаҳои силоҳи оташфишони хизматӣ ва ғайринизомии милаш рахпеч баъди тирпарронии санҷишӣ ҳамчун намунаи муқоисавӣ дар махзани давлатии тиру гилзаҳои бахшҳои ташхисию (экспертию) криминалистии Вазорати корҳои дохилии Ҷумҳурии Тоҷикистон нигоҳ дошта мешаванд.

5. Коллексиякунӣ ва банамоишгузории тир ва гилзаҳои силоҳи оташфишони ҷангии милаш рахпече, ки дар ихтиёри ташкилотҳои давлатии ҳарбикунонидашуда мебошанд, баъди тирпарронии санҷишӣ дар ҷузъу томҳои онҳо оид ба нигоҳдории аслиҳаи ташкилотҳои давлатии ҳарбикунонидашуда нигоҳ дошта мешаванд.

3. Объектҳои коллексиякунӣ ва банамоишгузории тиру гилзаҳо

6. Объектҳои коллексиякунӣ ва банамоишгузорӣ ин тир ва гилзаҳои санҷишии аз силоҳи оташфишони ҷангӣ, хизматӣ ва ғайринизомии милаш рахпеч паррондашуда мебошанд.

7. Дар коллексия ва банамоишгузорӣ ҷойгир карда намешаванд:

- силоҳи оташфишони милаш рахпечи калибраш беш аз 12,7 мм;

- силоҳи оташфишоне, ки қисмҳои он дар ҳолати сахти зангзанӣ қарор доранд ва ин ҳолат метавонад барои гирифтани изҳои босифати озмоишии тир ва гилзаҳо монеа шавад;

- силоҳи суфтамили шикорӣ;

- силоҳи газӣ ва пневматикӣ.

8. Ҷудо намудани лавозимоти ҷангӣ ва интиқоли силоҳи оташфишон ба ҷойҳои тирпарронии санҷишӣ, аз ҷониби кормандони ҷузъу томҳо оид ба нигоҳдории аслиҳаи ташкилотҳои давлатии ҳарбикунонидашуда, инчунин шахсони воқеӣ ва ҳуқуқие, ки барои нигоҳдорӣ ва истифодаи силоҳи оташфишони милаш рахпеч масъул мебошанд, амалӣ карда мешавад.

9. Тирпарронии санҷишӣ аз силоҳ дар машқгоҳи тирандозӣ ё дар ҷойҳои махсуси барои ин мақсад бо воситаи тиругилзагирӣ таҷҳизонидашуда, ки ба даст овардани изҳои босифати озмоиширо таъмин менамоянд, анҷом дода мешавад.

10. Ҳангоми тирпарронӣ аз силоҳ бояд комилан имконияти ивазшавии тир ва гилзаҳои санҷишӣ бо тир ва гилзаҳое, ки аз дигар намудҳои силоҳ парронда шудаанд, роҳ дода нашавад.

11. Пеш аз тирпарронӣ силоҳ ва кисмҳои асосии он пурра аз равғанҳои молидании саноатӣ ва моддаҳои ғайр тоза карда мешавад.

4. Талаботе, ки нисбати тиру гилзаҳои барои коллексиякунӣ ва банамоишгузории тиру гилзаҳо пешбинишуда гузошта мешаванд

12. Дар ҳолати гум шудан ё дуздида шудани силоҳи оташфишони милаш рахпеч шахсе, ки барои коллексиякунӣ ва банамоишгузории тиру гилзаҳо масъул мебошад, фавран махзани давлатии тиру гилзаҳои бахши ташхисию криминалистии Вазорати корҳои дохилии Ҷумҳурии Тоҷикистонро огоҳ намуда, фиристодани тир ва гилзаҳои санҷишии ин силоҳро ташкил менамояд.

13. Коллексияи тир ва гилзаҳои санҷишӣ бояд бо системаҳои автоматикунонидашудаи иттилоотию кофтуковии объектҳои баллистикӣ муҷҷаҳаз гардонида шаванд.

14. Системаҳои автоматикунонидашудаи иттилоотию кофтуковӣ бояд ба талаботи махзани давлатии тиру гилзаҳои Вазорати корҳои дохилии Ҷумҳурии Тоҷикистон ҷавобгӯ бошанд.

15. Ҳангоми дархости хаттӣ аз ҷониби махзани давлатии тиру гилзаҳои бахши ташхисию криминалистии Вазорати корҳои дохилӣ, тир ва гилзаҳои санҷишӣ, инчунин қайдҳои дар ҳомилҳои магнитии автоматикунонидашудаи иттилоотию кофтуковӣ воридгардида, дар муддати се рӯз ба тарафи дархосткунанда пешниҳод карда мешавад.

16. Тир ва гилзаҳои санҷишии барои коллексия ва банамоишгузорӣ пешбинишуда, дар китобҳои баҳисобгирии тир ва гилзаҳои санҷишӣ ба қайд гирифта мешаванд.

5. Нигоҳдорӣ ва мусодираи тиру гилзаҳое, ки барои коллексиякунӣ ва банамоишгузорӣ пешбинӣ гардидаанд

17. Ташкили нигоҳдории объектҳои коллексиякунӣ ва банамоишгузорӣ бояд ҳифз ва амнияти боэътимод, инчунин роҳ надодани воридшавии шахсони бегона ба онро таъмин намояд.

18. Барои иҷрои талаботи муқарраргардида оид ба нигоҳдории коллексия ва банамоишгузории тир ва гилзаҳо бояд ҳуҷраҳои хушки алоҳидаи муҷаҳҳаз бо миқдори кофии системаи равшанидиҳанда ва таҷҳизоти бехатарии зидди сӯхтор ҷудо карда шаванд.

19. Ҷойҳо барои нигоҳдории объектҳои коллексиякунӣ ва банамоишгузорӣ бояд бо системаҳои видеоӣ ва мушоҳидавӣ, сигнализатсия, инчунин дорои ду дар (дари берунӣ бо тунукаи оҳанин, дари дарунӣ бо панҷараи оҳанине, ки он бояд на камтар аз 15 мм бошад) ва тирезаҳо бо панҷараҳои оҳанин муҷҷаҳаз гардида бошанд.

20. Объектҳои коллексиякунӣ ва банамоишгузории тир ва гилзаҳо дар ҷевонҳои махсус, ки берун аз вақти корӣ маҳкам ва муҳргузорӣ карда мешаванд, нигоҳ дошта мешаванд.

21. Тир ва гилзаҳо дар ҳолатҳои зерин аз коллексия ва банамоишгузорӣ мусодира карда мешаванд:

- дар ҳолати иваз намудани тир ва гилзаҳо ҳангоми тирпарронии санҷишӣ (барои ташкилотҳои давлатии ҳарбикунонидашуда, корхонаҳо, муассисаҳо ва дигар ташкилот як маротиба дар 10 сол, барои шахсоне, ки силоҳи оташфишони милаш рахпеч доранд, як маротиба дар 3 сол);

- дар ҳолати нобуд сохтани силоҳ.