Низомнома дар бораи тартиби гузаронидани аттестатсия ва тартиби ба субъектони хоҷагидорӣ додани мақоми корхонаи (хоҷагии) зотпарварӣ

Низомномаи мазкур қоидаҳои фаъолияти субъектҳои зотпарвариро доир ба чорвопарварӣ, қутоспарварӣ, гӯсфандпарварӣ, бузпарварӣ, асппарварӣ, паррандапарварӣ, моҳипарварӣ ва занбӯриасалпарварӣ, бо дарназардошти ҳар як соҳа муайян менамояд.

1. Тартиби гузаронидани аттестатсияи давлатӣ дар фаъолияти субъектҳои зотпарварӣ

1. Аттестатсияи давлатӣ дар субъектҳои зотпарварӣ бо мақсади афзун гардонидани самаранокии корҳои селексионию зотпарварӣ дар чорводорӣ, вусъат додани ташаккули пода, рама ва галаҳои зотӣ, муайян ва беҳтар намудани захираҳои зотӣ гузаронида мешавад.

2. Ҳамаи субъектҳои зотпарварӣ, таълимию таҷрибавӣ ва стансияҳои таҷрибавӣ аз аттестатсия мегузаранд.

3. Аттестатсияи давлатӣ дар фаъолияти субъектҳои зотпарварӣ дар 5 сол як маротиба гузаронида мешавад.

4. Аттестатсияи давлатӣ аз тарафи Комиссия, ки он аз ҷониби Вазорати кишоварзии Ҷумҳурии Тоҷикистон таъсис меёбад, гузаронида мешавад. Комиссия аттестатсияи фаъолияти субъектҳоро новобаста ба тобеияти маъмурӣ ва шакли моликият мегузаронад.

5. Ба ҳайати Комиссия мутахассисони Вазорат, олимони соҳа, намояндагони ташкилотҳои зертобеи вилоятӣ, марказҳои селексионӣ, муассисаҳои илмӣ шомил карда мешаванд.

6. Аттестатсия аз рӯи қоидаҳои муайянгардида бо дарназардошти нишондиҳандаҳои миқдори ва сифатии маҳсулнокии чорво ва фаъолияти истеҳсолӣ тибқи замима гузаронида мешавад.

7. Субъектҳои зотпарварие, ки нисбати касалиҳои сироятӣ носолим мебошанд, аз аттестатсия гузаронида намешаванд.

8. Дар асоси таҳлили нишондиҳандаҳо Комиссия рӯйхати субъектҳои зотпарвариро барои баррасӣ ба Вазорати кишоварзии Ҷумҳурии Тоҷикистон пешниҳод менамояд.

2. Тартиби додани мақоми корхонаи (хоҷагии) зотпарварӣ

9. Нишондиҳандаҳои миқдорӣ, сифатӣ ва фаъолияти истеҳсоли говҳои ширдеҳ, гӯштӣ ва қутос, гӯсфандони зотҳои маҳаллии ҷойдорӣ, тоҷикӣ, ҳисорӣ, маҳинпашм, қароқулӣ, бузҳои зоти тоҷикии серпашм, аспҳои зоти тоҷикӣ, занбӯри асал, моҳипарварӣ ва паррандапарварӣ тибқи замима амалӣ гардонида мешаванд.

10. Дар асоси таҳлилу пешниҳоду нишондиҳандаҳо Комиссияи аттестатсионӣ хулосаи худро оид ба додани мақоми корхонаи зотпарварӣ ба субъекти зотпарварӣ ва дар ҳолати ҷавобгӯ набудани субъекти зотпарварӣ ба меъёру нишондиҳандаҳо хориҷ намудани субъекти зотпарварӣ аз шабакаи зотпарварӣ ба Вазорати кишоварзии Ҷумҳурии Тоҷикистон пешниҳод менамояд.

11. Вазорати кишоварзии Ҷумҳурии Тоҷикистон шабакаи субъектҳои зотпарвариро барои тасдиқ ба Ҳукумати Ҷумҳурии Тоҷикистон манзур месозад.

Замимаҳо