Тартиби пешбурд ва нашри Кадастри давлатии силоҳи хизматӣ, ғайринизомӣ ва лавозимоти ҷангии он

1. Муқаррароти умумӣ

1. Тартиби мазкур талаботи умумиро ба пешбурд ва нашри Кадастри давлатии силоҳи хизматӣ, ғайринизомӣ ва лавозимоти ҷангии он (минбаъд - Кадастр), ки дар қаламрави Ҷумҳурии Тоҷикистон барои гардиш иҷозат дода шудаанд, муқаррар мекунад.

2. Ҳама намудҳои силоҳи хизматӣ, ғайринизомӣ ва навъи лавозимоти ҷангии он, ки дар Ҷумҳурии Тоҷикистон истеҳсол карда мешаванд, ба қаламрави Ҷумҳурии Тоҷикистон ворид карда мешаванд, аз Ҷумҳурии Тоҷикистон содир карда мешаванд ва дорои сертификати мутобиқати намунаи муқарраргардида мебошанд, бояд ба Кадастр дохил карда шаванд.

Ба Кадастр маълумот дар бораи силоҳи сард ва силоҳи ҳаводиҳанда, ҳамчунин силоҳи ғайринизомии нусхаашон камшумор дар ҳудуди Ҷумҳурии Тоҷикистон сохташаванда, ба ҳудуди Ҷумҳурии Тоҷикистон воридшаванда ва аз ҳудуди Ҷумҳурии Тоҷикистон содиршаванда дохил карда намешаванд.

2. Пешбурди Кадастр

3. Кадастр аз фаслҳои зерин иборат аст:

а) силоҳи хизматӣ ва лавозимоти ҷангии он;

б) силоҳи ғайринизомӣ ва лавозимоти ҷангии он:

- силоҳи ғайринизомии истеҳсоли ватанӣ ва лавозимоти ҷангии он;

- силоҳи ғайринизомии истеҳсоли хориҷӣ ва лавозимоти ҷангии он.

4. Ба Кадастр маълумоти зерин дар бораи силоҳ ва лавозимоти ҷангии он дохил карда мешаванд:

а) истеҳсоли ватанӣ:

- номгӯи намуди силоҳ ва навъи лавозимоти ҷангӣ;

- нишондиҳандаҳои асосии техникии силоҳ ва лавозимоти ҷангии он;

- номи тайёркунанда ва истеҳсолкунанда;

- ишораи стандарт ва ё шартҳои техникӣ;

- сурати рангаи намуна.

б) истеҳсоли хориҷӣ:

- номгӯи намуди силоҳ ва навъи лавозимоти ҷангӣ;

- нишондиҳандаҳои асосии техникии силоҳ ва лавозимоти ҷангии он;

- номи давлат ва корхонаи истеҳсолкунандаи силоҳ ва лавозимоти ҷангӣ;

- сурати рангаи намуна.

Номгӯи нишондиҳандаҳои асосии техникии (тавсифҳои) силоҳ ва лавозимоти ҷангии он, ки ба Кадастр дохил карда мешаванд, аз тарафи Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон (минбаъд - Агентии Тоҷикстандарт) дар мувофиқа бо Вазорати корҳои дохилии Ҷумҳурии Тоҷикистон муайян карда мешавад.

5. Ба Кадастр дохил намудани маълумот дар бораи силоҳи хизматӣ, ғайринизомӣ ва лавозимоти ҷангии он дар асоси натиҷаҳои сертификатсияи ҳатмии онҳо ё эътирофи сертификатҳои мутобиқат аз рӯи қоидаҳои стандартикунонии байнидавлатӣ бе гузаронидани санҷишҳои иловагӣ ва хулосаи Раёсати ташхисию криминалистии Вазорати корҳои дохилии (минбаъд - РТК ВКД) Ҷумҳурии Тоҷикистон гузаронида мешавад.

Ҳама намуди силоҳи хизматӣ, ғайринизомӣ ва лавозимоти ҷангии он, ки дар Ҷумҳурии Тоҷикистон истеҳсол карда мешаванд, ба қаламрави Ҷумҳурии Тоҷикистон ворид карда мешаванд ва аз Ҷумҳурии Тоҷикистон содир карда мешаванд, инчунин маҳсулоти аз рӯи таркиб ба силоҳ монанд, ба истиснои силоҳи арзиши фарҳангидошта ва нусхаҳои (репликаҳои) силоҳ, бояд намунаи сертификати мутобиқати дар Ҷумҳурии Тоҷикистон муқарраргардидаро дошта бошанд.

