Низомномаи Шӯрои миллӣ оид ба ҳамоҳангсозӣ ва рушди соҳаи моликияти зеҳнӣ дар Ҷумҳурии Тоҷикистон

1. Муқаррароти умумӣ

1. Шӯрои миллӣ оид ба ҳамоҳангсозӣ ва рушди соҳаи моликияти зеҳнӣ дар Ҷумҳурии Тоҷикистон (минбаъд - Шӯро) мақоме мебошад, ки ҳамоҳангсозии фаъолияти вазорату идораҳо, мақомоти маҳаллии ҳокимияти давлатӣ ва дигар ташкилоту муассисаҳоро бо мақсади татбиқи сиёсати ягонаи давлатӣ дар соҳаи моликияти зеҳнӣ амалӣ менамояд.

2. Шӯро дар фаъолияти худ Конститутсияи Ҷумҳурии Тоҷикистон, санадҳои меъёрии ҳуқуқии Ҷумҳурии Тоҷикистон, санадҳои меъёрии ҳуқуқии байналмилалӣ дар соҳаи моликияти зеҳнӣ, ки Ҷумҳурии Тоҷикистон онҳоро эътироф намудааст ва Низомномаи мазкурро ба роҳбарӣ мегирад(қарори Ҳукумати ҶТ аз 26.06.2021 № 255).

2. Вазифаҳои асосии Шӯро

3. Вазифаҳои асосии Шӯро аз инҳо иборатанд:

- ҳамоҳангсозии фаъолияти вазорату идораҳо, мақомоти маҳаллии ҳокимияти давлатӣ ва ташкилоту муассисаҳо дар рушди соҳаи моликияти зеҳнӣ дар Ҷумҳурии Тоҷикистон;

- таҳлили фаъолияти вазорату идораҳо ва ташкилоту муассисаҳо оид ба татбиқи сиёсати ягонаи давлатӣ дар рушди соҳаи моликияти зеҳнӣ;

- шунидани ҳисобот вобаста ба фаъолияти мақоми иҷроияи вазорату идораҳо, мақомоти маҳаллии ҳокимияти давлатӣ ва дигар ташкилоту муассисаҳо оид ба масъалаҳои татбиқи сиёсат дар соҳаи моликияти зеҳнӣ;

- мониторинг ва баҳодиҳии натиҷаҳои бадастомада ва пешниҳоди ҳисоботи ҳарсола ба Ҳукумати Ҷумҳурии Тоҷикистон;

- таъсис додани гурӯҳҳои корӣ ва комиссияҳо ҷиҳати мониторинги вазъи соҳаи моликияти зеҳнӣ ва иҷрои қарорҳои Шӯро;

- муайянсозии самтҳои афзалиятноки рушд дар соҳаи моликняти зеҳнӣ;

- тасдиқи нақшаи кории ҳарсолаи Шӯро;

- ба Ҳукумати Ҷумҳурии Тоҷикистон манзур намудани пешниҳодҳо оид ба таъсис ва таҳкими мақомоту сохторҳое, ки дар рушди соҳаи моликияти зеҳнӣ ваколатдоранд;

- амалигардонии дигар вазифаҳо мутобиқи санадҳои меъёрии ҳуқуқии Ҷумҳурии Тоҷикистон.

3. Сохтори Шӯро

4. Ҳайати Шӯро аз ҷониби Ҳукумати Ҷумҳурии Тоҷикистон тасдиқ карда мешавад. Шӯро аз Раис, муовини ӯ, котиб ва дигар аъзонамояндагони вазорату идораҳои дахлдор, бахши хусусӣ ва ташкилотҳои ҷамъиятӣ иборат аст.

5. Раиси Шӯро:

- ҳамоҳангсозии фаъолияти Шӯроро амалӣ менамояд;

- маҷлисҳои Шӯроро даъват мекунад ва мегузаронад;

- нақшаҳои кории Шӯроро дар асоси нақшаҳои кории пешниҳоднамудаи вазорату идораҳо тасдиқ мекунад;

- протоколи маҷлисҳо ва дигар ҳуҷҷатҳоро барои иҷроиш имзо мекунад;

- вазифаҳои аъзои Шӯроро муайян мекунад;

- тибқи тартиби муқарраргардида аз мақомоти давлатӣ, дигар ташкилоту муассисаҳои вилоятӣ, шаҳрӣ ва ноҳиявӣ маълумот (мавод) оид ба масъалаҳое, ки ба ваколати Шӯро мансубанд, талаб мекунад;

- ҷиҳати иҷрои қарорҳои Шӯро ба вазорату идораҳои дахлдор, мақомоти маҳаллии ҳокимияти давлатӣ ва дигар ташкилоту муассисаҳо дастуру супоришҳо медиҳад;

- ҳисоботи аъзои Шӯро, намояндагони вазорату идораҳо, мақомоти маҳалии ҳокимияти давлатӣ ва ташкилоту муассисаҳоро мешунавад.

