Тартиби таҳияи тарҳи соҳавии рушди ҳудуди Ҷумҳурии Тоҷикистон

1. Муқаррароти умумӣ

1. Тартиби таҳияи тарҳи соҳавии рушди ҳудуди Ҷумҳурии Тоҷикистон (минбаъд - Тартиб) дар асоси талаботи қисми 2 моддаи 48 Кодекси шаҳрсозии Ҷумҳурии Тоҷикистон таҳия шуда, раванди таҳияи тарҳи соҳаи муайяни рушди ҳудуди Ҷумҳурии Тоҷикистонро ба танзим медарорад.

2. Таҳияи тарҳи соҳавии рушди ҳудуди Ҷумҳурии Тоҷикистон (минбаъд - тарҳи соҳавии рушд) дар асоси Кодекси шаҳрсозии Ҷумҳурии Тоҷикистон, санадҳои меъёрии ҳуқуқии Ҷумҳурии Тоҷикистон, стандартҳои давлатӣ, инчунин меъёрҳо ва қоидаҳои шаҳрсозӣ амалӣ гардонида мешавад.

3. Тарҳи соҳавии рушд сиёсати давлатиро оид ба стратегияи рушди шаҳрсозии ҳудуди Ҷумҳурии Тоҷикистон муайян менамояд.

4. Ҳамоҳангсозӣ ва таъмини илмию методии тарҳи соҳавии рушдро Кумитаи меъморӣ ва сохтмони назди Ҳукумати Ҷумҳурии Тоҷикистон амалӣ менамояд.

5. Тартиби мувофиқакунӣ, экспертиза ва тасдиқи тарҳи соҳавии рушд мутобиқи қонунгузории Ҷумҳурии Тоҷикистон ва дигар санадҳои меъёрии ҳуқуқӣ, ки гузаронидани экспертиза ва тасдиқи ҳуҷҷатҳои шаҳрсозии пешазлоиҳавӣ ва лоиҳавиро ба низом даровардааст, муқаррар карда мешавад.

6. Муқаррароти асосии тарҳи соҳавии рушд пас аз тасдиқ гардидан, дар васоити ахбори умум интишор карда мешавад.

2. Талаботи асосӣ ба супориш барои таҳияи тарҳи соҳавии рушд ва таркиби таҳияи он

7. Талабот дар бораи таҳияи тарҳи соҳавии рушд дар асоси супориш барои таҳияи лоиҳаҳое, ки фармоишгар тибқи талаботи меъёру қоидаҳои шаҳрсозӣ ва дигар санадҳои меъёрии ҳуқуқӣ медиҳад ва онҳо фаъолияти шаҳрсозиро ба танзим медароранд, муқаррар карда мешавад.

8. Таҳияи тарҳи соҳавии рушд дар асоси қарори Ҳукумати Ҷумҳурии Тоҷикистон амалӣ гардонида мешавад.

9. Дархост оид ба таҳияи тарҳи соҳавии рушд аз ҷоннби Кумитаи меъморӣ ва сохтмони назди Ҳукумати Ҷумҳурии Тоҷикистон ба Ҳукумати Ҷумҳурии Тоҷикистон пешниҳод карда мешавад.

10. Фармоишгар оид ба таҳияи тарҳи соҳавии рушд, мақоми ваколатдори давлатӣ дар соҳаи меъморӣ ва шаҳрсозӣ шуда метавонад.

11. Тарҳи соҳавии рушд дар асоси супориш барои таҳияи тарҳи соҳавии рушди ҳудуди Ҷумҳурии Тоҷикистон тибқи замимаи 1 Тартиби мазкур, ки аз ҷониби фармоишгар дода мешавад, таҳия карда мешавад.

12. Муқаррароти асосии тарҳи соҳавии рушд то тасдиқ гардидан бояд бо мақомот ва идораҳои манфиатдор мувофиқа карда шаванд.

13. Номгӯи мақомот ва идораҳое, ки тарҳи соҳавии рушд бо онҳо мувофиқа карда мешавад, аз ҷониби мақоми ваколатдори давлатӣ муайян карда шуда, дар супориш барои таҳияи тарҳи соҳавии рушд нишон дода мешавад.

14. Мақомот ва муассисаҳои манфиатдор, ки ба онҳо тарҳи соҳавии рушд барои мувофиқа пешниҳод карда мешавад бояд дар давоми 10 рӯзи корӣ дар шакли коғазӣ ё электронӣ хулосаи худро ба фармоишгар пешниҳод намоянд (қарори Ҳукумати ҶТ аз 02.03.2023 № 81).

15. хориҷ карда шуд (қарори Ҳукумати ҶТ аз 02.03.2023 № 81).