6. Агентии Тоҷикстандарт мақомотро оид ба сертификатсияи силоҳи хизматӣ, ғайринизомӣ ва лавозимоти ҷангии он (минбаъд-мақом оид ба сертификатсия) ва озмоишгоҳҳоеро, ки аз рӯи нишондиҳандаҳои устуворӣ ва бехатарии силоҳ, мутобиқати он ба талаботи тиббию биологӣ ва моддаҳои ашковару барангезонанда ва мутобиқати силоҳ ва лавозимоти ҷангии он ба талаботи криминалистӣ санҷишҳои сертификатсионӣ мегузаронанд, аккредитатсия менамояд.

Талаботи техникӣ ва тарзҳои санҷиши силоҳу лавозимоти ҷангии он тибқи стандартҳои амалкунанда ва шартҳои техникӣ муқаррар карда мешаванд.

7. Ба Кадастр дохил намудани намуди силоҳ (навъи лавозимоти ҷангӣ) дар асоси дархости хаттии роҳбари шахси ҳуқуқии силоҳу лавозимоти ҷангиро истеҳсолкунанда (истеҳсоли ватанӣ) ва ё силоҳу лавозимоти ҷангии истеҳсоли хориҷии ба қаламрави Ҷумҳурии Тоҷикистон воридкунанда амалӣ карда мешавад.

Дархосткунанда бояд ба Агентии Тоҷикстандарт (мақом оид ба сертификатсия) маълумоти дар банди 4 тартиби мазкур нишондодашуда, инчунин ҳуҷҷатҳои тасдиқкунандаи мутобиқати силоҳи (лавозимоти ҷангии) пешниҳодшударо тибқи талаботи муқарраргардида ва нақшаи (схемаи) васлкунии силоҳ (лавозимоти ҷангӣ) ва шиносномаи силоҳро (лавозимоти ҷангиро) пешниҳод намояд.

Барои гузаронидани санҷишҳои сертификатсионӣ намунаи силоҳ (лавозимоти ҷангӣ) пешниҳод карда мешавад.

Барои гузаронидани корҳо оид ба эътирофи сертификати мутобиқат аз рӯи қоидаҳои стандартонии байнидавлатӣ бе гузаронидани санҷишҳои иловагӣ сертификати мутобиқати давлатҳои содиркунанда пешниҳод карда мешавад.

8. Дар асоси натиҷаҳои сертификатсия ё эътирофи сертификатҳои мутобиқат санҷиши маълумоти пешниҳодгардида, ҳуҷҷатҳо, намунаи силоҳ (лавозимоти ҷангӣ) ва хулосаи РТК ВКД Ҷумҳурии Тоҷикистон дар бораи мансуб донистани маҳсулот ба силоҳи хизматӣ, ғайринизомӣ (лавозимоти ҷангӣ) ё маҳсулоти аз рӯи таркиб ба силоҳ монанд қарор қабул карда шуда, ба дархосткунанда сертификати мутобиқати намунааш муқарраргардида дода мешавад.

РТК ВКД Ҷумҳурии Тоҷикистон тибқи дархости хаттии Агентии Тоҷикстандарт хулоса пешниҳод менамояд, ки дар он бояд маълумоти зерин дарҷ гардад:

- номгӯи намуди силоҳ (навъи лавозимоти ҷангӣ);

- таъиноти истифодабарии намуди силоҳ (навъи лавозимоти ҷангӣ);

- нишондиҳандаҳои асосии техникии силоҳ (навъи лавозимоти ҷангӣ);

- номгӯи давлат ва корхонаи истеҳсолкунандаи силоҳ ва лавозимоти ҷангӣ;

- маълумоти иловагӣ.

Сертификати мутобиқат барои гардиши силоҳ, лавозимоти ҷангӣ ё маҳсулоти аз рӯи таркиб ба силоҳ монанд дар қаламрави Ҷумҳурии Тоҷикистон, ба истиснои силоҳ ва лавозимоти ҷангие, ки то қабули тартиби мазкур дар гардиш буданд ва барои дохил намудани намуди силоҳ ва навъи лавозимоти ҷангӣ ба Кадастр асос мебошад.

9. Агентии Тоҷикстандарт (мақом оид ба сертификатсия) ба намуди силоҳ (навъи лавозимоти ҷангӣ) тибқи банди 16 тартиби мазкур парванда омода месозад, Феҳристи намудҳои силоҳи хизматӣ, ғайринизомӣ ва лавозимоти ҷангии онро (минбаъд - Феҳрист) барои ба Кадастр дохил ва аз Кадастр хориҷ намудани маълумот дар бораи онҳо таҳия мекунад ва ба намуди силоҳ (навъи лавозимоти ҷангӣ) рақами бақайдгирии Феҳристро медиҳад.

