Тартиби таҳия, тасдиқ, бақайдгирии давлатӣ, санҷиш, аз нав дида баромадан, тағйир додан, бекор кардан, истифода, чопи расмии регламентҳои техникӣ, аз ҷумла регламентҳои техникии марбут ба маҳсулоти мудофиавӣ, огоҳинома ва нашри иттилоъ дар бораи онҳо

1. Муқаррароти умумӣ

1. Тартиби мазкур қоидаҳои таҳия, тасдиқ ва бақайдгирии давлатии регламентҳои техникӣ за ҳамчунин қоидаҳои санҷиш, аз нав дида баромадан, тағйир додан, бекор кардан, истифода, чопи расмии регламентҳои техникӣ, аз ҷумла регламентҳои техникии марбут ба маҳсулоти мудофиавӣ, огоҳинома ва нашри иттилоъ дар бораи онҳоро муқаррар менамояд.

2. Таҳияи регламентҳои техникиро мақомоти иҷроияи ҳокимияти давлатӣ мутобиқи Барномаи таҳияи регламентҳои техникӣ (минбаъд - Барнома), ки аз тарафи Ҳукумати Ҷумҳурии Тоҷикистон тасдиқ шудааст, амалӣ менамоянд. Лоиҳаи Барнома аз тарафи мақоми ваколатдори давлатии масъули ташкили корҳои бамеъёрдарории техникӣ (минбаъд - мақоми ваколатдор) дар асоси пешниҳоди мақомоти иҷроияи ҳокимияти давлатӣ ва дигар субъектҳои манфиатдори бамеъёрдарории техникӣ таҳия мешавад.

3. Ҳангоми таҳияи регламентҳои техникӣ таъмин намудани шаффофияти раванди таҳия ва имконияти дар баррасии он иштирок намудани ҳамаи тарафҳои манфиатдор зарур аст.

4. Ҳангоми омода, қабул ва ё истифода намудани регламенти техникӣ, ки метавонад ба савдо таъсири назаррас расонад, мақоми ваколатдор бо дархости тарафҳои манфиатдор, аз ҷумла аъзои СУС, зарурати чунин регламенти техникиро аз нуқтаи назари муқаррароти зерин шарҳ медиҳад:

- регламенгҳои техникӣ бо чунин тарз омода, қабул ва истифода намешаванд, ки боиси фароҳам овардан ва ё эҷоди монеаҳои ғайризарурӣ дар савдои байналмилалӣ гарданд. Бо ин мақсад регламентҳои техникӣ ба савдо нисбат ба он, ки барои дастрас шудан ба ҳадафҳои қонунӣ зарур аст, бо баҳисобгирии хатарҳое, ки ҳангоми дастрас нашудан ба чунин мақсадҳо ба миён хоҳад омад, таъсири бештари маҳдудкунанда намерасонанд. Чунин ҳадафҳои қонунӣ аз ҷумла инҳо мебошанд: талаботи амнияти миллӣ; пешгирии таҷрибаи фиребанда; ҳифзи саломатӣ ва ё бехатарии одамон, ҳаёт ва сиҳатии ҳайвонот ва ё растаниҳо ва ё ҳифзи муҳити зист. Ҳангоми баҳодиҳии чунин хавфҳо чунин омилҳо, ба монанди иттилооти илмӣ ва техникӣ, технологияи мувофиқ ва ё истифодаи ниҳоии пешбинишудаи молҳо ҳисоб гирифта мешаванд;

- регламентҳои техникӣ набояд дар ҳукми қонунӣ боқӣ бимонанд, агар вазъият ва ё сабаби ба миён омадани қабули онҳо дигар вуҷуд надошта бошад ва ё агар вазъи тағйирёфта ва ё сабабҳо имконият медиҳанд, ки усулҳои камтар маҳдудкунандаи таъсиркунанда ба савдо истифода шаванд;

