КОНВЕНСИЯИ БАЙНАЛМИЛАЛӢ ОИД БА ҲИФЗИ НАВЪҲОИ НАВИ РАСТАНИҲО АЗ 1 МАЙИ СОЛИ 1997

БОБИ I МАФҲУМҲО

Моддаи 1 Мафҳумҳо

Барои мақсадҳои Санади мазкур:

(i) "Конвенсияи мазкур" маънои Конвенсияи байналмилалӣ оид ба ҳифзи навъҳои нави растаниҳо аз соли 1991-ро дорад;

(ii) "Санади солҳои 1961/1972" маънои Конвенсияи байналмилалӣ оид ба ҳифзи навъҳои нави растанӣ аз 2 декабри соли 1961, бо дарназардошти тағйироти бо Санади иловагӣ аз 10 ноябри соли 1971 воридгардидаро дорад;

(iii) "Санади соли 1978" маънои Конвенсияи байналмилалӣ оид ба ҳифзи навъҳои нави растаниро аз 23 октябри соли 1978 дорад;

(iv) "селексионер" маънои зерин дорад:

- шахсе, ки навъро баровардааст ё ошкор кардааст,

- шахсе, ки барои шахси дар боло зикргардида корфармо мебошад, ё шахсе, ки дар ҳолатҳои пешбининамудаи қонунгузории Тарафи дахлдори аҳдкунанда иҷрои корро супоридааст, ё

- вобаста ба ҳолати мушаххас вориси ҳуқуқии шахси аввал ё дуюми дар боло зикргардида;

(v) "ҳуқуқи селексионер" маънои ҳуқуқи селексионерро дорад, ки дар Конвенсияи мазкур пешбинӣ гардидааст;

(vi) "навъ" маънои гурӯҳи растаниҳоро дар доираи таксонҳои поёнтарин аз таксонҳои маълумро дорад, ки сарфи аз он, ки пурра ҷавобгӯи шартҳои додани ҳуқуқи селесионер ҳаст ё не:

- метавонад бо дараҷаи зуҳуроти сифатҳое муайян карда шавад, ки натиҷаи татбиқи генотипи мазкур ё мувофиқати генотипҳо мебошад,

- аз ҳар гурӯҳи дигари растаниҳо бо дараҷаи зуҳуроти лоақал яке аз ин аломатҳо фарқ кунад, ва

- аз нуқтаи назари муносиб будани он барои бетағйир истеҳсол намудани растаниҳои бутуни навъ ҳамчун як чизи том баррасӣ шуда метавонад;

(vii) "Тарафи аҳдкунанда" маънои давлат ё ташкилоти байниҳукуматиро дорад, ки иштирокчии Конвенсияи мазкур мебошад;

(viii) "қаламрав" дар мавриди Тарафи аҳдкунанда, агар Тарафи аҳдкунанда давлат бошад, маънои қаламрави ин давлат ва агар Тарафи аҳдкунанда ташкилоти байниҳукуматӣ бошад, маънои каламраверо дорад, ки дар он шартномаи таъсисдодаи ин ташкилоти байниҳукуматӣ амал мекунад;

(iх) "мақом" маънои мақоми дар Моддаи 30 (1) (ii) зикргардидаро дорад;

(х) "Иттиҳод" маънои Иттиҳоди ҳифзи навъҳои нави растаниҳоро дорад, ки бо Санади соли 1961 таъсис ёфта, минбаъд дар Санади соли 1971, Санади соли 1978 ва Конвенсияи мазкур зикр гардидааст,

(хi) "узви Иттиҳод" маънои давлати иштирокчии Санади солҳои 1961/1972 ё Санади соли 1978 ва ё Тарафи аҳдкунандаро дорад.

БОБИ II ӯҲДАДОРИҲОИ УМУМИИ ТАРАФҲОИ АҲДКУНАНДА

Моддаи 2 ӯҳдадории асосии Тарафҳои аҳдкунанда

Ҳар Тарафи аҳдкунанда ҳукуқи селексионеронро пешкаш ва ҳифз менамояд.

Моддаи 3 Ҷинсу намудҳое, ки ҳифз мешаванд

(1) Давлатҳое, ки аллакай узви Иттиҳод мебошанд] Ҳар Тарафи аҳдкунанедае, ки бо муқаррароти Санади солҳои 1961/1972 ё Санади соли 1978 алоқаманд аст, муқаррароти Конвенсияи мазкурро:

(i) аз санае, ки он бо муқаррароти Конвенсияи мазкур нисбати ҳамаи ҷинсу намудҳои растаниҳое алоқаманд гардидааст, ки нисбати онҳо дар санаи мазкур муқаррароти Санади солҳои 1961/1972 ё Санади соли 1978-ро татбиқ менамояд, ва

(ii) дераш бо гузашти панҷ сол аз санаи зикргардида - нисбати ҳамаи ҷинсу намудҳои растаниҳо татбиқ менамояд.

(2) [ Аъзои нави Иттиҳод ] Ҳар Тарафи аҳдкунандае, ки бо муқаррароти Санади солҳои 1961/1972 ё Санади соли 1978 алоқаманд нест, муқаррароти Конвенсияи мазкурро:

(i) аз санае, ки он бо муқаррароти Конвенсияи мазкур алоқаманд мегардад, лоақал нисбати 15 ҷинсу намудҳои растаниҳо ва

(ii) дераш бо гузашти 10 сол аз санаи зикргардида нисбати ҳамаи ҷинсу намудҳои растаниҳо татбиқ менамояд.

Моддаи 4 Низоми бо қонунгузории миллӣ муқарраршаванда

(1) [ Низом ] Дар мавриди додан ва ҳифзи ҳуқуқи селексионерон бидуни расонидани зиён ба ҳуқуқҳои дар Конвенсияи мазкур зикргардида шаҳрвандони Тарафи аҳдкунанда, инчунин шахсони воқеие, ки дар қаламрави Тарафи аҳдкунанда ҷои истиқомат доранд, ё шахсони ҳуқуқии дар ин қаламрав қарордошта дар қаламрави ҳар Тарафи аҳдкунандаи дигар аз ҳамон низоми ҳукуқие бархӯрдор хоҳанд буд, ки тибқи қонунгузории ҳар чунин Тарафи аҳдкунанда ба шаҳрвандони худи он дода шудаанд ё дода шуда метавонанд, ба шарте ки шаҳрвандон ва шахсоии воқеию ҳуқуқии зикргардида шарту расмиётеро, ки Тарафи дигари зикргардида барои шаҳрвандони худ муайян кардааст, риоя намоянд.

(2) [ "Шаҳрвандон" ] Барои мақсадҳои банди пешина истилоҳи "шаҳрвандон" агар Тарафи аҳдкунанда давлат бошад, маънои шаҳрвандони ин давлат ва агар Тарафи аҳдкунанда ташкилоти байниҳукуматӣ бошад, маънои шаҳрвандони давлатҳои аъзои ин ташкилотро дорад.

БОБИ III ШАРТҲОИ ДОДАНИ ҲУҚУҚИ СЕЛЕКСИОНЕР

Моддаи 5 Шартҳои ҳифз

(1) [Меъёрҳои пешниҳодшаванда] Ҳуқуқи селексионер дар он сурат дода мешавад, ки агар навъ:

(i) нав,

(ii) фарқкунанда,

(iii) ҳамҷинс ва

(iv) устувор бошад.

(2) [ Шартҳои дигар ] Додани ҳуқуқи селексионер аз шартҳои иловагӣ ё фарқкунанда аз шартҳои дар боло зикргардида вобаста буда наметавонад, агар навъ мутобиқи муқаррароти Моддаи 20 номгузорӣ шуда, дархосткунанда ҳамаи расмиёти пешбининамудаи қонунгузории Тарафи аҳдкунандаеро, ки ба мақоми салоҳиятдори он дархост пешниҳод шудааст, аз ҷумла пардохти боҷи заруриро риоя карда бошад.

