Созишнома оид ба Шӯрои туризми давлатҳои аъзои Иттиҳоди Давлатҳои Мустақил

Ҳукуматҳои давлатҳои аъзои Иттиҳоди Давлатҳои Мустақил, ки минбаъд Тарафҳо номида мешаванд, бо мақсади татбиқи Созишнома оид ба ҳамкорӣ дар соҳаи туризм аз 23-юми декабри соли 1993,

ба рушди минбаъдаи ҳамкорӣ дар соҳаи туризм аҳамияти муҳим дода,

бо саъю кӯшиши ҳамоҳангсозии ҳамкориҳо оид ба самтҳои асосии фаъолияти туристӣ,

бо дарки он, ки рушди чунин ҳамкориҳо манфиатбахши мардуми давлатҳои аъзои Иттиҳоди Давлатҳои Мустақил мебошад,

ба мувофиқаи зайл расиданд:

Моддаи 1

Тарафҳо ҷиҳати ҳамоҳангсозии ҳамкорӣ дар соҳаи туризм Шӯрои туризми давлатҳои аъзои Иттиҳоди Давлатҳои Мустақил (минбаъд дар матн - Шӯро)-ро аз ҳисоби роҳбарияти мақомоти дахлдори ҳокимияти давлатии давлатҳои аъзои ИДМ таъсис медиҳанд.

Моддаи 2

Шӯро масъалаҳои асосиро баррасӣ намуда, самтҳои афзалиятнок ва шаклҳои ҳамкориро дар соҳаи туризм муайян месозад ва бо тартиби муқарраргардида ба баррасии Шӯрои сарони ҳукуматҳои ИДМ пешниҳодоте, ки ба ҳалли масъалаҳои мушаххас дар соҳаи туризм равона шудаанд, манзур менамояд.

Моддаи 3

Шӯро фаъолияти худро дар асоси Низомнома дар бораи Шӯрои туризми давлатҳои аъзои Иттиҳоди Давлатҳои Мустақил, ки қисми ҷудонопазири Созишномаи мазкур мебошад, амалӣ месозад.

Моддаи 4

Созишномаи мазкур ба ҳуқуқ ва ӯҳдадориҳои Тарафҳо, ки аз дигар шартномаҳои байналмилалӣ бармеоянд ва давлатҳояшон иштирокчии онҳо мебошанд, дахолат мекунад.

Моддаи 5

Бо ризоияти Тарафҳо ба Созишномаи мазкур тағйиру иловаҳое дароварда мешаванд, ки бо протоколи дахлдор ба расмият дароварда шуда, қисми ҷудонопазири он мебошанд.

Моддаи 6

Масъалаҳои баҳснок байни Тарафҳо, ки ҳангоми истифода ва тафсири Созишномаи мазкур ба вуҷуд меоянд, бо роҳи машварат ва гуфтушуниди Тарафҳои манфиатдор ва ё тавассути тартиби дигари мувофиқашудаи Тарафҳо, ҳаллу фасл мешаванд.

Моддаи 7

Созишномаи мазкур пас аз 30 рӯзи аз санаи гирифтани огоҳиномаи сеюм аз ҷониби маҳфуздоранда оид ба иҷрои расмиёти дохилидавлатӣ аз тарафи имзокунандагони он, ки барои мавриди амал қарор додани он зарур аст, эътибор пайдо мекунад.

Барои Тарафҳое, ки расмиёти дохилидавлатиро дертар иҷро кардаанд, Созишномаи мазкур пас аз 30 рӯз аз санаи гирифтани ҳуҷҷатҳои дахлдор аз ҷониби маҳфуздоранда, эътибор пайдо мекунад.

Моддаи 8

Созишномаи мазкур пас аз мавриди амал қарор гирифтанаш барои ҳамроҳшавии ҳар кадом давлат бо роҳи пешниҳоди ҳуҷҷат ба маҳфуздоранда дар бораи ҳамроҳшавӣ, кушода аст.

Барои давлати аъзои ИДМ Созишномаи мазкур пас аз 30 рӯз аз санаи гирифтани ҳуҷҷат аз ҷониби маҳфуздоранда дар бораи ҳамроҳшавӣ, мавриди амал қарор мегирад.

Барои давлате, ки иштирокчии ИДМ маҳсуб намеёбад Созишномаи мазкур пас аз 30 рӯз аз санаи лаҳзаи гирифтани огоҳиномаи охирин аз ҷониби маҳфуздоранда дар бораи розигии имзокунандагони он ва ё давлатҳои ба он ҳамроҳшаванда, мавриди амал қарор мегирад.

Моддаи 9

Созишномаи мазкур ба мӯҳлати номуайян баста мешавад. Ҳар яке аз Тарафҳо ҳақ дорад, ки бо ирсоли огоҳиномаи хаттӣ ба маҳфуздоранда оид ба азми худ дар мӯҳлати на дертар аз 6 моҳ пеш аз баромадан ва бо танзими ӯҳдадориҳои молиявӣ ва дигаре, ки дар вақти амали Созишнома ба вуҷуд омадаанд, аз ҳамин Созишнома барояд.

Дар шаҳри Ашқобод 30 майи соли 2012 дар як нусхаи аслӣ бо забони русӣ иҷро гаштааст. Нусхаи аслӣ дар Кумитаи иҷроияи Иттиҳоди Давлатҳои Мустақил нигоҳ дошта мешавад, ки ба ҳар кадом давлати имзокунандаи Созишномаи мазкур нусхаи тасдиқшудаи онро ирсол менамояд.