Тартиби тасдиқи мутобиқати силоҳи хизматӣ, ғайринизомӣ ва лавозимоти ҷангии он ба талаботи қонунгузории Ҷумҳурии Тоҷикистон дар соҳаи бамеъёрдарории техникӣ ва стандартонӣ

1. Таъинот ва доираи истифода

1. Санади мазкур тартиби умумии тасдиқи мутобиқати силоҳи хизматӣ, ғайринизомӣ ва лавозимоти ҷангии онро ба талаботи қонунгузории Ҷумҳурии Тоҷикистон дар соҳаи бамеъёрдарории техникӣ ва стандартонӣ, ҳамчунин маҳсулоти аз рӯи таркиб ба силоҳ монандро, ки бо Қонуни Чумҳурии Тоҷикистон "Дар бораи силоҳ" муайян шудаанд, дар қаламрави Ҷумҳурии Тоҷикистон истеҳсол, ба ҳудуди Ҷумҳурии Тоҷикистон ворид ва аз ҳудуди Ҷумҳурии Тоҷикистон содир карда мешаванд, муқаррар менамояд.

2. Талаботи умумӣ

2. Тасдиқи мутобиқати силоҳи хизматӣ ва ғайринизомӣ ва лавозимоти ҷангии он ба талаботи қонунгузории Ҷумҳурии Тоҷикистон дар соҳаи бамеъёрдарории техникӣ ва стандартонӣ, инчунин маҳсулоти аз рӯи таркиб ба силоҳ монандро (минбаъд - маҳсулот) бо мақсади таъмини бехатарии он ҳангоми гардиш дар қаламрави Ҷумҳурии Тоҷикистон тибқи Қонуни Чумҳурии Тоҷикистон "Дар бораи силоҳ" ва талаботи ҳуҷҷатҳои меъёрии дахлдор ба амал бароварда мешавад.

3. Дар раванди тасдиқи мутобиқат (минбаъд - сертификатсия) тавсифҳои (нишондиҳандаҳои) маҳсулот назорат карда шуда санҷишҳои истифодашаванда бояд имконияти ҳаммонандкунӣ ва тасдиқи мутобиқати маҳсулотро ба талаботи санадҳои қонунгузорӣ ва ҳуҷҷатҳои меъёрӣ дошта бошанд.

4. Ҳаммонандкунии маҳсулот тибқи талаботи стандартҳои давлатӣ барои намудҳои силоҳ ва навъи лавозимоти ҷангӣ ба амал бароварда мешавад.

5. Сертификатсияи маҳсулот ба сертификатсияи намуди силоҳ (навъи лавозимот, модификатсия) ва сертификатсияи гурӯҳи (намунаи ягонаи) маҳсулот ҷудо мешавад.

6. Зери мафҳуми навъи лавозимот - сохти лавозимоте, ки ба намуди силоҳ (силоҳи оташфишони суфтамил, силоҳи оташфишони дарозмил, силоҳи газӣ, силоҳи нурафкану садодиҳанда ва ғ.), ки барои тирпарронӣ нигаронида шуда, ҳамчунин дорои нишонаи молӣ, калибр, сохт ва намуди хосаи гилзаҳо ва истеҳсоли истеҳсолкунандаи мушаххас мебошад, фаҳмида мешавад.

7. Сертификатсияи намуди силоҳ дар сурати ба истеҳсолот ҷорӣ намудани намунаи нав ҳангоми истеҳсоли силсилавии маҳсулот, ҳамчунин дар сурати бори аввал ба ҳудуди Ҷумҳурии Тоҷикистон ворид намудани маҳсулоти истеҳсоли хориҷӣ дар асоси санҷишҳои зерин ба роҳ монда мешавад:

- мустаҳкамӣ ва бехатарии истифодабарӣ;

- мутобиқат ба талаботи тиббию биологӣ;

- мутобиқат ба талаботи криминалистӣ.