- дар ҳолате, ки агар талабот ба регламентҳои техникӣ ба миён ояд ва стандартҳои байналмилалии мувофиқ мавҷуд аст ва ё таҳияи онҳо ба анҷом расонида мешавад, онҳо ва ё бахшҳои муносиби онҳо ба сифати асос барои регламентҳои техникӣ истифода мешаванд, ба истиснои ҳолатҳе ки чунин стандартҳои байналмилалӣ ва ё бахшҳои муносиби онҳо барои ба даст овардани ҳадафҳои қонунии пешгузошта, масалан, дар натиҷаи омилҳои мавҷудаи иқлимӣ ва ё ҷуғрофӣ ва ё мушкилоти назарраси техникӣ бесамар ва ё воситаи ғайри қобили қабул мебошанд.

5. Дар ҳолатҳое, ки стандарти байналмилалии муносиб мавҷуд нест ва ё мазмуни техникии регламенти техникии таҳияшаванда ба мазмуни техникии стандартҳои байналмилалии муносиб мувофиқат намекунад ва агар, регламенти техникӣ ба савдо метавонад таъсири назаррас расонад, мақоми ваколатдор;

- дар марҳилаи аввали муносиб дар матбуот огоҳиномаро оид ба ворид кардани регламенти техникии пешбинишуда бо мақсади фароҳам овардани имконияти шиносшавӣ бо он ба ҷонибҳои манфиатдор ба чоп мерасонад;

- ба воситаи котиботи СУС тарафҳои манфиатдорро оид ба молҳое, ки регламенти таҳиякардашудаи техникӣ фаро мегирад, тариқи мухтасар дар огоҳинома нишон додани ҳадаф ва асосноккунии регламенти таҳиякардашудаи техникӣ хабардор мекунад. Чунин огоҳиномаҳо дар марҳилаи аввали муносиб чоп карда мешаванд, ки ҳанӯз метавонанд тағйирот ва тавзеҳоти ба назар гирифташуда ворид карда шаванд;

- бо дархост ба тарафҳои манфиатдор, аз ҷумла ба аъзои СУС, тавсифи муфассал ва ё матни регламенти таҳиякардашудаи техникиро пешниҳод мекунад ва аз рӯи имконият бахшҳоеро, ки аз стандартҳои байналмилалӣ ба таври назаррас фарқ мекунанд, нишон медиҳад;

- бе маҳдудкунии ҳуқуқ ба тарафҳои манфиатдор барои аз тарафи онҳо омода кардани мулоҳизаҳо дар шакли хаттӣ, муҳокимаи ин мулоҳизаҳо бо дархост ва баҳисобгирии ин мулоҳизаҳои хаттӣ ва инчунин натиҷаҳои ин мулоҳизаҳо марҳалаи оқилонаи вақтро пешниҳод мекунад.

6. Бо шарти риояи бахши муқаддимавии банди 5 муқаррарот, мақоми ваколатдор дар ҳолати ба миён омадан ва ё мавҷуд будани хатари ба миён омадани мушкилоти фаврии таъмини бехатарӣ, сиҳатӣ, ҳифзи муҳити зист ва амнияти миллӣ метавонад ба амалҳои дар банди 5 овардашуда рӯ наорад, ба шарте ки пас аз қабули регламенти техникӣ:

- ба воситаи котиботи СУС дарҳол тарафҳои манфитдорро оид ба регламенти мушаххаси техникӣ ва молҳое, ки ба он фаро гирифтааст хабардор месозад, бо дар огоҳинома нишон додани мазмуни мухтасари ҳадаф ва сабабҳои ворид кардани регламенти техникӣ, аз ҷумла бо баёни мазмуни мушкилоти фаврӣ;

- бо дархост ба тарафҳои манфиатдор матни регламенти техникиро пешниҳод менамояд;

- бе маҳдудкунии ҳуқуқ ба тарафҳои манфиатдор имконият фароҳам меоварад, ки онҳо мулоҳизаҳои худро бо таври хаттӣ пешниҳод намоянд, бо дархост ин мулоҳизаҳоро баррасӣ мекунад, ин мулоҳизаҳоро ба ҳисоб мегирад ва инчунин натиҷаҳои баррасии мазкурро ба назар мегирад.

