Тартиби гузаштани шаҳрвандон аз муоинаи тиббӣ барои соҳиб шудан ба силоҳ

1. Муқаррароти умумӣ

1. Тартиби гузаштани шаҳрвандон аз муоинаи тиббӣ барои соҳиб шудан ба силоҳ (минбаъд - Тартиб) масъалаҳои тартиби гузаштани муоинаи тиббӣ ва гирифтани маълумотномаи тиббӣ, номгӯи ҳуҷҷатҳои зарурие, ки барои гирифтани маълумотномаи тиббӣ аз ҷониби шаҳрвандон ба муассисаҳои тиббии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон пешниҳод карда мешаванд, инчунин шакл ва мӯҳлати амали маълумотномаи тиббиро муқаррар менамояд.

2. Тартиби гузаштани шаҳрвандон аз муоинаи тиббӣ

2. Муоинаи тиббӣ аз ҷониби комиссияҳои тиббӣ дар марказҳои саломатии ноҳиявӣ/шаҳрӣ гузаронида мешавад. Комиссияҳои мазкур аз тарафи роҳбарони марказҳои саломатӣ таъсис дода мешаванд.

3. Ба комиссияи тиббӣ муовини роҳбари маркази саломатии ноҳиявӣ/ шаҳрӣ аз рӯи самти фаъолияти алоқаманд роҳбарӣ мекунад.

4. Ҳайати комиссияи тиббӣ аз чунин мутахассисони соҳаи тиб иборат мебошад:

- табиби дармоншинос;

- табиби бемориҳои равонӣ;

- табиби бемориҳои чашм;

- табиби нарколог;

- табиби бемориҳои гӯшу гулӯ ва бинӣ.

5. Комиссияи тиббӣ ҳуқуқи дар ҳолатҳои зарурӣ ба кори комиссия ҷалб намудани мутахассисони дигарро дорад.

6. Пас аз гузаронидан ва анҷом додани муоинаи тиббӣ ҳар як табиби аъзои комиссия хулосаи худро оид ба вазъи саломатии шаҳрванд дар маълумотномаи тиббӣ қайд менамояд.

7. Шакли маълумотномаи тиббӣ оид ба натиҷаи муоинаи шаҳрванд барои гирифтани рухсатномаи соҳиб шудан ба силоҳро Вазорати тандурустӣ ва ҳифзи иҷтимоии аҳолии Ҷумҳурии Тоҷикистон муқаррар менамояд.

8. Маълумотномаи тиббӣ бо имзо ва мӯҳри роҳбари муассисаи тиббие, ки дар он муоина гузаронида шудааст, тасдиқ карда мешавад.

3. Номгӯи ҳуҷҷатҳо ҷиҳати гирифтани маълумотномаи тиббӣ оид ба натиҷаи муоинаи шаҳрванд барои гирифтани рухсатномаи соҳиб шудан ба силоҳ

9. Ҷиҳати гирифтани маълумотномаи тиббӣ оид ба натиҷаи муоинаи шаҳрванд барои гирифтани рухсатномаи соҳиб шудан ба силоҳ аз ҷониби шаҳрвандон ва кормандони корхона, муассиса ва ташкилотҳо ба муассисаҳои тиббии Вазорати тавдурустӣ ва ҳифзи иҷтимоии аҳолӣ ҳуҷҷатҳои зерин пешниҳод карда мешаванд:

- шиносномаи миллӣ, ки шахсият ва ҷои қайди шаҳрвандро тасдиқ мекунад;

- маълумотномаи тиббӣ аз Маркази наркологӣ оид ба набудан дар қайди он;

- маълумотномаи тиббӣ аз Маркази бемориҳои равонӣ оид ба набудан дар қайди он;

- иқтибоси таҳлилӣ аз варақаи дармонгоҳии муассисаи тиббии маҳали зисти шаҳрванди муроҷиаткунанда;

- 1 дона сурати 3х4 ё 4х4.

10. Шаҳрвандон ва кормандони корхона, муассиса, ташкилотҳо ҳангоми муроҷиат ба марказҳои наркологӣ ва бемориҳои рӯҳӣ ҷиҳати гирифтани маълумотномаи тиббӣ оид ба натиҷаи муоинаи шаҳрванд барои гирифтани рухсатномаи соҳиб шудан ба силоҳ ӯҳдадоранд шиносномаи миллиро пешниҳод намоянд.

11. Шаҳрвандоне, ки қайди ҷои зисти доимиашон шаҳри Душанбе ва ноҳияҳои тобеи ҷумҳурӣ мебошанд, барои гирифтани маълумотномаи тиббӣ ба марказҳои наркологӣ ва бемориҳои рӯҳии ҷумҳуриявӣ, шаҳри Душанбе, байниноҳиявӣ ва шаҳриву ноҳиявӣ ва шаҳрвандоне, ки қайди ҷойи зисти доимиашон Вилояти Мухтори Кӯҳистони Бадахшон, вилоятҳои Суғду Хатлон мебошад, ба марказҳои наркологӣ ва бемориҳои рӯҳии вилоятӣ, байниноҳиявӣ ва шаҳриву ноҳиявии ҳудуди хизматрасонӣ муроҷиат менамоянд.

12. Кормандони масъули марказҳои наркологӣ ва бемориҳои рӯҳӣ вазифадоранд, ки ҳар як шаҳрванди муроҷиаткунандаро аз муоинаи тиббӣ гузаронида, натиҷаи муоинаро бо қайдҳои марказҳои мазкур муқоиса намуда, санҷиши онро анҷом диҳанд.

13. Пардохти маблағ барои гузаштан аз муоинаи тиббӣ тибқи санадҳои меъёрии ҳуқуқии Ҷумҳурии Тоҷикистон аз ҳисоби шаҳрвандони муроҷиаткунанда анҷом дода мешавад.

4. Мӯҳлати амали маълумотномаи тиббӣ оид ба натиҷаи муоинаи шаҳрванд барои гирифтани рухсатномаи соҳиб шудан ба силоҳ

14. Мӯҳлати амали маълумотномаи тиббӣ оид ба натиҷаи муоинаи шаҳрванд барои гирифтани рухсатнома ба соҳиб шудан, нигоҳ доштан ва гирифта гаштани силоҳ 3 сол мебошад.

15. Кормандони корхона, муассиса, ташкилот ва шаҳрвандони дар ихтиёри худ силоҳдошта вазифадор мебошанд, ки 2 моҳ пеш аз гузаштани мӯҳлати амали рухсатнома оид ба силоҳ аз нав аз муоинаи тиббӣ гузашта, ба сохторҳои низоми иҷозатдиҳии мақомоти корҳои дохилӣ маълумотномаи тиббӣ пешниҳод намоянд.

16. Рухсатномаҳое, ки ба шаҳрвандон то қабули қарори мазкур дода шудаанд, то мӯҳлати дар рухсатнома дарҷгардида эътибор доранд.