Моддаи 6 Навоварӣ

(1) [ Меъёрҳо ] Навъ дар сурате нав дониста мешавад, ки агар то санаи пешниҳоди дархост барои додани ҳуқуқи селексионер маводи тухмӣ ё растании ин навъ фурӯхта нашуда бошад ё ба тариқи дигар аз тарафи селексионер ё бо розигии ӯ ба шахсони дигар барои истифодаи навъ дар қаламравҳои зерин супорида нашуда бошад:

(i) дар қаламрави Тарафи аҳдкунандае, ки ба мақоми салоҳиятноки он дархост пешниҳод гардидааст, то як сол пеш аз ин сана, ва

(ii) дар қаламрави дигар, на дар қаламрави Тарафи аҳдкунандае, ки ба мақоми салоҳиятноки он дархост пешниҳод гардидааст, то чор сол пеш, дар мавриди дарахт ё ангур бошад, то шаш сол пеш аз санаи зикргардида.

(2) [ Навъи ба қарибӣ баровардашуда ] Агар Тарафи аҳдкунанда нисбати ҷинсу намудҳои растаниҳое, ки то ин замон нисбати онҳо Конвенсияи мазкур ё Санади дигари қаблиро истифода намекард, Конвенсияи мазкурро татбиқ намояд, пас он метавонад навъи ба қарибӣ баровардашударо, ки то санаи паҳн гардидани чунин муҳофизат мавҷуд буд, ҳатто дар ҳолатҳое, ки фурӯш ё ба шахсони дигар додани он, тавре дар ин банд зикр гардидааст, то мӯҳлатҳои муқаррарнамудаи ин банд ҷой дошта бошад ҳам, ҳамчун навъи қонеъкунандаи шартҳои навоварӣ, ки тавсифи он дар банди (1) оварда шудааст, арзебӣ намояд.

(3) [ Маънои истилоҳи "қаламрав" дар баъзе ҳолатҳо ] Барои мақсадҳои банди (1) ҳамаи Тарафҳои аҳдкунандае, ки давлатҳои аъзои ҳамон як ташкилоти байниҳукуматӣ мебошанд, агар инро қоидаҳои ин ташкилот талаб намояд, бо мақсади баробар кардани амалиёти дар қаламрави давлатҳои аъзои ин ташкилот иҷрошуда ба амалиёте, ки дар қаламрави худи онҳо анҷом дода мешавад, метавонанд амалиёти худро муштарак анҷом диҳанд ва онҳо дар ин хусус ба тариқи дахлдор Котиби генералиро огоҳ месозанд.

Моддаи 7 Фарқият

Навъ ҳамон вақт фарқкунанда дониста мешавад, ки аз ҳар навъи дигаре, ки то лаҳзаи пешниҳоди дархост маълум буд, баръало фарқ кунад. Чунончи, пешниҳоди дархост барои додани ҳуқуқи селексионер ё ба феҳристи расмии навъҳо дохил кардани навъи дигар дар ҳар кишвар ин навъро аз санаи пешниҳоди дархост ба ҳамагон маълум месозад, ба шарте ки дар натиҷаи пешниҳоди ин дархост вобаста ба ҳолати мушаххас ҳуқуқи селексионер дода шуда бошад ва ё навъ ба феҳристи зикргардида дохил карда шуда бошад.

Моддаи 8 Ҳамҷинсӣ

Навъ ҳамон вақт ҳамҷинс дониста мешавад, ки агар бо дарназардошти хусусиятҳои зиёд кардани насли он, растаниҳои ин навъ аз рӯи аломатҳои асосии худ ба қадри кофӣ якхела бошанд.

Моддаи 9 Устуворӣ

Навъ ҳамон вақт устувор дониста мешавад, ки агар аломатҳои асосии он пас аз зиёдкунии чандинкаратаи насли он ва ё дар мавриди силсилаи махсуси зиёдкунӣ дар охири ҳар чунин силсила бетағйир боқӣ монанд.

БОБИ IV ДАРХОСТ БАРОИ ДОДАНИ ҲУҚУҚИ СЕЛЕКСИОНЕР

Моддаи 10 Пешниҳоди дархост

(1) [ Маҳалли пешниҳоди дархости аввал] Селексионер метавонад Тарафи аҳдкунандаеро интихоб намояд, ки ба мақоми салоҳиятдори он дархости аввали худро барои ҳуқуқи селексионер пешниҳод кардан мехоҳад.

(2) [ Вақти пешниҳоди дархостҳои минбаъда ] Селексионер аз ҷониби мақоми салоҳиятдори Давлати аҳдкунандае, ки ӯ дархости аввали худро пешниҳод карда буд, ба ӯ додани ҳуқуқи селексионерро интизор нашуда, метавонад дархостро барои додани ҳуқуқи селексионер ба мақомоти салоҳиятдори Давлатҳои дигари аҳдкунанда пешниҳод намояд.

(3) [ Мустақилияти ҳифз ] Ҳеҷ яке аз Тарафҳои аҳдкунанда дар асоси он, ки ҳифзи ҳамин навъ талаб нашуда буд ё ҳифзи он дар ҳар давлат ё ташкилоти байниҳукуматии дигар рад шуда буд ё мӯҳлати амали он гузаштааст, наметавонад додани ҳуқуқи селексионерро рад кунад ё мӯҳлати амали онро маҳдуд созад.

Моддаи 11 Ҳуқуқи афзалият

(1) [ Ҳуқуқ; мӯҳлати он ] Селексионере, ки мувофиқи тартиби муқарраргардида барои таъмини ҳифзи навъ дар яке аз Давлатҳои аҳдкунанда дархост пешниҳод кардааст ("дархости аввал"), дар давоми дувоздаҳ моҳ дар мавриди пешниҳоди дархост ба мақоми салоҳиятдори ҳар Давлати аҳдкунанда барои додани ҳуқуқи селексионер ("дархости минбаъда") ҳуқуқи афзалият дорад. Ин мӯҳлат аз санаи пешниҳоди дархости аввал ҳисоб карда мешавад. Санаи пешниҳоди дархост ба ин мӯҳлат дохил намешавад.

(2) [ Талаб кардани ҳуқуқи афзалият ] Селексионер барои истифода аз ҳуқуқи афзалият дар дархости минбаъда дар хусуси афзалияти дархости аввал иброз медорад. Мақоми салоҳиятдоре, ки ба он дархости минбаъда пешниҳод шудааст, метавонад талаб намояд, ки селексионер дар давоми на дертар аз се моҳи пас аз санаи пешниҳоди дархости минбаъда нусхаҳои аз ҷониби мақоми ба он дархости аввал пешниҳодшуда тасдиқгардидаи маводи марбут ба дархости аввал, намунаҳо ва далелҳои дигари тасдиқкунандаи онро, ки ин навъи мавзӯи ҳарду дархост буда ҳамон як навъ аст, пешкаш намояд.

(3) [ Ҳуҷҷатҳо ва мавод ] Ба селексионер имконият дода мешавад, ки дар давоми ду соли пас аз гузаштани мӯҳлати афзалият ва дар ҳолати рад гардидан ё бозхондани дархости аввал, дар давоми мӯҳлати кофӣ пас аз чунин радкунӣ ё бозхонд ба мақоми салоҳиятдори Давлати аҳдкунандае, ки ба он дархости минбаъда пешниҳод шудааст, ҳар иттилоот, ҳуҷҷатҳо ё маводи заруриеро, ки барои мақсадҳои экспертизаи пешбининамудаи Моддаи 12, қонунгузории ин Давлати аҳдкунанда лозиманд, пешниҳод намояд.

