Оинномаи Муассисаи давлатии "Маркази татбиқи Лоиҳаи "Таъмини устувории ҳавзаи дарёи Панҷ ба тағйирёбии иқлим"

1. Муқаррароти умумӣ

1. Муассисаи давлатии "Маркази татбиқи Лоиҳаи "Таъмини устувории ҳавзаи дарёи Панҷ ба тағйирёбии иқлим" (минбаъд - Марказ) сохтори мустақили махсусгардонидашуда буда, ҳамоҳангсозӣ ва идораи маблағҳоро тибқи Созишномаи грантии байни Ҳукумати Ҷумҳурии Тоҷикистон ва Бонки осиёии рушд ҷиҳати татбиқи Лоиҳаи "Таъмини устувории ҳавзаи дарёи Панҷ ба тағйирёбии иқлим" амалӣ менамояд.

2. Марказ фаъолияти худро мутобиқи қонунгузории Ҷумҳурии Тоҷикистон, санадҳои меъёрии ҳуқуқии байналмилалии эътирофнамудаи Тоҷикистон, расмиёти Бонки осиёии рушд ва Оинномаи мазкур амалӣ менамояд.

3. Марказ шахси ҳуқуқӣ буда, мутобиқи қонунгузории Ҷумҳурии Тоҷикистон амволи ҷудогона, тавозуни мустақил, дар муассисаҳои бонкӣ суратҳисобҳо бо асъори миллӣ ва хориҷӣ, инчунин мӯҳр, штампҳо ва варақаҳо бо сабти номи худ дорад.

4. Номи ҳуқуқии Марказ:

бо забони тоҷикӣ: Муассисаи давлатии "Маркази татбиқи Лоиҳаи "Таъмини устувории ҳавзаи дарёи Панҷ ба тағйирёбии иқлим";

бо забони русӣ: Государственное учреждение "Центр реализации Проекта "Обеспечение устойчивости бассейна реки Пяндж к изменениям климата".

5. Суроғаи ҳуқуқии Марказ: Ҷумҳурии Тоҷикистон, шаҳри Душанбе, кӯчаи Шамсӣ-5/1.

2. Мақсад ва вазифаҳои Марказ

6. Мақсад ва вазифаҳои асосии Марказ аз инҳо иборат мебошанд:

- таҳияи ҳуҷҷатҳои зарурӣ, аз ҷумла асосноккунии техникию иқтисодӣ ва фароҳам овардани шароит барои татбиқи Лоиҳа;

- таъмини истифодаи мақсаднок ва самараноки маблағҳое, ки аз ҷониби Ҳукумати Ҷумҳурии Тоҷикистон барои татбиқи Лоиҳа ҷалб карда шудаанд;

- ҳамоҳангсозӣ ва таъмини шароити кории коршиносон ва мушовирон оид ба таҳия ва татбиқи Лоиҳа;

- ташкили фаъолият оид ба татбиқи Лоиҳа бо агентии иҷроия, вазорату идораҳо, мақомоти иҷроияи маҳаллии ҳокимияти давлатӣ ва дигар ташкилотҳои дахлдор;

- гузаронидани мониторинг ва назорати сифати корҳои иҷрошуда оид ба татбиқи қисматҳои Лоиҳа аз тарафи пудратчиён ва пудратчиёни ғайриасосӣ;

- амалисозии фаъолияти робитаҳои байналмилалӣ, ки барои иҷрои вазифаҳо оид ба татбиқи Лоиҳа равона шудаанд;

- иҷрои дигар фаъолияти зарурӣ барои ҳалли вазифаҳои ба зиммаи Марказ гузошташуда, ки қонунгузории Ҷумҳурии Тоҷикистон манъ накардааст.

3. Ҳуқуқ ва ӯҳдадориҳои Марказ

7. Марказ ҳуқуқ дорад:

- тибқи тартиби муқарраргардида амволи таҳти ҳуқуқи идораи оперативӣ ба он тааллуқдоштаро соҳибӣ, истифода ва ихтиёрдорӣ намояд;

- дар мувофиқа бо агентии иҷроия оид ба хариди таҷҳизот бо созмонҳои байналмилалии молиявӣ ва мақоми ваколатдори марказӣ оид ба ҷалб, ҳамоҳангсозӣ ва мониторинги истифодаи кӯмаки беруна, шартномаҳо ва қарордодҳо ба имзо расонида, дигар амали ҳуқуқиро иҷро намояд;

- дар муассисаҳои бонкии Ҷумҳурии Тоҷикистон бо асъори миллӣ ва хориҷӣ суратҳисобҳо кушояд;

- мониторинг ва арзёбии раванди иҷрои корҳоро таъмин намояд;

- дигар фаъолиятро анҷом диҳад, ки ба мақсадҳои Лоиҳа ва қонунгузории Ҷумҳурии Тоҷикистон мухолифат накунанд.

8. Марказ ӯҳдадор аст:

- ба кормандони худ шароити бехатари меҳнатро таъмин намуда, тибқи тартиби муқарраргардида барои зарари ба саломатӣ ва қобилияти меҳнатии онҳо расонидашуда, масъул бошад;

- баҳисобгирии фаврӣ ва муҳосибавии фаъолияти молиявию хоҷагиро анҷом дода, ҳуҷҷатҳои оморӣ ва муҳосибавиро таҳия намояд;

- воситаҳои молиявиро тибқи шартҳои созишномаҳои баимзорасида истифода намояд.