7. Пешниҳод дар бораи таҳияи регламентҳои техникӣ, бояд дорои мақсадҳои асосноккардашудаи зарурияти таҳияи регламенти техникӣ, маълумот оид ба объекти бамеъёрдарории техникӣ, аз ҷумла тавсифи омилҳое, ки метавонанд хоси объекти бамеъёрдарории техникӣ бошанд ва инчунин талаботи алоқаманд бо таъмини ягонагии ченак, тасдиқи мутобиқат, пешгирии амалҳоеро, ки истеъмолкунандаро ба иштибоҳ меоранд, дар бар гирад. Пешниҳод бояд инчунин дорои маълумот дар бораи талаботе, ки аз талаботи стандартҳои байналмилалӣ ва байнидавлатии (минтақавӣ) дахлдор фарқият дорад, бошад.

8. Маълумот оид ба ҷараёни таҳия, аз ҷумла тасдиқ ва бақайдгирии давлатии регламентҳои техникӣ дар нашрияи расмии мақоми ваколатдор ба табъ расонида мешавад ва дар сомонаи расмии шабакаи Интернетии он ҷой дода мешавад. Ҳангоми ворид шудани маълумот нашри он дар нашрияи расмии моҳона, баъд аз моҳе, ки маълумот қабул шудааст, ба роҳ монда мешавад. Ҷой додани маълумот дар сомонаи расмии шабакаи Интернет дар мӯҳлати панҷ рӯзи тақвимӣ аз рӯзи қабули он амалӣ карда мешавад.

9. Огоҳиномаҳое, ки дар ҷараёни таҳияи регламенти техникӣ ворид шудаанд ва ҳамчунин ҳуҷҷатҳое, ки дар раванди таҳияи регламенти техникӣ омода шудаанд (лоиҳаи корӣ ва таҳрири ниҳоии регламенти техникӣ, тавзеҳот ба онҳо, маҷмӯи тақризҳо) ва ба мақоми ваколатдор дар шакли матнҳои файлӣ дар варақаҳо ё ба таври электронӣ пешниҳод шудаанд, бояд аз ҷониби роҳбари (муовинони роҳбар) мақомоти иҷроияи ҳокимияти давлатӣ, ки дар Барнома муқаррар шудааст, ба имзо расонида шаванд.

2. Мафҳумҳои асосӣ

10. Дар Тартиби мазкур мафҳумҳои зерин истифода мешаванд:

- тасдиқи регламенти техникӣ - бо қарори Ҳукумати Ҷумҳурии Тоҷикистон тасдиқ ва мавриди амал қарор додани регламенти техникӣ;

- бақайдгирии давлатии регламенти техникӣ - ба феҳристи давлатӣ ворид намудани регламенти техникии тасдиқкардашуда;

- истифодаи регламенти техникӣ - дар як шакл ва дар сатҳи баробар новобаста аз кишвар ё ҷойи истеҳсоли маҳсулот истифода кардани регламенти техникӣ;

- чопи расмии регламенти техникӣ - чопи регламенти техникӣ, ки таҳрири табъу нашрро дар бар мегирад;

- тағйир додани регламенти техники - қисман ислоҳ намудани мазмуни регламенти техникӣ (иваз, хориҷ намудан, илова намудани талабот, зиёд ё кам намудани мӯҳлати амал);

- бекор кардани регламенти техникй - катъ намудани амали регламенти техникӣ дар робита бо қабул намудани регламенти техникии нав;

- аз нав дида баромадани регламенти техникӣ - таҳияи регламенти техникии нав ба ивази регламенти амалкунанда;

- санҷиши регламенти техникй - таҳлили мунтазами сатҳи илмии регламенти техникй бо мақсади муайян намудани мувофиқати он барои амали минбаъда ё бекор кардан.