8. Ҳангоми сертификатсияи намуди силоҳ (навъи лавозимот) сертификати мутобиқат (минбаъд - сертификат) ба ҳар як намуди силоҳ (навъи лавозимот) дар алоҳидагӣ ба расмият дароварда мешавад. Дар ҳолати якҷоя пешниҳод намудани намуди силоҳ (навъи лавозимот) ё тағйирёбии (модификатсияи) он барои сертификатсия, барасмиятдарорӣ бо як сертификат роҳ дода мешавад.

9. Ҳангоми ба роҳ мондани истеҳсоли як намуди силоҳ (навъи лавозимот) аз тарафи истеҳсолкунандаҳои гуногун сертификатсия ба ҳар истеҳсолкунанда дар алоҳидагӣ гузаронида мешавад.

10. Дар ҳолати барои сертификатсия пешниҳод кардани намуди силоҳ (навъи лавозимот) ва қисмҳои асосии он (қисмҳои таркибии лавозимот) сертификати намуди силоҳ (навъи лавозимот) метавонад ба қисмҳои асосии силоҳ (қисмҳои таркибии лавозимот) ба расмият дароварда шавад.

11. Сертификатсияи гурӯҳи маҳсулот, ки аз хориҷи кишвар ба ҳудуди Ҷумҳурии Тоҷикистон бори дигар ворид гардидаанд, санҷишҳои зеринро дар бар мегирад:

- санҷиши мустаҳкамӣ ва бехатарии истифодабарӣ;

- санҷиши мутобиқат ба талаботи тиббию биологӣ дар озмоишгоҳҳои санҷишии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, ки аз ҷониби Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон (минбаъд - мақоми ваколатдор оид ба сертификатсия) аккредитатсия шудаанд;

- ҳаммонандкунӣ дар Раёсати ташхисию криминалистии Вазорати корҳои дохилии (минбаъд - РТК ВКД) Ҷумҳурии Тоҷикистон гузаронида мешавад.

12. Ҳангоми сертификатсия қонунҳои амалкунандаи Ҷумҳурии Тоҷикистон, стандартҳои байнидавлатӣ ва давлатӣ, ҳамчунин дигар ҳуҷҷатҳое, ки мутобиқи қонунгузории Ҷумҳурии Тоҷикистон нисбат ба маҳсулот талаботи ҳатмиро муқаррар менамоянд, истифода мешаванд.

13. Тамғабандӣ ва дастур оид ба истифодаи силоҳҳои истеҳсоли хориҷие, ки ба ҳудуди Ҷумҳурии Тоҷикистон ворид мегарданд, бояд ҳатман бо забони давлатӣ ё русӣ ба амал бароварда шаванд.

3. Тартиби сертификатсия

14. Сертификатсияи маҳсулот амалиёти зеринро дар бар мегирад:

- пешниҳоди дархост барои сертификатсия;

- қабули қарор аз рӯи дархост;

- интихоб, ҳаммонандкунии намунаҳо ва санҷиши онҳо;

- арзёбии истеҳсол;

- таҳлили натиҷаҳои бадастомада ва қабули қарор дар бораи додани (надодани) сетификат;

- додани сертификат ва иҷозатнома барои истифодаи нишонаи мутобиқат;

- амалӣ намудани санҷиши назоратии маҳсулоти сертификатсияшуда.

15. Ба таркиби ҳуҷҷатҳои ба дархост барои сертификатсия замимашаванда бояд дохил шаванд:

Барои силоҳ ва лавозимоти дар қаламрави Ҷумҳурии Тоҷикистон истеҳсолшуда:

- иҷозатнома барои истеҳсол;

- стандарт ё нусхаи бақайдгирифташудаи шартҳои техникӣ;

- таҳлили эътирозҳо;

- шиноснома ба силоҳ;

- сурати ранга;

- нақшаи (схемаи) васлкунӣ.