16. Лоиҳаи тарҳи соҳавии рушд қабл аз ба Ҳукумати Ҷумҳурии Тоҷикистон пешниҳод шудан аз экспертизаи давлатии ҳуҷҷатҳои лоиҳавии шаҳрсозӣ ва лоиҳаҳои сохтмонӣ гузаронида мешавад.

17. Ҳукумати Ҷумҳурии Тоҷикистон тарҳи соҳавии рушдро бо пешниҳоди фармоишгар тасдиқ менамояд.

3. Мӯҳтавои тарҳи соҳавии рушд

18. Тарҳи соҳавии рушд, мувофиқи тарҳи асосии ҷойгиркунии аҳолӣ дар ҳудуди Ҷумҳурии Тоҷикистон таҳия шуда, дар он сиёсати давлатӣ оид ба стратегияи шаҳрсозии ҳудуди Ҷумҳурии Тоҷикистон мушаххас гардонида мешавад.

19. Қисми асосии тарҳи соҳавии рушд муқаррароти асосии онро дар бар мегирад, ки аз қарорҳои дар лоиҳа қабулшуда нишондиҳандаҳои асосии иқтисодию техникии таҳияи тарҳи соҳавии рушди ҳудуди Ҷумҳурии Тоҷикистон тибқи замимаи 2 Тартиби мазкур ва тарҳи нақшаи лоиҳа (тарҳи асосӣ) иборат мебошад.

20. Таҳияи тарҳи соҳавии рушд бо истифода аз технологияҳои компютерӣ, харитаҳои топографии рақамӣ, нақшаи ҳудудҳо ва маҳалҳои аҳолинишин мутобиқи талаботи санадҳои меъёрии ҳуқуқӣ амалӣ карда мешавад.

21. Бо тарҳи соҳавии рушд нишондиҳандаҳои асосӣ ва қарорҳои банақшагирӣ оид ба масъалаҳои зерин муайян карда мешаванд:

- рушди таъминоти барқ, газ, алоқа, таъминоти обу корезӣ;

- рушди нақлиёти ҳавоӣ, роҳи оҳан, автомобилӣ ва намудҳои дигари нақлиёт;

- ҳифзи ҳудуд аз равандҳои хатарноки геологӣ ва гидрогеологӣ;

- ҳифзи муҳити зист;

- ҷойгиршавии қувваҳои истеҳсолии соҳаи иқтисодиёт;

- дигар масоили рушди ҳудуд.

22. Маводи асосии графикии тарҳи соҳавии рушд дар бар мегирад:

- тарҳи ҳудуди айни ҳол истифодашаванда;

- тарҳи арзёбии умумии ҳудуд;

- нақшаи лоиҳавӣ (нақшаи асосӣ);

- тарҳи минтақабандии ҳудуд;

- тарҳи коммуникатсияҳои муҳандисию нақлиётӣ;

- тарҳи ҳифзи ҳудуд аз таъсирҳои хатарҳои табиӣ ва техногенӣ.

23. Тарҳи ҳудуди айни ҳол истифодашаванда (нақшаи такявӣ) - тарҳи арзёбии маҷмаавии ҳудуд, нақшаи лоиҳавӣ (нақшаи асосӣ): дар миқёси 1:200000 - 1:100000 иҷро карда мешаванд. Миқёс ва номгӯи маводи асосии графикиро фармоишгари тарҳи соҳавии рушд муайян менамояд.

24. Номгӯй, мӯҳтаво ва миқёси дигари тарҳҳо, тарҳҳои иловагӣ ва қисмҳои алоҳидаро, ки қарорҳои лоиҳаро асоснок мекунанд, дар супориш барои таҳияи тарҳи соҳавии рушд дар мувофиқа бо фармоишгар муайян карда мешавад.

25. Тавзеҳномаи тарҳи соҳавии рушд бояд маводи таҳлилии ҳолати мавҷуда, асосноккунии қарорҳои лоиҳавӣ, чорабиниҳо оид ба таъминоти меъёрию ҳуқуқӣ ва ташкилии татбиқи лоиҳаи тарҳи соҳавии рушд, инчунин нишондиҳандаҳои асосии иқтисодию техникӣ ва нусхаҳои маводи графикии асосиро дошта бошад.

4. Таъминоти иттилоотии тарҳи соҳавии рушд

26. Фармоишгар вазифадор аст иттилооти ибтидоии заруриро барои таҳияи тарҳи соҳавии рушд таъмин намояд.

27. Фармоишгар метавонад ҷамъоварии иттилооти ибтидоиро ба таҳиягари тарҳи соҳавии рушд супорад.

28. Мӯҳтаво ва ҳаҷми иттилооти ибтидоиро таҳиягар ва фармоишгари тарҳи соҳавии рушд муқаррар менамоянд.