3. Таҳияи регламенти техникӣ

11. Таҳияи регламенти техникӣ амалҳои зеринро дар бар мегирад:

- омода намудан ба таҳия;

- таҳияи лоиҳаи кории регламенти техникӣ;

- таҳияи таҳрири ниҳоии лоиҳаи регламенти техникӣ;

- тасдиқи регламенти техникӣ;

- бақайдгирии давлатии регламенти техникӣ.

12. Омодагӣ ба таҳияи регламенти техникӣ бояд аз амалҳои зерин иборат бошад:

- таҳлили таъсири регламенти техникӣ ба монеаҳои техникӣ дар савдо;

- таҳлили талаботи стандартҳои байналмилалӣ ва минтақавӣ ба объекти бамеъёрдарории техникӣ;

- таҳлили талаботи дар ҷумҳурӣ амалкунанда ба объекти бамеъёрдарории техникӣ;

- гузаронидани корҳои илмию тадқиқотӣ (дар ҳолати зарурӣ);

- нашр намудани огоҳинома дар бораи оғози таҳияи регламенти техникӣ дар нашриёти расмӣ ва ҷой додани он дар сомонаи расмии шабакаи Интернет.

13. Таҳиякунанда лоиҳаи кории регламенти техникиро таҳия менамояд ва тавзеҳоти хаттии онро тартиб медиҳад. Дар ҳолати зарурӣ бо қарори таҳиякунанда барои баррасии лоиҳаи регламенти техникӣ гурӯҳи корӣ таъсис дода мешавад. То пешниҳод барои тақриз лоиҳаи корӣ метавонад аз тарафи гурӯҳи корӣ баррасӣ карда шавад ва дар ҳолати зарурӣ аз рӯи хулосаҳои он аз нав таҳия гардад.

14. Таҳиякунанда лоиҳаи корӣ бо тавзеҳоти хаттӣ ва огоҳинома дар бораи оғози баррасии лоиҳаро барои гирифтани тақриз ба мақоми ваколатдор ва субъектҳои бамеъёрдарории техникӣ ирсол менамояд. Мақоми ваколатдор ҳуҷҷатҳои воридгардидаро дар нашриёти расмӣ ва сомонаи расмии шабакаи Интернетии худ ҷой медиҳад.

15. Мӯҳлати баррасии лоиҳаи корӣ, ки таҳиякунанда дар огоҳинома муқаррар намудааст, бояд на камтар аз 60 ва на зиёда аз 90 рӯзи тақвимӣ аз санаи барои тақриз ирсол намудани он бошад. Тақризҳое, ки баъд аз рӯзи дар огоҳинома муқарраршуда ворид мешаванд, барои баррасӣ қабул карда намешаванд.

16. Таҳиякунанда дар мӯҳлати 15 рӯзи тақвими аз санаи ба охир расидани баррасӣ, ки дар огоҳинома дар бораи оғози баррасии лоиҳаи корӣ муқаррар шудааст, ба мақоми ваколатдор дар бораи ба охир расидани баррасии лоиҳаи кории регламенти техникӣ огоҳинома ирсол менамояд. Мақоми ваколатдор огоҳинома дар бораи ба охир расидани баррасии лоиҳаи кории регламенти техникиро дар нашриёти расмӣ ва сомонаи расмии шабакаи Интернетии худ ҷой медиҳад.

17. Таҳиякунанда бо мулоҳизаҳои ба таври хаттӣ қабулшуда маҷмӯи тақризҳоро тартиб дода, лоиҳаи кориро такмил дода (таҳрири охирин) тавзеҳоти хаттии онро аниқ менамояд. Таҳрири ниҳоии лоиҳа аз тарафи гурӯҳи корӣ баррасӣ гардида бояд бо мақомоти иҷроияи ҳокимияти давлатӣ мувофиқа карда шавад. Ҳангоми мавҷудияти фикрҳои мухолиф аз тарафи мақомоти иҷроияи ҳокимияти давлатӣ таҳиякунанда баргузории машварати мувофиқанамоиро ташкил менамояд. Дар ҳолати ҳал нагардидани мухолифатҳои ҷойдошта, лоиҳаи регламенти техникиро барои тасдиқ пешниҳод намудан мумкин нест.