Барои силоҳ ва лавозимоти истеҳсоли хориҷӣ:

- рухсатнома барои воридот;

- иҷозатнома барои ҳуқуқи савдо;

- шартнома;

- нусхаи сертификатҳои сифати истеҳсолкунанда бо забони аслии худ ва тарҷумаи мутобиқати он ба забони давлатӣ ё русӣ (дар ҳолати мавҷудият);

- шиноснома ба силоҳ;

- сурати ранга;

- нақшаи (схемаи) васлкунӣ.

16. Интихоби маҳсулот барои санҷиш тибқи тартиби муқаррарнамудаи мақоми ваколатдор оид ба сертификатсия ба роҳ монда мешавад.

17. Санҷишҳои сертификатсионии маҳсулот дар озмоишгоҳҳои санҷишии бо салоҳияти техникӣ аккредитатсияшуда гузаронида мешаванд.

18. Вобаста ба натиҷаҳои санҷиш санад ба расмият дароварда мешавад. Санади санҷиши маҳсулот бояд дар озмоишгоҳҳои санҷишӣ дар ҷараёни мӯҳлати амали сертификат нигоҳдорӣ шуда, дар ҳолати зарурӣ бо талаби мақомоти ваколатдор оид ба сертификатсия, ки сертификати мазкурро додаст, пешниҳод гардад.

19. Ворид намудани маҳсулот аз тарафи истеҳсолкунанда ба ҳудуди Ҷумҳурии Тоҷикистон бо мақсадҳои техникӣ (барои санҷиш, тадқиқот ё истифода дар ҷараёни истеҳсолот) мутобиқи талаботи Қоидаҳои гардиши силоҳи хизматӣ ва ғайринизомӣ дар қаламрави Ҷумҳурии Тоҷикистон метавонад бе барасмиятдарории сертификат ба роҳ монда шавад.

20. Ҳангоми ба даст овардани натиҷаҳои мусбии санҷиши намуди (гурӯҳи) маҳсулот мақоми ваколатдор оид ба сертификатсия таҳлили протоколҳои санҷиш ва баҳодиҳии мутобиқати маҳсулотро ба талаботи муқарраргардида мегузаронад, сертификатро ба расмият дароварда мувофиқи тартиби муқарраргардида онро ба қайд мегирад. Мӯҳлати амали сертификатро мақоми ваколатдори давлатӣ оид ба сертификатсия бо назардошти мӯҳлати амали ҳуҷҷатҳои меъёрӣ барои маҳсулот, инчунин мӯҳлате, ки ба он истеҳсолот ва ё системаи сифат сертификатсия шудааст, на зиёда аз се сол муқаррар мекунад. Мӯҳлати истифодаи сертификат ба гурӯҳи маҳсулот ва маҳсулоти аз рӯи таркиб ба силоҳ монанд муқаррар карда намешавад.

21. Барои гардиши маҳсулот дар қаламрави Ҷумҳурии Тоҷикистон сертификати мутобиқат ҳуҷҷати асосӣ дониста мешавад.

22. Баъди ба анҷом расидани мӯҳлати сертификат аз нав ба расмият даровардани сертификат, пас аз санҷишҳои навбатии дар ҳуҷҷатҳои меъёрӣ муқарраршуда, бе гузаронидани санҷишҳои криминалӣ ба роҳ монда мешавад.

Барои ба расмият даровардани сертификати нав протоколҳои санҷишҳои назоратӣ, санадҳои таҳлили ҳолати истеҳсол ва ҳуҷҷатҳои дигаре, ки натиҷаҳои сертификатсияи гузашта ва санҷиши назоратиро тасдиқ менамоянд, асос дониста мешаванд.

Ҳангоми такроран сертификатсия намудани силоҳи пневматикӣ, сард, ҳаводиҳанда ва маҳсулоти аз рӯи таркиб ба силоҳ монанд барасмиятдарории сертификат дар асоси хулосаи қаблан ба маҳсулоти мазкур додашудаи РТК ВКД Ҷумҳурии Тоҷикистон бе гузаронидани санҷишҳои иловагӣ амалӣ мегардад.