29. Иттилооти ибтидоӣ барои таҳияи тарҳи соҳавии рушд иборат аст аз иттилоот оид ба танзими фаъолияти шаҳрсозӣ, истифодаи замин, ҳифзи захираҳои табиӣ, ҳифзи табиат, ёдгориҳои таърихию фарҳангӣ ва дигар иттилооте, ки барои таҳияи тарҳи соҳавии рушд зарур мебошад.

30. Дар ҳолати истифода кардани технологияҳои компютерӣ ҳангоми таҳияи тарҳи соҳавии рушд ба инобат гирифта мешаванд:

- иттилооти электронию картографӣ ва дигар иттилоот (бо имконияти истифодаи асоси картографияи рақамӣ, ки фармоишгар пешниҳод менамояд);

- таъминоти барномавие, ки фармоишгар истифода мебарад ва шакли интиқоли нттилоот дар намуди электронии дар супориш пешбинишуда.

31. Маводи иттилоотии ибтидоӣ барои таҳияи тарҳи соҳавии рушд дар бар мегирад:

- иттилоот дар бораи мавриди омӯзнш қарор додани объекти банақшагирии шаҳрсозӣ;

- мавҷуд будани сарчашмаҳои бойгонӣ, таърихӣ, бадеӣ ва ғайра. феҳристи корҳои илмию таҳқиқотии қаблан иҷрошуда, ҳуҷҷатҳо ва лоиҳаҳои шаҳрсозӣ, дигар корҳо, ки ба ҳисоб гирифтани онҳо барои таҳияи тарҳҳои муттаҳидгардонидаи банақшагирӣ зарур мебошанд;

- иттилоот оид ба ҳолати демографӣ ва шуғли аҳолӣ;

- иттилоот оид ба инфрасохтори иҷтимоӣ. нақлиётӣ, муҳандисӣ, истеҳсолӣ ва заминаи сохтмонӣ;

- маводи топографию геодезӣ;

- маводи дурнамои рушди иҷтимоию иқтисодии ҳудуд ва маҳалҳои аҳолинишин;

- иттилоот оид ба барномаҳои мақсадноки рушди иҷтимоию иқтисодӣ;

- иттилоот дар бораи истифодаи муосири ҳудудҳо ва арзёбии иқтисодии он;

- натиҷаҳои таҳқиқ ва дурнамои шароити санитарию беҳдоштӣ ва экологӣ;

- нишондиҳандаҳои таҳқиқи иҷтимоӣ ва иҷтимоию иқтисодӣ;

- маводи нақшаи такявӣ, нақшаҳои бақайдгирии коммуникатсияҳои зеризаминӣ ва атласҳои коркардҳои геологӣ барои таҳияи нақшаҳои асосӣ;

- маводи кадастри шаҳрсозӣ;

- дигар иттилоот ва талаботе, ки дар супориш барои таҳияи тарҳи муттаҳидгардонидаи банақшагирӣ пешниҳод карда мешавад.

5. Тартиби нигоҳ доштани тарҳи соҳавии рушд

32. Нусхаи тарҳи соҳавии рушди қабулгардида дар бойгонии таҳиягари тарҳи соҳавии рушд бо тартиби муқарраргардида нигоҳ дошта мешавад.

33. Тарҳи соҳавии рушди тасдиқшуда аз ҷониби фармоишгар ба мақомоти маҳаллии меъморӣ ва шаҳрсозӣ барои бақайдгирӣ ва нигоҳдорӣ бо замимаи ҳуҷҷатҳои зерин супорида мешавад:

- лоиҳаи нақша (нусхаи аслӣ);

- нақшаи ҳолати истифодаи ҳозираи ҳудуд (нусхаи аслӣ);

- дигар маводи асосии графикӣ (нусхаи аслӣ);

- тавзеҳномаи умумӣ бо нусхаҳои нақшаҳо ва тарҳҳо (шумораи нусхаҳо бо супориш барои таҳияи лоиҳа муқаррар карда мешавад).

34. Тарҳи соҳавии рушд, ки бо истифодаи технологияҳои компютерӣ таҳия гардидааст, ба фармоишгар дар шакли электронӣ дар ҳомили мувофиқашуда дода мешавад.

35. Нусхаҳои ҳуҷҷатҳои графикии шакли электронӣ бо тартиби муқарраршуда дар бойгонии таҳиягари тарҳи соҳавии рушд нигоҳ дошта мешавад.

36. Нашр ва пешниҳоди маводи тасвирии тарҳи соҳавии рушди тасдиқшуда бо тартиби муқаррарнамудаи санадҳои меъёрии ҳуқуқии Ҷумҳурии Тоҷикистон амалӣ карда мешаванд.

Замимаи 1

Замимаи 2