18. Таҳиякунанда маҷмӯи ҳуҷҷатҳоро барои пешниҳод ба мақоми ваколатдор омода менамояд. Маҷмӯи ҳуҷҷатҳо асноди зеринро дар бар мегирад:

- таҳрири ниҳоии мувофиқашудаи регламенти техникӣ - дар варақа ва паҳнкунандаи электронӣ дар шакли файли матнӣ;

- тавзеҳот ба лоиҳаи регламенти техникӣ - дар варақа ва паҳнкунандаи электронӣ дар шакли файли матнӣ;

- ҳуҷҷатҳое, ки мувофиқа шудани регламенти техникиро тасдиқ менамоянд (нусхаҳои аслӣ);

- маҷмӯи тақризҳо ба лоиҳаи кории регламенти техникӣ дар варақа ва паҳнкунандаи электронӣ дар шакли файли матнӣ;

- протокол(ҳо)-и машварати мувофиқанамоӣ (дар ҳолати мавҷудият);

- пешниҳодоти таҳиякунанда, ки дорои муқаррарот оид ба истифода ва таҳияи (дар ҳолати зарурӣ) стандартҳои давлатии ба татбиқи регламенти техникӣ алоқаманд мебошад.

19. Мақоми ваколатдор дар сомонаи расмии шабакаи Интернет таҳрирҳои ниҳоии мувофиқашуда, тавзеҳот ва маҷмӯи тақризҳоро ҷой медиҳад ва гузаронидани санҷиши техникии маҷмӯи ҳуҷҷатҳои пешниҳодшударо ташкил менамояд. Дар натиҷаи санҷиш ҳуҷҷатҳо метавонанд ба таҳияи мукаммал баргардонида шаванд.

4. Тасдиқи регламенти техникӣ

20. Мақоми ваколатдор лоиҳаи регламенти техникиро барои тасдиқ ба Ҳукумати Ҷумҳурии Тоҷикистон пешниҳод мекунад ва лоилаи Номгӯи стандартҳои давлатии ба регламенти техникӣ алоқамандро (минбаъд - Номгӯи стандартҳоро) омода менамояд. Регламенти техникӣ бо қарори Ҳукумати Ҷумҳурии Тоҷикистон тасдиқ ва мавриди амал қарор дода мешавад.

21. Мақомоти иҷроияи ҳокимияти давлатӣ (таҳиякунандаи масъули регламенти техникӣ), дар ҳолати зарурӣ, таҳияи стандартҳои давлатӣ ва дигар ҳуҷҷатҳои меъёрии техникии алоқамандро ташкил менамояд.

22. Мӯҳлатҳои амалишавии регламентҳои техникӣ бо дарназардошти вақте, ки барои амалӣ намудани чорабиниҳо оид ба таъмини риояи талаботи регламентҳои техникӣ заруранд, муқаррар карда мешаванд, вале на пештар аз шаш моҳ аз рӯзи нашри расмии маълумот оид ба тасдиқи онҳо, ба истиснои ҳолатҳое, ки дар моддаи 8-и Қонуни Ҷумҳурии Тоҷикистон "Дар бораи бамеъёрдарории техникӣ" пешбинӣ шудаанд.

5. Бақайдгирии давлатии регламенти техникӣ

23. Бақайдгирии давлатии регламенти техникиро мақоми ваколатдор дар муддати 15 рӯзи тақвимӣ аз рӯзи ба тасвиб расидани қарори Ҳукумати Ҷумҳурии Тоҷикистон дар бораи тасдиқи он амалӣ менамояд.

24. Ба регламенти техникӣ дар раванди бақайдгирии давлатӣ нишонаи иборат аз: индекси "РТ" (регламенти техникӣ), соли тасдиқи он, рақами тартибии бақайдгирӣ (иборат аз се рақам), ки мақоми ваколатдор муайян менамояд, аломати мансубият ба давлат "17" бо хати уреб ҷудошуда дода мешавад. Намуна РТ/2013/001/ Т.Т.