(4) [ Амалҳое, ки дар давоми мӯҳлати афзалият ҷой доранд ] Амалҳо, ба монанди пешниҳоди дархости дигар, ё интишор ва ё истифодаи навъи наве, ки мавзӯи дархости аввал мебошад, агар онҳо дар давоми мӯҳлати пешбининамудаи банди (1) ҷой дошта бошанд, барои рад кардани дархости минбаъда асос шуда наметавонанд. Чунин амалҳо ҳамчунин барои ба вуҷуд омадани ягон ҳуқуқи шахсони сеюм асос шуда наметавонанд.

Моддаи 12 Экспертизаи дархост

Қарор дар бораи додани ҳуқуқи селексионер пас аз гузаронидани экспертиза ҷиҳати муайян намудани мутобиқат ба шартҳои пешбининамудаи Моддаҳои 5-9 қабул карда мешавад. Дар ҷараёни экспертиза мақоми салоҳиятдор метавонад навъро парвариш намояд ё озмоишҳои дигари зарурӣ гузаронад, парвариши навъ ё гузаронидани озмоишҳои дигари заруриро талаб намояд ва ё натиҷаҳои озмоишҳои гузаронидашударо ба инобат гирад. Барои мақсадҳои чунин экспертиза мақоми салоҳиятдор метавонад аз селексионер пешниҳоди ҳамаи иттилоот, ҳуҷҷатҳо ё маводи заруриро талаб намояд.

Моддаи 13 Ҳифзи муваққатӣ

Дар давоми аз лаҳзаи пешниҳод ё интишори дархост барои додани ҳуқуқи селексионер то додани чунин ҳукуқ ҳар Тарафи аҳдкунанда ҷиҳати ҳифзи манфиатҳои селексионер тадбирҳо меандешад. Дар партави чунин тадбирҳо дорандаи ҳуқуқи селексионер барои лоақал гирифтани ҷубронпулии муносиб аз ҳар шахс барои зарари дар давоми давраи зикргардида ба ӯ расонидашуда дар натиҷаи бе розигии ӯ анҷом додани ҳар гуна амалҳои дар Моддаи 14 зикргардида, ҳуқуқ дорад, ба монанди он, ки ҳуқуқи селексионер дода шуда бошад. Тарафи аҳдкунанда метавонад муқаррар намояд, ки тадбирҳои мазкур танҳо нисбати шахсоне андешида мешаванд, ки онҳоро дар хусуси пешниҳоди дархост огоҳ намудааст.

БОБИ V ҲУҚУҚИ СЕЛЕКСИОНЕР

Моддаи 14 Андозаи ҳуқуқи селексионер

(1) [Амалҳо дар мавриди маводи тухмӣ]

(а) Бо дарназардошти муқаррароти Моддаҳои 15 ва 16, амалҳои зерин дар мавриди маводи тухмии навъи ҳифзшававда иҷозати селексинерро талаб менамоянд:

(i) истеҳсол ва такрористеҳсол (афзоиш);

(ii) бо мақсади афзоиш ба ҳолати зарурӣ омода сохтан,

(iii) ба фурӯш баровардан;

(iv) фурӯш ё ба муомилоти дигари тиҷоратӣ баровардан;

(v) содирот;

(vi) воридот;

(vii) Нигоҳдорӣ барои мақсадҳои дар зербандхои аз (i) то (vi) номбаршуда.

(b) Селексионер метавонад чунин иҷозатро бо шарту маҳдудиятҳои муайян диҳад.

(2) [Амалҳо дар мавриди маводи растанӣ ] Бо дарназардошти муқаррароти Моддаҳои 15 ва 16, амалҳои дар зербандҳои (i) - (vi) банди (I) (а) номбаршуда дар мавриди маводи растанӣ, бо шумули растаниҳои том ва қисмҳои онҳо, ки дар натиҷаи бе иҷозат истифода намудани маводи тухмии навъи ҳифзшаванда ба даст оварда шудааст, иҷозати селексионерро талаб мекунанд, ба шарте ки агар селексионер барои истифода кардан аз ҳуқуқи худ дар мавриди маводи тухмии зикргардида имконияти кофӣ надошта бошад.

(3) [ Амалҳо дар мавриди баъзе маҳсулот ] Бо дарназардошти муқаррароти Моддаҳои 15 ва 16, ҳар Тарафи аҳдкунанда метавонад пешбинӣ намояд, ки амалҳои дар зербандҳои (i) - (vi) банди (I) (а) номбаршуда дар мавриди маҳсулоте, ки бевосита аз маводи растании навъи ҳифзшавандаи таҳти амали муқаррароти банди (2) қарордошта дар натиҷаи бе иҷозат истифода намудани маводи растании мазкур истеҳсол шудааст, иҷозати селексионерро талаб мекунанд, ба шарте ки агар селексионер барои истифода кардан аз ҳуқуқи худ дар мавриди маводи тухмии зикргардида имконияти кофӣ надошта бошад.

(4) [ Амалҳои дигари имконпазир ] Бо дарназардошти муқаррароти Моддаҳои 15 ва 16, ҳар Тарафи аҳдкунанда метавонад пешбинӣ намояд, ки амалҳои аз амалҳои дар зербандҳои (i) - (vi) банди (I) (а) номбаршуда фарқкунанда ҳамчунин иҷозати селексионерро талаб менамоянд.

(5) [ Навъҳои маҳсулӣ ва баъзе навъҳои дигар]

(а) Муқаррароти бандҳои (1) - (4) инчунин нисбати навъҳои зерин татбиқ мегарданд:

(i) навъҳое, ки моҳиятан аз навъи ҳифзшаванда ҳосил шуда бошанд, агар худи навъи ҳифзшаванда навъи моҳиятан ҳосилшуда набошад,

(ii) навъҳое, ки аз навъи ҳифзшаванда мутобиқи Моддаи 7 баръало фарқ намекунанд, ва

(iii) навъҳое, ки истеҳсоли онҳо истифодаи бисёркаратаи навъи ҳифзшавандаро талаб мекунад.

(b) Барои мақсадҳои зербанди (а) (i) навъ дар ҳолате моҳиятан аз навъи дигар ("навъи ибтидоӣ") ҳосилшуда эътироф мегардад, ки агар он:

(i) асосан аз навъи ибтидоӣ ё аз навъи дигаре, ки худ асосан аз навъи ибтидоӣ ҳосил шуда, зимнан дараҷаи зуҳуроти аломатҳои асосиеро, ки натиҷаи татбиқи генотип ё комбинатсияи генотипҳои навъи ибтидоӣ мебошад, нигоҳ дошта бошад,

(ii) аз навъи ибтидоӣ баръало фарқ кунад, ва

(iii) аз рӯи дараҷаи зуҳуроти аломатҳои асосие, ки натиҷаи татбиқи генотип ё комбинатсияи генотипҳои навъи ибтидоӣ мебошад, ба истиснои фарқиятҳое, ки натиҷаи пайдоиш мебошанд, ба навъи ибтидоӣ мутобиқат намояд.

(с) Навъҳои моҳиятан аз навъҳои дигар ҳосилшуда, масалан, метавонанд бо ҷудо карда гирифтани мутанти табиатан ҳосилшуда ва ё варианти худклонкунонӣ ё аз растаниҳо ҷудо карда гирифтани навъи ӣбтидоӣ бо роҳи пайвандкунии ба ҳолати аввал оварда ё бо усули инженерияи генӣҳосил карда шаванд.