Маълумот дар бораи рад намудани дохилкунии намуди силоҳ (навъи лавозимоти ҷангӣ) ба Феҳрист ва зарурати боздоштани амали сертификати мутобиқат дар муддати 10 рӯзи баъди қабули қарор ба тариқи хаттӣ ба мақомот оид ба сертификатсия ирсол карда мешавад.

Тартиби таҳия ва пешбурди Феҳрист аз тарафи Агентии Тоҷикстандарт муайян карда мешавад.

10. Феҳрист ҳар сол аз тарафи Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон дар якҷоягӣ бо Вазорати корҳои дохилии Ҷумҳурии Тоҷикистон тасдиқ мегардад.

11. Кадастр аз тарафи Агентии Тоҷикстандарт дар сабткунандаҳои магнитӣ дар асоси Феҳрист пеш бурда мешавад. Тағйирот ба Кадастр аз тарафи Агентии Тоҷикстандарт дар давоми 3 моҳи баъди тасдиқи Феҳрист ворид карда мешавад.

12. Маблағи корҳо барои ворид намудани намуди силоҳ (навъи лавозимоти ҷангӣ) ба Кадастр аз тарафи дархосткунанда пардохт карда мешавад.

3. Нашри Кадастр

13. Кадастр аз тарафи Агентии Тоҷикстандарт дар асоси Феҳрист дар сабткунандаҳои магнитӣ нашр ва паҳн карда мешавад. Тағйироти ба Кадастр дохилкардашуда тибқи тартиби аз тарафи Агентии Тоҷикстандарт муқарраргардида ба чоп расонида мешаванд.

14. Кадастр дар панҷ сол як маротиба нашр карда мешавад.

15. Нусхаи аслии Кадастр, тағйиру иловаҳо ба он, инчунин ҳуҷҷатҳо дар бораи ворид намудани намудҳои силоҳ (навъҳои лавозимоти ҷангӣ) ба Кадастр дар Агентии Тоҷикстандарт нигоҳ дошта мешаванд.

16. Ба парвандаи намуди силоҳ (навъи лавозимоти ҷангӣ) бояд ҳуҷҷатҳои зерин дохил шаванд:

1) Барои силоҳи (лавозимоти ҷангии) дар Ҷумҳурии Тоҷикистон истеҳсолшаванда:

- рӯйхати таркибии Парванда;

- иҷозатнома барои истеҳсоли силоҳ (лавозимоти ҷангӣ);

- дархост барои сертификатсия;

- қарор оид ба дархост барои сертификатсия;

- стандарт ё нусхаи ба қайд гирифташудаи шартҳои техникӣ;

- шиноснома ба силоҳ (дастур барои истифодабарӣ) бо забони давлатӣ ё русӣ;

- сурати рангаи силоҳ (лавозимот);

- нақшаи васлкунӣ (схемаи васл);

- ҳуҷҷатҳои тасдиқкунандаи мутобиқати силоҳи сертификатсияшуда ба талаботи муқарраргардида (санади интихоби намунаҳо, протоколҳо (санадҳои санҷиш);

- қарор дар бораи додани сертификати мутобиқат;

- нусхаи сертификати мутобиқат, ки дар Агентии Тоҷикстандарт (мақом оид ба сертификатсия) ба тасдиқ расидааст.

2) Барои силоҳи (лавозимоти ҷангии) истеҳсоли хориҷӣ:

- рӯйхати таркибии Парванда;

- рухсатнома барои воридоти силоҳ (лавозимоти ҷангӣ);

- нусхаи шартнома;

- дархост барои сертификатсия ё эътирофи сертификати мутобиқат;

- қарор оид ба дархост барои сертификатсия ё эътирофи сертификати мутобиқат;

- нусхаи сертификатҳои сифатии истеҳсолкунанда ва сертификатҳои мутобиқати мамлакате, ки сертификатсияро гузаронидааст, бо забони аслӣ ва тарҷумаи саҳеҳи он ба забони давлатӣ ва ё русӣ (ҳангоми мавҷуд будан);

- шиноснома ба силоҳ (дастур барои истифодабарӣ) бо забони давлатӣ ё русӣ;

- сурати рангаи силоҳ (лавозимот);

- нақшаи васлкунӣ (схемаи васл) - ҳангоми мавҷуд будан;

- ҳуҷҷатҳои тасдиқкунандаи мутобиқати силоҳи сертификатсияшуда ба талаботи муқарраргардида (санади интихоби намунаҳо, протоколҳо (санадҳои санҷиш);

- қарор дар бораи додан ё эътироф намудани сертификати мутобиқат;

- нусхаи сертификати мутобиқат, ки дар Агентии Тоҷикстандарт (мақом оид ба сертификатсия) тасдиқ шудааст.