25. Маълумот дар бораи регламенти техникии бақайдгирифташуда, қарори Ҳукумати Ҷумҳурии Тоҷикистон дар бораи тасдиқ ва мавриди амал қарор додани регламенти техникӣ, мақоми иҷроияи ҳокимияти давлатӣ (таҳиякунандаи масъули регламенти техникӣ) ва Номгӯи стандартҳо дар нашрияи расмии мақоми ваколатдор ба табъ расонида мешавад ва дар муддати 5 рӯзи тақвимӣ аз санаи ба қайди давлатӣ гирифтани регламенти техникӣ дар сомонаи расмии шабакаи Интернетии мақоми ваколатдор ҷой дода мешавад.

6. Санҷиш, аз нав дида баромадан, тағйир додан ва бекор кардани регламенти техникӣ

26. Барои таъмини мутобиқати регламенти техникӣ ба талаботи санадҳои ҳуқуқӣ, сатҳи рушди илму техника бо назардошти тағйир додани регламенти техникӣ, ки ба бехатарии маҳсулот, равандҳои коркарди он, истеҳсол, истифодабарӣ (истеъмол), нигоҳдорӣ, интиқол, ба муомилот баровардан ва истифодаи партовҳо ё хизматрасониҳо алоқаманд мебошанд, санҷиши мунтазами он гузаронида мешавад. Санҷиши регламенти техникӣ на камтар аз як маротиба дар 7 сол амалӣ карда мешавад.

27. Санҷиши регламенти техникиро мақоми иҷроияи ҳокимияти давлатӣ (таҳиякунандаи масъули регламенти техникӣ), ки барои санҷиши он ҷавобгар аст, ё бо супориши он ташкилоти ваколатдор (минбаъд - иҷрокунанда) тибқи тартибе, ки аз тарафи мақоми ҳокимияти давлатӣ бо дарназардошти талаботи тартиби мазкур ба ин иҷрокунанда муқаррар шудааст, амалӣ карда мешавад.

28. Дар муддати 15 рӯзи тақвимии моҳи аввали семоҳаи якум, ки санҷиш ба нақша гирифта шудааст, иҷрокунанда ба мақоми ваколатдор дар бораи оғози санҷиши регламенти техникӣ огоҳинома пешниҳод менамояд.

29. Мақоми ваколатдор огоҳинома дар бораи оғози санҷиши регламенти техникиро дар нашриёти расмӣ ва сомонаи расмии шабакаи Интернетии худ ҷой медиҳад.

30. Аз рӯи натиҷаҳои санҷиш иҷрокунанда санади санҷиши сатҳи илмию техникии регламенти техникиро (минбаъд - санади санҷиш), ки дорои хулоса дар бораи амали минбаъдаи регламенти техникӣ мебошад, тартиб медиҳад.

31. Иҷрокунанда ба мақоми ваколатдор санади санҷиш ва натиҷаҳои санҷиши сатҳи илмӣ-техникии регламенти техникиро пешниҳод менамояд. Мақоми ваколатдор санади санҷишро тасдиқ намуда натиҷаҳои санҷиши сатҳи илмӣ-техникии регламенти техникиро дар нашриёти расмӣ ва сомонаи расмии шабакаи Интернетии худ ҷой медиҳад.

32. Аз нав дида баромадани регламенти техникӣ, бекор кардан ё ба он ворид намудани тағйиротро (иловаҳоро) метавонанд инчунин бо дастури Ҳукумати Ҷумҳурии Тоҷикистон ё аз рӯи натиҷаҳои санҷиши ғайринавбатӣ дар асоси:

- санадҳои қонунгузории Ҷумҳурии Тоҷикистон, қарорҳо ва супоришҳои Ҳукумати Ҷумҳурии Тоҷикистон;

- пешниҳодҳои асоснокшудаи субъектҳои манфиатдори бамеъёрдарории техникӣ, иҷро намоянд.