Моддаи 15 Истисноҳо аз ҳуқуқи селексионер

(1) [Истисноҳои ҳатмӣ] Ҳуқуқи селексионер ба амалҳои зерин дахл надорад:

(i) амалҳои ба мақсадҳои шахсии ғайритиҷоратӣ иҷрошуда;

(ii) амалҳои ба мақсадҳои озмоиш иҷрошуда; ва

(iii) амалҳои бо мақсади ба вуҷуд овардани навъҳои нав иҷрошуда, ба истиснои ҳолатҳое, ки нисбат ба амалҳои бо чунин навъҳо иҷрошавандаи дар Моддаи 14(1) - (4) зикргардида муқаррароти Моддаи 14(5) татбиқ мегарданд.

(2) [ Истисноҳои ғайриҳатмӣ] Бе дарназардошти муқаррароти Моддаи 14, ҳар Тарафи аҳдкунанда дар доираи мақбул ва ба шарти риояи манфиатҳои қонунии селексионер метавонад ҷиҳати додани имконият ба кишоварзон барои қитъаҳои замини худ зиёд кардани маводи растании дар натиҷаи дар қитъаҳои замини худ шинонидани навъи ҳифзшаванда ё навъе, ки ба он муқаррароти Моддаи 14(5)(а) (i) ё (ii) паҳн мегардад, ба даст овардаанд, ҳуқуқи селексионерро дар мавриди ҳар навъ маҳдуд созад.

Моддаи 16 Доираи амали ҳуқуқи селексионер

(1) [ Доираи амали ҳуқуқ ] Ҳуқуқи селексионер амалҳоро дар мавриди ҳар маводи навъи ӯ ё навъи муайяннамудаи муқаррароти Моддаи 14 (5) ё ҳар маводи аз навъҳои мазкур ҳосилшудае, ки аз ҷониби селексионер ё бо розигии ӯ дар қаламрави ҳамин Давлати аҳдкунанда фурӯхта шудааст ё ба муомилоти дигари тиҷоратӣ ворид карда шудааст, фаро намегирад, агар чунин амалҳо:

(i) бо зиёдкунии минбаъдаи навъ мазкур алоқаманд набошанд, ё

(ii) бо содироти маводи растание, ки барои зиёд кардани навъ дар кишваре, ки навъҳои ҷинс ё намуди ботаникӣ ҳифз карда намешаванд, имконият медиҳад, ба истиснои содирот бо мақсади истеъмол.

(2) [ Маънои истилоҳи "мавод" ] Барои мақсадҳои банди (1) истилоҳи "мавод" дар мавриди навъ маънои зерин дорад:

(i) ҳар намуд маводи тухмӣ;

(ii) маводи растанӣ, аз ҷумла растаниҳои бутун ва қисмҳои онҳо, ва

(iii) ҳар маҳсули бевосита аз маводи растанӣ ҳосилшуда.

(3) [ Маънои истилоҳи "қаламрав" дар баъзе ҳолатҳо] Барои мақсадҳои банди (1) ҳамаи Тарафҳои аҳдкунандае, ки давлатҳои аъзои ҳамон як ташкилоти байниҳукуматӣ мебошанд, агар инро қоидаҳои ин ташкилот талаб намояд, бо мақсади баробар кардани амалҳои дар қаламрави давлатҳои аъзои ин ташкилот иҷрошуда ба амалҳое, ки дар қаламрави худи онҳо анҷом дода мешаванд, метавонанд амалҳои худро муштарак анҷом дода, дар ин хусус ба Котиби генералӣ маълумот диҳанд.

Моддаи 17 Маҳдудиятҳои татбиқи ҳуқуқи селексионер

(1) [ Манфиатҳои ҷамъиятӣ] Ба истиснои ҳолатҳои махсус пешбининамудаи Конвенсияи мазкур, Тарафи аҳдкунанда метавонад танҳо бо сабабҳои марбут ба манфиатҳои ҷамъиятӣ татбиқи озоди ҳуқуқи селексионерро маҳдуд созад.

(2) [ Подоши одилона] Дар ҳолате, ки агар натиҷаи чунин маҳдудсозӣ ба шахси сеюм додани иҷозат барои анҷоми амалҳое бошад, ки иҷозати селексионерро талаб мекунанд, Тарафи аҳдкунандаи дахлдор ҳамаи тадбирҳои заруриро меандешад, то ки селексионер подоши одилона гирад.

Моддаи 18 Тадбирҳои танзимкунандаи фаъолияти тиҷоратӣ

Ҳуқуқи селексионер аз ҳар гуна тадбирҳое, ки Тарафи аҳдкунанда дар қаламрави худ ҷиҳати танзими истеҳсол, сертификатсия ва маркетинги маводи навъҳо ва ё содирот ё воридоти чунин мавод меандешад, вобаста нест. Дар ҳар ҳолат чунин тадбирҳо ба татбиқи муқаррароти Конвенсияи мазкур таъсир намерасонанд.

Моддаи 19 Мӯҳлати амали ҳуқуқи селексионер

(1) [ Мӯҳлати ҳифз ] Ҳуқуқи селексионер ба мӯҳлати номуайян дода мешавад.

(2) [ Мӯҳлати ҳадди ақали ҳифз] Давомнокии мӯҳлати зикргардидаи ҳифз аз санаи додани ҳуқуки селексионер на камтар аз 20 солро ташкил медиҳад. Дар мавриди дарахту ангур мӯҳлати зикргардида аз санаи додани ҳуқуқи селексионер на камтар аз 25 солро ташкил медиҳад.

БОБИ VI НОМГУЗОРИИ НАВЪ

Моддаи 20 Номгузории навъ

(1) [Бо ном ишора кардани навъҳо; истифодаи ном]

(а) Навъ бояд бо номе ишора карда шавад, ки тавсифи ҷинси онро дар бар гирифта бошад.

(b) Ҳар Тарафи аҳдкунанда тадбирҳое меандешад, ки бо дарназардошти банди (4), ҳеҷ гуна ҳуқуқҳои марбут ба номи ба қайд гирифташуда ҳатто пас аз ба охир расидани мӯҳлати амали ҳуқуқи селексионер ба истифодаи озоди ин ном дар робита бо ин навъ монеъ нашаванд.

(2) [ Тавсифи ном ] Ном бояд барои ҳаммонанд кардани навъ имконият диҳад. Ном набояд танҳо аз рақамҳо иборат бошад, ба истиснои ҳолатҳое, ки ин мутобиқи таҷрибаи муқарраршудаи номгузории навъҳо мебошад. Ном набояд дар мавриди сифатҳо, маъно ё ҳаммонандкунии навъи мазкур ё шахсияти селексионер ба иштибоҳ андозад ё боиси норавшанӣ гардад. Чунончи, он бояд аз ҳар номи дигаре, ки дар қаламрави ин ё он Тарафи аҳдкунанда навъи мавҷудаи ҳамон як намуд ё намуди наздики растаниҳо ифода ёфтааст, фарқ кунад.

(3) [ Бақайдгирш ном ] Селексионер номи навъро ба мақоми салоҳиятдор пешниҳод менамояд. Агар маълум гардад, ки чунин ном ҷавобгӯи талаботи банди (2) нест, мақоми зикргардида бақайдгирии онро рад карда, талаб менамояд, ки селексионер дар мӯҳлати муқарраршуда номи дигар пешниҳод намояд. Номи навъро мақоми салоҳиятдор ҳамзамон бо додани ҳуқуқи селексионер ба қайд мегирад.

(4) [ Ҳуқукҳои қаблан ба шахсони сеюм додашуда] Ба ҳуқуқҳои қаблан ба шахсони сеюм додашуда зиён оварда намешавад. Агар бинобар ҳуқуқҳои қаблан додашуда истифодаи ягон номи навъ ба шахсе, ки мутобиқи муқаррароти банди (7) вазифадор аст онро истифода намояд, пас мақоми ваколатдор талаб мекунад, ки барои навъ номи дигаре пешниҳод намояд.