- дигар ваколатҳоеро, ки ба фаъолияти Шӯро дахл доранд, амалӣ менамояд.

6. Муовини Раиси Шӯро:

- вазифаҳои Раиси Шӯроро дар вақти набудани ӯ иҷро менамояд;

- дигар супоришҳои Раиси Шӯроро иҷро менамояд.

7. Котиби Шӯро:

- коргузории Шӯроро таъмин менамояд;

- муроҷиатҳо ва дигар ҳуҷҷатҳои ба Шӯро воридшударо таҳия ва ҷамъбаст намуда, ба Раиси Шӯро пешниҳод менамояд;

- якҷоя бо аъзои Шӯро ҳуҷҷатҳои заруриро оид ба масъалаҳои баррасишаванда таҳия намуда, лоиҳаи қарорҳоро аз рӯи онҳо ба Раис ва аъзои Шӯро пешниҳод менамояд;

- протоколи маҷлисҳо ва қарорҳои Шӯроро тартиб дода, ҷиҳати татбиқи он ба вазорату идораҳои дахлдор, мақомоти маҳаллии ҳокимияти давлатӣ ва ташкилоту муассисаҳо пешниҳод менамояд;

- супоришҳои Раиси Шӯро ва дигар вазифаҳоро вобаста ба фаъолияти Шӯро иҷро менамояд.

8. Аъзои Шӯро:

- дар маҷлисҳои Шӯро ширкат меварзанд;

- таклифҳои мушаххасро барои ворид намудан ба Нақшаи корӣ ва рӯзномаи маҷлисҳои Шӯро манзур менамоянд;

- мавод ва лоиҳаи қарорҳоро ба маҷлисҳои Шӯро омода менамоянд;

- дар бораи кори анҷомдодаи вазорату идора ё ташкилоту муассисае, ки онро намояндагӣ мекунанд, ҳисобот пешниҳод менамоянд;

- ахбори заруриро бо дархости Раиси Шӯро ё муовини ӯ пешниҳод мекунанд.

9. Мақоми иҷроия - Вазорати рушди иқтисод ва савдои Ҷумҳурии Тоҷикистон:

- фаъолияти иттилоотию таҳлилӣ ва ташкилию техникии фаъолияти Шӯроро амалӣ менамояд;

- лоиҳаҳои Нақшаи корӣ ва пешниҳодҳоро таҳия намуда, барои баррасии вазорату идораҳои дахлдор пешниҳод мекунад;

- ворид намудани пешниҳодҳои вазорату идораҳои дахлдорро ба нақшаи кории Шӯро таъмин месозад;

- пас аз таҳлили нақшаҳои корӣ ва ҳисоботҳои вазорату идораҳо, мақомоти маҳаллии ҳокимияти давлатӣ ва ташкилоту муассисаҳо, ба баррасии Шӯро пешниҳодҳои худро манзур менамояд;

- ҷараёни иҷрои нақшаҳо ва қарорҳои Шӯроро таҳлил ва назорат намуда, аз натиҷаҳои он ба Раиси Шӯро ахборот пешниҳод мекунад;

- дигар супоришҳои Раиси Шӯроро иҷро мекунад.

4. Ташкили фаъолияти Шӯро

10. Мақоми олии Шӯро маҷлиси Шӯро мебошад, ки ҳар сол на камтар аз ду маротиба гузаронида мешавад.

11. Қарору тавсияҳои Шӯро тавассути қарору фармоишҳо, фармону дастурҳои дахлдори вазорату идораҳо, мақомоти маҳаллии ҳокимияти давлатӣ ва ташкилоту муассисаҳо иҷро карда мешаванд.

12. Маҷлисҳои ғайринавбатии Шӯро дар асоси супориши Ҳукумати Ҷумҳурии Тоҷикистон ё бо ташаббуси Раиси Шӯро ва ё бо пешниҳода аксари аъзои Шӯро гузаронида мешавад.

13. Рӯзномаи маҷлис ва маводи баррасишаванда ба аъзои Шӯро на дертар аз се рӯз пеш аз оғози маҷлис дастрас карда мешаванд.