23. Боздошти амали сертификат ё бекор намудани он аз тарафи мақоми ваколатдор оид ба сертификатсия дар ҳолатҳои зерин сурат мегирад:

- номутобиқати маҳсулоти истеҳсолшуда ба талаботи ҳуҷҷатҳои меъёрӣ вобаста ба мустаҳкамӣ ва бехатарии истифодабарӣ;

- аз тарафи дархосткунанда иҷро накардани талабот оид ба санҷишҳои сертификатсионӣ;

- тағйири ҳуҷҷатҳои меъёрӣ ё усули санҷиш вобаста ба талабот ба мустаҳкамӣ ва бехатарии истифодабарӣ;

- тағйири сохти силоҳ ё технологияи истеҳсолот, ки метавонад сабаби номутобиқатӣ ба талаботи бехатарӣ ва криминалистӣ шавад;

- муроҷиати хаттии нигоҳдорандаи нусхаи аслии сертификат.

24. Боздошти амали сертификат ё бекор намудани он тибқи тартиби муқаррарнамудаи мақоми ваколатдор оид ба сертификатсия ба амал бароварда мешавад.

Маълумот дар бораи боздошти амали сертификат ё бекор намудани он аз тарафи мақоми ваколатдор оид ба сертификатсия ба дархосткунанда, истифодабарандагон ва дигар иштирокчиёни манфиатдор пас аз 10 рӯзи қабули қарори дахлдор расонида мешавад.

25. Пардохти маблағи корҳои сертификатсионӣ (эътирофи сертификати мутобиқат) аз тарафи дархосткунанда новобаста ба натиҷаҳои сертификатсия амалӣ мегардад.

4. Санҷиши назоратӣ

26. Санҷиши назоратиро нисбат ба маҳсулоти сертификатсияшуда мақоми ваколатдор оид ба сертификатсия амалӣ менамояд.

Санҷиши назоратӣ дар давоми мӯҳлати амали сертификат дар шакли санҷишҳои нақшавӣ (мавсимӣ) ва ғайринақшавӣ гузаронида мешавад.

27. Санҷиши назоратии нақшавӣ нисбат ба маҳсулоти сертификатсияшуда на камтар аз як маротиба дар як сол гузаронида мешавад.

28. Санҷиши назоратии нақшавӣ дар назди истеҳсолкунанда сурат мегирад. Истеҳсолкунанда пешниҳоди ҳуҷҷатҳои заруриро ба ҷойҳои корӣ ва шароити корро барои экспертҳои мақомоти дахлдор таъмин менамояд.

29. Дар маҷмӯъ санҷиши назоратии нақшавӣ амалиёти зеринро пешбинӣ менамояд:

- санҷиши риояи талаботи стандартҳои давлатӣ ва дигар ҳуҷҷатҳои меъёрӣ ҳангоми гузаронидани санҷишҳои маҳсулот вобаста ба талаботи бехатарӣ;

- санҷиши мутобиқати ҳуҷҷатҳои техникӣ ба талаботи бехатарӣ;

- таҳлили протоколҳои санҷиш дар тамоми давраи амали сертификат;

- таҳлили тағйироти ба конструксия ва равандҳои техникии маҳсулот дохилгардида, ки метавонанд ба бехатарии маҳсулот таъсир расонанд;

- назорати таҷҳизоти санҷишӣ ва воситаҳои ченкунӣ барои гузаронидани санҷиши маҳсулот;

- назорати саривақти гузаронидани аттестатсияи таҷҳизот ва воситаҳои ченкунӣ (мавҷудияти реҷаҳо ва иҷроиши онҳо);

- назорати шикояту эътирозҳои истифодабарандагон оид ба талаботи бехатарии маҳсулоти сертификатсияшуда;

- назорати низоми таҳлилкунандаи эътирозҳо нисбат ба талаботи бехатарӣ, гузаронидани чорабиниҳо доир ба бартарафсозии сабабҳои камбудиҳо.