(5) [ Номи якхела дар ҳамаи Тарафҳои аҳдкунанда] Навъ дар тамоми Тарафҳои аҳдкунанда бо ҳамон як ном пешниҳод карда шавад. Мақоми салоҳиятдори ҳар Тарафи аҳдкунанда номи бо ҳамин тариқ пешниҳодшударо ба қайд мегирад, ба шарте ки ин номро дар қаламрави худ қобили қабул нашуморад. Дар ин ҳолат он бояд аз селексионер пешниҳоди номи дигарро талаб намояд.

(6) [Мубодилаи иттилоот байни мақомоти салоҳиятдори Тарафҳои аҳдкунаяда] Мақоми салоҳиятдори Тарафи аҳдкунанда бояд огоҳонидани ҳамаи мақомоти салоҳиятдори дигари Тарафҳои аҳдкунандаро доир ба масъалаҳои марбут ба номи навъҳо, аз он ҷумла дар бораи пешниҳод, бақайдгирӣ ва бекор кардани номҳо таъмин намояд. Ҳар мақоми салоҳиятдор метавонад эродҳои худро дар мавриди бақайдгирии ном ба ҳамон мақоме ирсол намояд, ки ба он дар бораи ин ном хабар додаст.

(7) [ ӯҳдадории истифода намудани ном] Ҳар шахсе, ки дар қаламрави яке аз Тарафҳои аҳдкунанда маводи тухмии навъи дар қаламрави мазкур ҳифзшавандаро барои фурӯш пешниҳод мекунад ё ба муомилоти тиҷоратӣ ворид месозад, ӯҳдадор аст номи ин навъро ҳатто пас аз ба охир расидани мӯҳлати амали ҳуқуқи селексионер ба ин навъ истифода намояд, ба шарте, ки агар мутобиқи муқаррароти банди (4) ҳуқуқҳои қаблан додашуда барои чунин истифодабарӣ монеъ нашаванд.

(8) [ Аломатҳое, ки якҷоя бо ном истифода мешаванд ] Ҳангоми ба фурӯш баровардан ё ба муомилоти тиҷоратӣ ворид сохтани навъ иҷозат дода мешавад, ки номи ба қайд гирифташудаи навъ якҷоя бо тамғаи мол, номи тиҷоратӣ ё аломати ба ин монанд истифода шавад. Дар ҳолати чунин якҷоякунӣ номи навъ бояд осон шинохташаванда бошад.

БОБИ VII БЕЭЪТИБОР ДОНИСТАН ВА БЕКОР КАРДАНИ ҲУҚУҚИ СЕЛЕКСИОНЕР

Моддаи 21 Беэътибор донистани ҳуқуқи селексионер

(1) [ Сабабҳои беэътибор донистани ҳуқуқи селексионер] Ҳар Тарафи аҳдкунанда ҳуқуқи селексионери аз тарафи он додашударо беэътибор эълон медорад, агар муқаррар карда шавад, ки:

(i) шартҳои дар Моддаҳои 6 ё 7 зикргардида то лаҳзаи додани ҳуқуқи селексионер иҷро нагардидаанд,

(ii) ҳуқуқи селексионер дар асоси иттилоот ва ҳуҷҷатҳои пешниҳоднамудаи селексионер дода шуда, шартҳои дар Моддаҳои 8 ё 9 зиркгардида ҳангоми додани ҳуқуқи селексионер иҷро нашудаанд, ва ё

(iii) ҳуқуқи селексионер ба шахси дода шудааст, ки ба он ҳукуқ надошт, ба шарте ки ин ҳуқуқи селексионер ба шахсе дода шавад, ки ба он ҳуқуқ дорад.

(2) [Истиснои ҳар сабаби дигар] Ҳуқуқи селексионер бо сабабҳое, ки аз сабабҳои дар банди (1) зикргардида фарқ мекунанд, наметавонад беэътибор эълон карда шавад.

Моддаи 22 Бекор кардани ҳуқуқи селексионер

(1) [ Сабабҳои бекор кардани ҳуқуқи селексионер ]

(а) Ҳар Тарафи аҳдкунанда метавонад ҳуқуқи селексионери додаашро бекор кунад, агар муқаррар карда шавад, ки шартҳои дар Моддаҳои 8 ё 9 зикргардида аллакай иҷро намешаванд.

(b) Ба ғайр аз ин, ҳар Тарафи аҳдкунанда метавонад ҳуқуқи селексионери додаашро бекор кунад, агар бо дархости мақоми салоҳиятдор ва дар давоми мӯҳлати муқарраршуда:

(i) селексионер ба ин мақоми салоҳиятдор маълумот, ҳуҷҷатҳо ё маводеро, ки барои санҷиши нигоҳдории навъ лозиманд, пешниҳод накунад;

(ii) селексионер боҷеро, ки барои нигоҳ доштани амали ҳуқуқи ӯ ситонида мешаванд, насупорад, ё

(iii) дар ҳолате, ки агар номи навъ пас аз додани ҳуқуки селексионер бекор карда шуда, селексионер номи дигари муносиб пешниҳод нанамояд.

(2) [ Истиснои ҳар сабаби дигар ] Ҳуқуқи селексионер бо сабабҳое, ки аз сабабҳои дар банди (1) зикргардида фарқ мекунанд, наметавонад бекор карда шавад.

БОБИ VIII ИТТИҲОД

Моддаи 23 Аъзо

Тарафҳои аҳдкунанда аъзои Иттиҳод мебошанд.

Моддаи 24 Мақоми ҳуқуқӣ ва маҳалли ҷойгиршавӣ

(1) [ Шахси ҳуқуқӣ] Иттиҳод шахси ҳуқуқӣ мебошад.

(2) [ Соҳибҳуқуқӣ ] Иттиҳод дар қаламрави ҳар Тарафи аҳдкунанда мутобиқи қонунгузории дар қаламрави мазкур амалкунанда дорои қобилияти соҳибҳуқуқие мебошад, ки барои иҷрои вазифаҳои Иттиҳод зарур буда метавонад.

(3) [Маҳалли ҷойгиршавӣ] Маҳалли ҷойгиршавии Иттиҳод ва мақомоти доимии он Женева мебошад.

(4) [Созишнома дар бораи қароргоҳ] Иттиҳод ба Конфедератсияи Швейтсария дар бораи қароргоҳ созишнома ба имзо расонидааст.

Моддаи 25 Мақомот

Мақомоти доимии Иттиҳод Шӯро ва Бюрои Иттиҳод мебошанд.

Моддаи 26 Шӯро

(1) [ Ҳайат] Шӯро аз намояндагони аъзои Иттиҳод иборат аст. Ҳар узви Иттиҳод ба Шӯро як намоянда ва як ҷонишини ӯро таъин мекунад. Намояндагон ё муовинон метавонанд ёрдамчиҳо ё мушовирон дошта бошанд.

(2) [ Президент ва ноибони Президент ] Шӯро аз ҷумлаи аъзои худ Президент ва ноиби аввали Президентро интихоб менамояд. Он метавонад ду ноиби дигари Президентро интихоб намояд. Ноиби аввали Президент дар ҳолатҳое, ки Президент вазифаҳои худро иҷро карда наметавонад, ӯро иваз менамояд. Президент ба мӯҳлати се сол интихоб мешавад.

(3) [ Иҷлосия ] Иҷлосияҳои Шӯроро Президенти Шӯро даъват менамояд. Иҷлосияи навбатии Шӯро ҳар сол гузаронида мешавад. Ба ғайр аз ин Президент метавонад бо салоҳдиди худ ҷаласаи Шӯроро даъват намояд; агар инро сеяки аъзои Иттиҳод пурсад, ӯ ҷаласаи Шӯроро дар мӯҳлати семоҳа даъват менамояд.