4. Манбаъҳои ташаккули маблағ ва амвол

9. Марказ тибқи қонунгузории Ҷумҳурии Тоҷикистон метавонад дар ихтиёри худ бо ҳуқуқи идораи оперативӣ бино, иншоот, таҷҳизот, асбобу лавозимот ва дигар амволеро, ки барои таъмини фаъолияти пешбининамудаи Оинномаи мазкур заруранд, дошта бошад.

10. Маблағҳои Марказ аз ҳисоби зерин ташаккул меёбанд:

- саҳмҳои молиявӣ ва моддии аз тарафи агентии иҷроия ҷудошаванда;

- грант ва қарзи аз ҷониби Ҳукумати Ҷумҳурии Тоҷикистон ҷалбгардида, дигар маблағҳое, ки ташкилотҳои давлатӣ ва созмонҳои байналмилалӣ барои татбиқи Лоиҳа пешниҳод намудаанд ва хилофи қонунгузории Ҷумҳурии Тоҷикистон намебошанд.

5. Идоракунии фаъолияти Марказ

11. Роҳбари Марказ директор мебошад, ки дар асоси озмун ва дар мувофиқа бо Бонки осиёии рушд аз ҷониби Ҳукумати Ҷумҳурии Тоҷикистон ба вазифа таъин ва аз вазифа озод карда мешавад.

12. Ба салоҳияти директори Марказ дохил мешаванд:

- ташкили роҳбарии умумӣ дар давраи фаъолияти Марказ; намояндагии манфиатҳои Марказ дар ташкилотҳои давлатӣ, гайриҳукуматӣ ва байналмилалӣ;

- дар мувофиқа бо Вазорати молияи Ҷумҳурии Тоҷикистон тасдиқ намудани сохтор, ҷадвали штатӣ ва сметаи хароҷоти Марказ, андозаи музди меҳнати кормандон;

- ба имзо расонидани шартномаҳо ва анҷом додани амалҳои дигар дар доираи Лоиҳа мутобиқи қонунгузории Ҷумҳурии Тоҷикистон;

- пешниҳоди ҳисоботҳои Марказ ба Ҳукумати Ҷумҳурии Тоҷикистон, Вазорати молиян Ҷумҳурии Тоҷикистон, Кумитаи давлатии сармоягузорӣ ва идораи амволи давлатии Ҷумҳурии Тоҷикистон;

- дар доираи салоҳияти худ интишор намудани фармону амрҳое, ки ба қонунгузорӣ мухолифат намекунанд ва иҷрои онҳо барои ҳамаи кормандони Марказ ҳатмӣ мебошанд;

- ихтиёрдории амвол ва воситаҳои Марказ, додани ваколатномаҳо, имзои ҳуҷҷатҳои молиявию хоҷагидорӣ ва дигар ҳуҷҷатҳо дар доираи Лоиҳа, ки ба қонунгузории Ҷумҳурии Тоҷикистон мухолифат намекунанд;

- тибқи тартиби муқарраргардида таъин ва аз вазифа озод намудани кормандони Марказ;

- иҷро намудани ваколатҳои дигар мутобиқи қонунгузории Ҷумҳурии Тоҷикистон ва Оинномаи мазкур.

13. Директори Марказ фаъолияти худро мутобиқи қонунгузории Ҷумҳурии Тоҷикистон ва Оинномаи мазкур анҷом дода, ба Ҳукумати Ҷумҳурии Тоҷикистон ва Бонки осиёии рушд ҳисоботдиҳанда мебошад.

14. Директори Марказ барои иҷрои вазифаҳои ба зиммаи Марказ гузошташуда масъулияти шахсӣ дошта, мутобиқи қонунгузории Ҷумҳурии Тоҷикистон ва Оинномаи мазкур дараҷаи масъулиятнокии кормандони Марказ, инчунин ӯҳдадориҳои хизматии ҳар як кормандро муқаррар менамояд.

6. Баҳисобгирии муҳосибавӣ ва ҳисоботдиҳӣ

15. Баҳисобгирии муҳосибавӣ ва ҳисоботдиҳии Марказ мутобиқи қонунгузории Ҷумҳурии Тоҷикистон, стандартҳои байналмилалии баҳисобгирии муҳосибавӣ, инчунин расмиёти Бонки осиёии рушд анҷом дода мешавад.

16. Натиҷаҳои фаъолияти Марказ дар ҳисоботҳои ҳармоҳа, семоҳа, нимсола ва солонаи Марказ, ки ба Ҳукумати Ҷумҳурии Тоҷикистон, Вазорати молияи Ҷумҳурии Тоҷикистон, Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Агентии беҳдошти замин ва обёрии назди Ҳукумати Ҷумҳурии Тоҷикистон ва Бонки осиёии рушд пешниҳод мегарданд, инъикос меёбанд.

17. Аудитҳои молиявӣ ва техникии Марказ аз ҷониби аудиторҳои мустақил, ки тибқи расмиёти Бонки осиёии рушд дар асоси озмун интихоб шудаанд, гузаронида мешаванд.

7. Тартиби ворид намудани тағйирот ба Оинномаи Марказ

18. Тағйиру иловаҳо ба Оинномаи мазкур тибқи қонунгузории Ҷумҳурии Тоҷикистон ворид карда мешаванд.

8. Барҳамдиҳии Марказ

19. Азнавташкилдиҳӣ (якҷояшавӣ, ҳамроҳшавӣ, тақсимшавӣ, табдилдиҳӣ, ҷудошавӣ) ва барҳам додани Марказ тибқи қонунгузории Ҷумҳурии Тоҷикистон анҷом дода мешавад.