30. Санҷишҳои намунаҳои дар раванди санҷиши назорати интихобшуда дар озмоишгоҳҳои санҷишии аккредитатсияшуда тибқи талаботи ҳуҷҷатҳои меъёрӣ ба роҳ монда мешаванд.

31. Натиҷаҳои санҷиши назоратӣ дар санаде ба расмият дароварда мешавад, ки дар он ба натиҷаҳои санҷиши намунаҳо ва дигар санҷишҳо баҳогузорӣ карда шуда, хулосаи умумӣ оид ба ҳолатҳои истеҳсоли маҳсулоти сертификатшуда сабт гардидааст.

Санади мазкур дар мақоми ваколатдор оид ба сертификатсия нигоҳ дошта шуда, нусхаи он ба истеҳсолкунанда ва ташкилоте, ки дар раванди санҷиши назоратӣ иштирок кардаанд, равона карда мешавад.

32. Санҷиши назоратии ғайринақшавӣ аз тарафи мақоми ваколатдор оид ба сертификатсия дар ҳолати ба он ворид гардидани маълумот доир ба арзу шикояти истеъмолкунандагон нисбат ба бехатарии маҳсулоти сертификатсияшуда, ташкилоти савдо, мақомоти назоратии давлатӣ ё ҷамъиятӣ оид ба сифати маҳсулоти сертификатсияшуда, ҳамчунин дар ҳолати тағйирёбии намуди маҳсулот, ки ба мутобиқати талаботи криминалистии он таъсир мерасонанд, ба амал бароварда мешавад.

Санҷиши назоратии ғайринақшавӣ метавонад аз рӯйи намунаҳои маҳсулоте, ки аз фурӯшанда ва ё истеҳсолкунанда гирифта шудаанд, ба роҳ монда шавад.

33. Санҷиши назоратии намунаи маҳсулоти аз фурӯшанда гирифташуда дар шакли гузаронидани санҷиши намунаи маҳсулот ва мутобиқати он ба талаботи бехатарӣ дар ҳаҷми муқаррарнамудаи ҳуҷҷатҳои меъёрӣ барои сертификатсияи силоҳ амалӣ мегардад.

34. Санҷиши назоратӣ аз тарафи эксперти мақоми ваколатдор оид ба сертификатсия дар ҳолати зарурӣ бо ҷалби намояндагони РТК ВКД Ҷумҳурии Тоҷикистон ва дархосткунанда гузаронида мешавад. Фурӯшандаи маҳсулот бояд огоҳ карда шавад ва ҳуқуқ дорад дар раванди санҷиши назоратӣ иштирок намояд.

35. Ҳангоми аз фурӯшанда гирифтани намунаи маҳсулот эксперт ҳаммонандии маҳсулотро гузаронида, санадро оид ба интихоби намунаҳо омода менамояд, ки дар он маълумоти зерин нишон дода мешавад:

- намуди маҳсулот;

- ҷой доштани тамғаи (аломати) санҷиш;

- ҷой доштани аломатҳои мутобиқат дар силоҳ, бордон ва борҷома ё ҳуҷҷатҳои ба маҳсулот ҳамроҳшаванда;

- нишонаи шартии истеҳсолкунанда, рақами гурӯҳ, санаи истеҳсол, мӯҳлати кафолат ва санаи интихоби намунаҳо;

- суроғаи фурӯшанда, шароити нигоҳдории маҳсулот.

Санади мазкур аз тарафи иштироккунандагони интихоби намунаҳо ба имзо мерасад.

36. Мақоми ваколатдор оид ба сертификатсия барномаи санҷишро (дархостро) омода сохта, ба озмоишгоҳи санҷишӣ месупорад.