(4) [ Мушоҳидон] Давлатҳое, ки узви Иттиҳод намебошанд, метавонанд ба ҷаласаҳои Шӯро ба ҳайси мушоҳидон даъват карда шаванд. Ба чунин ҷаласаҳои инчунин метавонанд мушоҳидон ва коршиносон даъват карда шаванд.

(5) [ Вазифаҳои Шӯро ] Ба вазифаҳои Шӯро инҳо дохил мешаванд:

(i) баррасии тадбирҳои зарурӣ ҷиҳати таъмини манфиатҳои Шӯро ва ҳавасманд гардонидани рушду инкишофи он;

(ii) қабули қоидаҳои расмиёти Шӯро;

(iii) таъини Котиби генералӣ ва агар Шӯрои лозим шуморад, таъини муовини Котиби генералӣ ва муайян намудани шартҳои таъини онҳо;

(iv) баррасии ҳисоботи ҳарсола дар бораи фаъолияти Шӯро ва қабули барномаи кори минбаъдаи он;

(v) таҳияи ҳамаи дастурҳои зарурӣ барои Котиби генералӣ оид ба иҷрои вазифаҳои Иттиҳод;

(vi) қабули қоидаҳои маъмурӣ ва молиявии Иттиҳод;

(vii) баррасӣ ва тасдиқи буҷети Иттиҳод, инчунин муқаррар намудани андозаи аъзоҳаққии ҳар узви Иттиҳод;

(viii) баррасӣ ва тасдиқи ҳисобҳои пешниҳоднамудаи Котиби генералӣ;

(ix) муқаррар намудани сана ва маҳалли гузаронидани конференсияҳои дар Моддаи 38 зикргардида ва андешидани тадбирҳои зарурӣ барои омодагӣ ба он; ва

(х) дар маҷмӯъ, қабул намудани ҳамаи қарорҳои зарурӣ барои таъмини фаъолияти самараноки Иттиҳод.

(6) [ Шумораи овозҳо ] (а) Ҳар узви Иттиҳоде, ки давлат аст, дар Шӯро як овоз дорад.

(b) Ҳар Тарафи аҳдкунандае, ки ташкилоти байниҳукуматӣ мебошад, доир ба масъалаҳои марбут ба салоҳияти он метавонад аз ҳуқуқи овоздиҳӣ аз номи давлатҳои аъзои Иттиҳод, ки ба ҳайаташ шомиланд, истифода намояд. Чунин ташкилоти байниҳуқуматӣ, агар ҳар яке аз давлатҳое, ки аъзои он мебошанд, дар овоздиҳӣ иштирок намояд, наметавонад аз ин ҳуқуқ истифода намояд ва баръакс.

(7) [ Аксарият ] Қарорҳои Шӯро бо аксарияти оддии шумораи овозҳои додашуда қабул карда мешаванд, зимнан қарорҳои дар асоси бандҳои (5)(ii), (vi) ва (iii) инчунин дар асоси Моддаҳои 28(3), 29(5)(b) ва 38(1) Шӯро қабулшаванда бо шумораи аз се ду ҳиссаи овозҳои додашуда қабул карда мешаванд. Овозҳои шахсони бетараф ба ҳисоб гирифта намешаванд.

Моддаи 27 Бюрои Иттиҳод

(1)[ Вазифаҳо ва роҳбарияти Бюро) Ба зиммаи Бюрои Иттиҳод иҷрои ҳамаи ӯҳдадорию вазифаҳои ба он аз ҷониби Шӯро супоридашуда вогузор карда мешавад. Роҳбарияти Бюроро Котиби генералӣ амалӣ менамояд.

(2) [ ӯҳдадориҳои Котиби генералӣ ] Котиби генералӣ дар назди Шӯро масъулият дорад; ӯ иҷрои қарорҳои Шӯроро таъмин менамояд. ӯ буҷетро барои тасдиқи Шӯро пешниҳод намуда, иҷрои онро таъмин менамояд. ӯ дар хусуси кори худ ба Шӯро ҳисобот дода, ба он дар бораи фаъолият ва вазъи молиявии Иттиҳод гузориш пешниҳод менамояд.

(3) [ Ҳайати кормандон] Бо дарназардошти муқаррароти Моддаи 26(5)(iii), шартҳои таъин ва киро намудани ҳайати кормандонро, ки барои иҷрои самараноки вазифаҳои Бюрои Иттиҳод зарур аст, тибқи қоидаҳои маъмурӣ ва молиявӣ муайян карда мешавад.

Моддаи 28 Забонҳои корӣ

(1) [ Забонҳои кории Бюро ] Зимни иҷрои вазифаҳои худ Бюрои Иттиҳод аз забонҳои англисӣ, испанӣ, олмонӣ ва фаронсавӣ истифода менамояд.

(2) [ Забонҳое, ки дар баъзе ҷаласаҳо истифода мешаванд] Ҷаласаҳои Шӯро ва конференсияҳо бо чор забони зиркгардида гузаронида мешаванд.

(3) [ Забонҳои дигар ] Шӯро метавонад дар хусуси истифодаи забонҳои дигар қарор қабул намояд.

Моддаи 29 Молия

(1) [ Даромадҳо ] Хароҷоти Шӯро аз ҳисоби маблағҳои зерин пардохта мешавад:

(i) аъзоҳаққии ҳарсолаи давлатҳои аъзои Иттиҳод;

(ii) маблағҳое, ки барои хизматҳои расонидашуда пардохта мешаванд;

(iii) мадохили мухталиф.

(2) [ Аъзоҳакқӣ: воҳидҳо ] (а) Ҳиссаи ҳар давлати узви Иттиҳод дар маблағи умумии аъзоҳаққии ҳарсола бо дарназардошти маблағи умумии хароҷот, ки аз ҳисоби аъзоҳаққии давлатҳои аъзои Иттиҳод пӯшонида мешавад ва шумораи воҳидҳои аъзоҳаққии мутобиқи банди (3) нисбати ин давлат истифодашаванда муайян карда мешавад. Ҳиссаи мазкур мутобиқи банди (4) ҳисоб карда мешавад.

(b) Шумораи воҳидҳои аъзоҳаққии бо рақамҳои том ё касрӣ ифода меёбанд, ба шарте ки ягон каср аз панҷяк кам набошад.

(3) [Аъзоҳаққӣ: ҳиссаи ҳар узв] (а) Шумораи воҳидҳои аъзоҳаққии нисбати ҳар узви Иттиҳоди иштирокчии Санади солҳои 1961/1972 ё Санади соли 1978 истифодашаванда дар санае, ки он бо муқаррароти Конвенсияи мазкур алоқаманд мегардад, дар ҳамон шакле боқӣ мемонад, ки шумораи воҳидҳои аъзоҳаққӣ бевосита то санаи зикргардида нисбати он истифода мешуд.

(b) Ҳар давлати дигари узви Иттиҳод ҳангоми ҳамроҳшавӣ ба Иттиҳод дар аризае, ки ба Котиби генералӣ мефиристад, шумораи воҳидҳои аъзоҳаққии нисбати он истифодашавандаро зикр менамояд.

(с) Ҳар давлати узви Иттиҳод дар аризае, ки ба Котиби генералӣ мефиристад, метавонад ҳар вақт шумораи воҳидҳои аъзоҳаққиеро, ки аз шумораи нисбати он мутобиқи зербандҳои (а) ё (b) истифодашаванда фарқ мекунад, зикр намояд. Чунин ариза, агар он дар давоми шаш моҳи аввали соли тақвимӣ пешниҳод шуда бошад, аз аввали соли тақвимии минбаъда эътибор пайдо мекунад; дар акси ҳол он аз оғози соли дуюми тақвимие, ки пас аз соли пешниҳод шудани ариза фаро мерасад, эътибор пайдо хоҳад буд.