33. Таҳияи тағйирот ба регламенти техникӣ тибқи тартибе, ки барои таҳияи регламентҳои техникӣ муайян шудааст, ба роҳ монда мешавад. Ба ҳар як тағйироти регламенти техникӣ баъд аз тасдиқ ишора дода мешавад.

34. Ишораи тағйирот ба регламенти техникӣ аз ишораи регламенти техникӣ ва бо хати уреб ҷудошудаи калимаи "Тағйирот", рақами тартибии тағйироти регламенти техникӣ ва тавассути аломати ду нуқта соли тасдиқи тағйироти регламенти техникӣ иборат аст. Намуна: РТ/2013/001Ш/Тағйироти 1:2014.

35. Иттилоот дар бораи тағйироти бақайдгирифташудаи регламенти техникӣ, қарори Ҳукумати Ҷумҳурии Тоҷикистон дар бораи ворид намудани тағйирот, санаи амалишавии он ва инчунин матни тағйиротро дар нашриёти расмии мақоми ваколатдор ба табъ расонида дар сомонаи расмии шабакаи Интернетии он ҷой медиҳанд.

36. Тағйироти ба таври расмӣ нашршударо ба саҳифаи аввали нусхаи регламенти техникии дар ҳомили коғазӣ нашршуда насб менамоянд. Ишораи дахлдор (бо ёрии мӯҳр ё ба таври дастхат) дар муқоваи регламенти техникӣ, ки дорои рақами тартибии тағйирот ва манбаи маълумоти расмӣ оид ба тағйирот аст дарҷ карда мешавад.

37. Аз нав нашр намудани регламенти техникӣ дар ҳолате ба роҳ монда мешавад, ки агар миқдори тағйироти дарҷкардашуда дар нашри амалкунанда зиёда аз нисфи матни регламенти техникиро ташкил диҳанд ё ин ки дохил намудани тағйироти алоҳида барои ифода ва дарк мушкилоти техникӣ эҷод намояд. Ҳангоми аз нав нашр намудан дар матаи регламенти техникӣ ҳамаи тағйироти то ин вақт ба он воридшуда, дохил карда мешаванд.

38. Аз нав дида баромадани регламенти техникӣ тибқи тартиби дар фасли 3 баёнгардида амалӣ карда мешавад, дар ин ҳол регламенти техникии амалкунанда бекор мегардад ва дар регламенти нав бар ивази кадом регламенти техникӣ таҳия шудани он нишон дода мешавад. Ба регламенти техникии нав ишораи регламенти бекоркардашуда бо ивази рақами соли тасдиқшавӣ, дода мешавад.

39. Барои бекор кардани регламенти техникӣ иҷрокунанда ба мақоми ваколатдор огоҳинома дар бораи бекоркунии банақшагирифташудаи регламенти техникиро ирсол менамояд. Мақоми ваколатдор огоҳинома дар бораи бекоркунии банақшагирифташудаи регламенти техникиро дар нашриёти расмӣ ва сомонаи расмии шабакаи Интернетии худ ҷой медиҳад. Бекор кардани регламенти техникӣ бояд бо мақомоти иҷроияи ҳокимияти давлатӣ, ки регламенти техникиро мувофиқа намудаанд, мувофиқа карда шавад.

40. Иҷрокунанда ба мақоми ваколатдор маводи зеринро ирсол менамояд:

- пешниҳод оид ба бекор кардани регламенти техникӣ;

- ҳуҷҷатҳо, ки мувофиқати бекор кардани регламенти техникиро тасдиқ менамоянд (нусхаҳои аслӣ);

- тақризи хаттии субъектҳои манфиатдори бамеъёрдарории техникӣ оид ба бекор кардани регламенти техникӣ;

- протокол(ҳо)-и машварати мувофиқанамоӣ (дар ҳолати мавҷуд будан).

41. Мақоми ваколатдор оид ба бекор кардани регламенти техникӣ ба Ҳукумати Ҷумҳурии Тоҷикистон пешниҳодот ирсол менамояд. Бекор кардани регламенти техникӣ бо қарори Ҳукумати Ҷумҳурии Тоҷикистон, ки санаи бекор кардани амали регламенти техникиро муқаррар менамояд, амалӣ карда мешавад.