14. Раисӣ дар маҷлисҳои Шӯро аз ҷониби Раиси Шӯро анҷом дода мешавад ва дар сурати ҳузур надоштани ӯ раисӣ аз ҷониби муовини Раиси Шӯро анҷом дода мешавад.

15. Маҷлиси Шӯро ҳамон вақт салоҳиятнок ҳисобида мешавад, ки дар он аз нисф зиёди аъзои он иштирок дошта бошанд.

16. Қарорҳои Шӯро бо тариқи овоздиҳии кушод бо аксарияти овозҳои аъзое, ки дар маҷлиси Шӯро иштирок мекунанд, қабул карда мешаванд. Ҳангоми баробар будани овозҳо овози Раис ҳалкунанда мебошад.

17. Вазорату идораҳо, мақомоти иҷроияи маҳаллии ҳокимияти давлатӣ ва ташкилотҳо оид ба иҷрои санадҳои меъёрии ҳуқуқӣ дар соҳаи моликияти зеҳнӣ нақшаҳои корӣ ва ҳисоботҳои худро барои ҷамъбаст ва баррасӣ дар ҷаласаҳои Шӯро ба котиби Шӯро ва мақоми иҷроияи Шӯро ба таври расмӣ пешниҳод менамоянд(қарори Ҳукумати ҶТ аз 26.06.2021 № 255).

18. Нақшаи кории Шӯро барои давраи муайян дар асоси нақшаҳои кории вазорату идораҳо, мақомоти маҳалли ҳокимияти давлатӣ ва ташкилоту муассисаҳо бо назардошти пешниҳоди Мақоми иҷроия баъд аз баррасӣ дар маҷлисҳои Шӯро қабул ва тасдиқ карда мешавад;

19. Қарори Шӯро бо протокол ба расмият дароварда шуда, аз ҷониби Раис ва Котиби Шӯро ба имзо расонида мешавад.

20. Нусхаи протокол ва иттилооти дигари марбут ба фаъолияти Шӯро дар муддати даҳ рӯзи баъди гузаронидани маҷлис ба маълумоти ҳамаи аъзои Шӯро ва дигар шахсон манфиатдор расонида мешавад.

21. Шӯро барои шунидани ҳисобот метавонад ба маҷлисҳои худ роҳбарони вазорату идораҳо, мақомоти маҳаллии ҳокимияти давлатӣ, ташкилоту муассисаҳо ва дигар шахсони мансабдорро даъват намояд.

22. Шӯро дар мавриди зарурӣ метавонад барои додани хулоса оид ба масъалаҳои дар маҷлисҳои худ баррасишаванда олимон, коршиносон ва мутахассисонро даъват намояд, вале шахсони мазкур дорои ҳуқуқи овоз намебошанд.

5. Ташкили фаъолияги Шӯро дар маҳалҳо

23. Шӯро оид ба ҳамоҳангсозӣ ва рушди соҳаи моликияти зеҳнии Вилояти Мухтори Куҳистони Бадахшон, вилоятҳо ва шаҳри Душанбе сохтори минтақавии Шӯрои миллӣ ба ҳисоб рафта, рушди соҳаи моликияти зеҳниро дар маҳалҳо таъмин менамоянд.

24. Вазорати фарҳанги Ҷумҳурии Тоҷикистон, Вазорати кишоварзии Ҷумҳурии Тоҷикистон, Вазорати корҳои дохилии Ҷумҳурии Тоҷикистон, Муассисаи давлатии "Маркази миллии патенту иттилоот"-и Вазорати рушди иқтисод ва савдои Ҷумҳурии Тоҷикистон ва сохторҳои вилоятии он ба Шӯроҳо оид ба ҳамоҳангсозӣ ва рушди соҳаи моликияти зеҳнии Вилояти Мухтори Куҳистони Бадахшон, вилоятҳо ва шаҳри Душанбе кӯмаки машваратӣ ва амалӣ мерасонанд.

25. Ҳайат ва низомномаҳои Шӯроҳои вилоятиву шаҳрӣ бо қарори дахлдори мақомоти маҳаллии ҳокимияти давлатӣ дар мувофиқа бо Шӯрои миллӣ тасдиқ карда мешаванд.

26. Маҷлисҳои Шӯроҳо дар Вилояти Мухтори Куҳистони Бадахшон, вилоятҳо ва шаҳри Душанбе на камтар аз як маротиба дар се моҳ гузаронида мешаванд.