(4) [ Аъзоҳакқӣ; ҳисоб кардани ҳиссаҳо ] (а) Андозаи воҳидҳои аъзоҳаққӣ бо роҳи тақсими маблағи умумии хароҷоти аз ҳисоби аъзоҳаққии давлатҳои аъзои Иттиҳод пардохташаванда ба шумораи умумии воҳидҳои нисбати ин давлатҳои аъзои Иттиҳод истифодашаванда муайян карда мешавад.

(b) Андозаи аъзоҳаққии ҳар давлати узви Иттиҳод бо роҳи зарби маблағи баробари як воҳиди аъзоҳаққӣ ба миқдори воҳидҳои пардохти нисбати ин давлати узви Иттиҳод истифодашаванда муайян карда мешавад.

(5) [ Қарзи вобаста ба пардохти аъзоҳаққӣ ] (а) Давлати узви Иттиҳоде, ки қарзи вобаста ба пардохти аъзоҳаққӣ дорад, бо дарназардошти зербанди (b), агар андозаи қарзи он ба андозаи аъзоҳаққие баробар бошад, ки давлати мазкур мебоист барои соли пурраи гузашта месупорид ё аз он зиёдтар бошад, аз ҳуқуқи овоздиҳӣ дар Шӯро истифода карда наметавонад. Муваққатан боздоштани ҳуқуқи овоздиҳӣ чунин давлати узви Иттиҳодро аз иҷрои ӯҳдадориҳои он мутобиқи Конвенсияи мазкур озод намекунад ва аз ҳуқуқҳои дигаре, ки аз он бармеоянд, маҳрум намесозад.

(b) Шӯро метавонад ба давлати мазкури узви Иттиҳод барои идомаи истифода аз ҳуқуқи овоздиҳии худ иҷозат диҳад, ба шарте, ки агар ба тариқи қонеъкунандаи Шӯро собит созад, ки сабаби ба таъхир гузоштани пардохт ҳолатҳои истисноӣ ва ногузир мебошанд.

(6) [ Санҷиши ҳисобҳо ] Санҷиши ҳисобҳои Иттиҳод мувофиқи қоидаҳои маъмурӣ ва молиявӣ аз ҷониби яке аз давлатҳои аъзои Иттиҳод анҷом дода мешавад. Чунин давлати узви Иттиҳод бо розигии он аз тарафи Шӯро таъин карда мешавад.

(7) [ Аъзоҳаққии ташкилотҳои байниҳукуматӣ] Ҳар Тарафи аҳдкунандае, ки ташкилоти байниҳукуматӣ мебошад, барои пардохти аъзоҳакқӣ вазифадор нест. Агар ба ҳар ҳол он хоҳиши пардохтани аъзоҳаққиро дошта бошад, нисбати он мутобиқан муқаррароти бандҳои (1)-(4) татбиқ мегарданд.

Б0БИ IХ ТАТБИҚИ КОНВЕНСИЯ; С03ИШНОМАҲОИ ДИГАР

Моддаи 30 Татбиқи Конвенсия

(1) [ Тадбирҳо ҷиҳати татбиқ ] Ҳар Тарафи аҳдкунанда ҷиҳати татбиқи Конвенсияи мазкур тамоми тадбирҳои заруриро меандешад, аз он ҷумла:

(i) ҷиҳати ҳифзи самараноки селексионерон тадбирҳои дахлдори ҳуқуқиро пешбинӣ менамояд;

(ii) дорои мақоми салоҳиятдор мебошад, ки ба он додани ҳуқуқи селексионерро супориш медиҳад ё ин вазифаро ба мақоми салоҳиятдори Тарафи аҳдкунандаи дигар месупорад;

(iii) огоҳонидани аҳли ҷомеаро бо роҳи интишори даврии иттилоот дар бораи

- дархостҳо барои додани ҳуқуқи селексионер, ҳуқуқҳои додашуда ва

- намҳои пешниҳодгардида ва маъқул донисташуда таъмин менамояд.

(2) [ Мутобиқати қонунгузориҳо ] Пешбинӣ мегардад, ки ҳар давлат ё ташкилоти байниҳукуматӣ ҳангоми барои нигоҳдорӣ супоридани ҳуҷҷатҳои худ дар бораи тасдиқ, қабул, маъқул донистан ё ҳамроҳшавӣ, вобаста ба мавриди мушаххас, бояд барои татбиқи муқаррароти Ковенсияи мазкур мутобиқи қонунгузории худ қодир бошад.

Моддаи 31 Муносибатҳои байни Тарафҳои аҳдкунанда ва давлатҳое, ки бо Санадҳои қаблӣ алоқаманданд

(1) [ Муносибатҳои байни давлатҳо вобаста ба Конвенсияи мазкур ] Дар муносибатҳои байни давлатҳои аъзои Иттиҳод вобаста бо Конвенсиян мазкур, инчунин ҳар Санади қаблии Конвенсия танҳо муқаррароти Конвенсияи мазкур истифода мешаванд.

(2) [ Имконияти муносибат бо давлатҳое, ки бо Конвенсияи мазкур алоқаманд нестанд ]; Ҳар давлати узви Иттиҳод, ки бо Конвенсияи мазкур алоқаманд нест, дар огоҳиномае, ки ба Котиби генералӣ ирсол менамояд, метавонад арз намояд, ки дар муносибат бо ҳар узви Иттиҳоди танҳо бо Конвенсияи мазкур вобастабуда аз Санади охирине истифода хоҳад кард, ки бо он алоқаманд аст. Бо гузашти як моҳи пас аз ирсоли чунин огоҳинома то замоне, ки давлати узви Иттиҳоде, ки бо Конвенсияи мазкур алоқаманд мегардад, узви зикргардидаи Иттиҳод дар муносибатҳои худ бо ҳар узви Иттиҳоди танҳо бо Конвенсияи мазкур алоқадошта аз Санади охирине истифода мекунад, ки бо он алоқаманд аст, дар навбати худ ин давлатҳо дар муносибатҳои худ бо давлати аввал Конвенсияи мазкурро истифода мебаранд.

Моддаи 32 Созишномаҳои махсус

Аъзои Иттиҳод ҳуқуқ доранд байни якдигар доир ба ҳифзи навъҳои нави растаниҳо созишномаҳои махсус ба имзо расонанд, ба шарте ки чунин созишномаҳо хилофи муқаррароти Конвенсияи мазкур набошанд.

БОБИ Х МУҚАРРАРОТИ ХОТИМАВӣ

Моддаи 33 Имзо

Конвенсияи мазкур барои имзо аз тарафи ҳар давлате, ки дар санаи қабули он узви Иттиҳод мебошад, кушода аст. Он барои имзо то 31 марти соли 1992 боз боқӣ мемонад.

Моддаи 34 Тасдиқ, қабул ё маъкул донистан; ҳамроҳшавӣ

(1) [ Давлатҳо ва баъзе ташкилотҳои байниҳукуматӣ ]

(а) Мутобиқи муқаррароти Моддаи мазкур ҳар давлат метавонад иштирокчии Конвенсияи мазкур бошад.

(b) Мутобиқи муқаррароти Моддаи мазкур ҳар ташкилоти байниҳукуматӣ метавонад иштирокчии Конвенсияи мазкур бошад, агар он:

(i) дар масъалаҳои бо Конвенсияи мазкур танзимшаванда салоҳият дошта бошад,

(ii) қонунгузории худро дошта бошад, ки додан ва ҳифзи ҳуқуқи селексионеронро пешбинӣ намуда, барои ҳамаи давлатҳои ба ҳайати он дохилшаванда ҳатмӣ мебошад, ва

(iii) мутобиқи расмиёти дохилии худ ба таври бояду шояд дорои ваколати ҳамроҳ шудан ба Конвенсияи мазкурро дошта бошад.