42. Бекор кардани регламенти техникии қаблан амалкунанда ва ба амал мондани регламенти техникии навро дар як қарор ҷой намудан, иҷозат дода мешавад.

43. Маълумот оид ба бекор кардани регламенти техникӣ, қарори Ҳукумати Ҷумҳурии Тоҷикистон дар бораи бекор кардан ва санаи бекор кардани регламенти техникӣ дар нашрияи расмии мақоми ваколатдор ба табъ расонида мешавад ва дар муддати 5 рӯзи тақвимӣ аз санаи қабули қарори Ҳукумати Ҷумҳурии Тоҷикистон оид ба бекор кардани регламенти техникӣ дар сомонаи расмии мақоми ваколатдор дар шабакаи Интернет ҷои дода мешавад.

7. Чопи расмӣ ва истифодаи регламентҳои техникӣ

44. Интишори регламентҳои техникӣ дар шакли нашрияҳои чопии расмӣ амалӣ карда мешавад. Ҳуқуқи чоп намудани (аз нав нашр намудани) регламентҳои техникӣ ба мақоми ваколатдор тааллуқ дорад.

45. Чопи расмии регламентҳои техникиро, ки таҳрири табъу нашрро дар бар мегирад ва бо регламентҳои техникии нашршуда таъмин намуданро мақоми ваколатдор, тибқи тартиби муқаррарнамудаи он, ба роҳ мемонад.

46. Регламенти техникӣ дар як шакл ва дар сатҳи баробар новобаста аз кишвар ё ҷойи истеҳсоли маҳсулот ҳангоми таҳияи санадҳои қонунгузорӣ, таҳия, тасдиқ ва истифодаи талаботи техникӣ ба маҳсулот, раванди коркарди он, истеҳсол, истифодабарӣ (истеъмол), нигоҳдорӣ, интиқол, фурӯш ва истифодаи партовҳо ё хизматрасониҳо, истифода карда мешавад. Риояи талаботи регламенти техникии тасдиқшуда барои ҳамаи субъектҳои бамеъёрдарории техникӣ ҳатмӣ мебошад. Тартиби гузаронидани назорати давлатӣ оид ба риояи талаботи регламентҳои техникиро мақоми ваколатдор муқаррар менамояд.

47. Ҳангоми истеҳсоли маҳсулот барои содирот, агар шартҳои қарордод аз рӯи ин талаботҳо муайян шуда бошанд, нисбат ба онҳое, ки дар регламенти техникии Ҷумҳурии Тоҷикистон муқаррар шудаанд, шартҳои қарордод қабул карда мешаванд.

48. Истифодаи регламенти техникӣ бо роҳи бевосита дохил намудани талаботи он дар ҳуҷҷатҳои техникӣ, ё бо роҳи ишора ба он, ё иҷрои талаботи регламентҳои техникӣ бо дархостҳои минбаъда барои ин дар ҳуҷҷатҳои техникӣ амалӣ карда мешавад.

8. Огоҳинома ва нашри иттилоъ дар бораи регламенти техникӣ

49. Огоҳинома дар бораи оғоз ва анҷоми таҳия ва баррасии регламенти техникӣ ва иттилоъ дар бораи мӯҳлати мавриди амал қарор гирифтани регламенти техникии тасдиқкардашуда дар сомонаи расмии шабакаи Интернетӣ ва нашрияи расмии мақомоти ваколатдори давлатӣ нашр мешаванд.

50. Огоҳинома бояд дорои маълумоти зерин бошад:

- номгӯи регламенти техникӣ;

- асос барои таҳияи регламенти техникӣ;

- номгӯи объектҳои бамеъёрдарории техникӣ;

- иҷрокунандаи масъул ва иттилоъ барои робита бо он;

- санаи оғоз ва анҷоми таҳияи регламенти техникӣ;

- санаи оғоз ва анҷоми баррасии регламенти техникӣ.