(2) [ Ҳуҷҷат дар бораи ҳамроҳшавӣ ] Ҳар давлати имзокардаи Конвенсияи мазкур бо роҳи барои нигоҳдорӣ супоридани тасдиқнома, ҳуҷҷат дар бораи қабул ё маъқул донистани Конвенсияи мазкур иштирокчии он мегардад. Ҳар давлати имзонакардаи Конвенсияи мазкур ва ҳар ташкилоти байниҳукуматӣ бо роҳи барои нигоҳдорӣ супоридани санад дар бораи ҳамроҳшавӣ ба Конвенсияи мазкур иштирокчии он мегардад. Тасдиқномаҳо, ҳуҷҷатҳо дар бораи қабул ё маъқул донистан ё санадҳо дар бораи ҳамроҳшавӣ барои нигоҳдорӣ ба Котиби генералӣ супорида мешаванд.

(3) [ Хулосаи Шӯро ] Ҳар давлате, ки узви Иттиҳод нест, ва ҳар ташкилоти байниҳукуматӣ қабл аз барои нигоҳдорӣ супоридани санад дар бораи ҳамроҳшавӣ ҷиҳати гирифтани хулосаи Шӯро дар бораи мутобиқати қонунгузории миллии он ба муқаррароти Конвенсияи мазкур ба Шӯро муроҷиат мекунад. Агар қарори дорои хулосаи Шӯро мусбӣ бошад, пас санад дар бораи ҳамроҳшавӣ метавонад барои нигоҳдорӣ супорида шавад.

Моддаи 35 Тавзеҳот

(1) [ Усул] Бо дарназардошти банди (2), тавзеҳот ба Конвенсияи мазкур роҳ дода намешавад.

(2) [ Истиснои имконпазир] (а) Бе дарназардошти Моддаи 3(1), ҳар давлате, ки дар лаҳзаи иштирокчии Конвенсияи мазкур шуданаш бо муқаррароти Санади соли 1978 алоқаманд буда, ҳифзи навъҳои афзоиши вегетавиро на бо ҳуқуқи селексионер, балки бо ҳуҷҷати дигари муҳофизатӣ дар соҳаи моликияти саноатӣ пешбинӣ менамояд, ҳуқуқ дорад нисбати чунин навъҳо Конвенсияи мазкурро истифода накарда, чунин ҳифзро идома диҳад.

(b) Ҳар давлате, ки аз ин ҳуқуқ истифода мебарад, ҳангоми барои нигоҳдорӣ супоридани тасдиқнома, ҳуҷҷат дар бораи қабул ё маъқул донистан, ё санад дар бораи ҳамроҳшавӣ, вобаста ба ҳолати мушаххас, дар ин хусус Котиби генералиро огоҳ месозад. Чунин давлат метавонад ҳар вақт огоҳиномаи мазкурро бозхонад.

Моддаи 36 Огоҳиномаҳои марбут ба қонунгузорӣ ва ҷинсу намудҳои ҳифзшаванда; иттилооти интишоршаванда

(1) [ Огоҳиномаи аввал] Ҳангоми барои нигоҳдорӣ супоридани тасдиқнома, ҳуҷҷат дар бораи қабул ё маъқул донистан, ё санад дар бораи ҳамроҳшавӣ ба Конвенсияи мазкур, вобаста ба ҳолати мушаххас, ҳар давлат ё ташкилоти байниҳукуматӣ Котиби генералиро дар бораи инҳо огоҳ, месозад:

(i) қонунгузории худ, ки ҳуқуқҳои селексионеронро танзим менамояд, ва

(ii) номгӯи ҷинсу намудҳое, ки нисбати онҳо аз санае, ки давлат ё ташкилоти байниҳукуматӣ бо Конвенсияи мазкур алоқаманд мегардад, он муқаррароти Конвенсияи мазкурро татбиқ хоҳад кард.

(2) [ Огоҳинома дар бораи тағйирот ] Ҳар Тарафи аҳдкунанда бе таъхир Котиби генералиро дар хусуси онҳо огоҳ месозад:

(i) ҳар тағйирот дар қонунгузории худ, ки ҳуқуқи селексионеронро танзим менамояд, ва

(ii) ҳар вусъати татбиқи Конвенсияи мазкур нисбати ҷинсу намудҳои иловагӣ.

(3) [ Интишори маълумот] Котиби генералӣ дар асоси огоҳиномаҳои аз ҳар Тарафи аҳдкунандаи манфиатдор гирифтааш маълумоти зеринро интишор менамояд:

(i) дар бораи қонунгузории танзимкунандаи ҳукуқи селексионерон ва ҳар тағйироти ба чунин қонунгузорӣ ворид кардашуда, ва

(ii) номгӯи ҷинсу намудҳои растаниҳои дар банди (1)(и) зикргардида ва ҳар вусъати дар банди (2)(ii) зикргардида.

Моддаи 37 Эътибор пайдо кардан; ғайриимкон будани ҳамроҳшавӣ ба Санадҳои қаблӣ

(1) [ Эътибори нахуст пайдо кардан] Конвенсияи мазкур баъди як моҳи пас аз он, ки панҷ давлат вобаста ба ҳолат барои нигоҳдорӣ тасдиқномаҳо, ҳуҷҷатҳо дар бораи қабул ё маъқул донистан, ё санадҳоро дар бораи ҳамроҳшавӣ месупоранд, эътибор пайдо мекунад, ба шарте, ки ақаллан се ҳуҷҷати зикргардида аз тарафи давлатҳои иштирокчии Санади солҳои 1961/1972 ё Санади соли 1978 барои нигоҳдорӣ супорида шуда бошад.

(2) [ Эътибори минбаъда пайдо кардан ] Дар мавриди давлате, ки ба муқаррароти банди (1) дахл надорад, ва ё нисбати ҳар ташкилоти байниҳукуматӣ Конвенсияи мазкур баъди як моҳи пас аз санае эътибор пайдо мекунад, ки он тасдиқнома, ҳуҷҷат дар бораи қабул ё маъқул донистан, ё санади худро дар бораи ҳамроҳшавӣ ба Конвенсияи мазкур, вобаста ба ҳолат, барои нигоҳдорӣ супоридааст.

(3) [ Ғайриимкон будани ҳамроҳшавӣ ба Санади соли 1978 ] Пас аз он, ки Конвенсияи мазкур мутобиқи банди (1) эътибор пайдо мекунад, ягон давлат ба Санади соли 1978 ҳамроҳ шуда наметавонад, ба истиснои давлатҳое, ки мутобиқи таҷрибаи муқарраршудаи Ассамблеяи Генералии Созмони Милали Муттаҳид кишварҳои рӯ ба тараққӣ дониста шуда, метавонанд чунин ҳучҷатро дар бораи ҳамроҳшавӣ то 31 декабри соли 1995 супоранд, инчунин ҳар давлати дигаре, ки метавонад чунин ҳуҷҷатро дар бораи ҳамроҳшавӣ то 31 декабри соли 1993, ҳатто дар сурати то ин сана эътибор пайдо кардани Конвенсияи мазкур супорад.

Моддаи 38 Таҷдиди назари Конвенсия

(1) [ Конференсия] Конвенсияи мазкур метавонад аз ҷониби конференсияи аъзои Иттиҳод таҷдиди назар карда шавад. Қарор дар бораи даъвати чунин конференсия аз ҷониби Шӯро қабул карда мешавад.

(2) [ Кворум ва аксарият ] Натиҷаи кори конференсия танҳо дар сурате боэътибор дониста мешавад, ки дар он лоақал нисфи давлатҳои аъзои Иттиҳод намояндагӣ шавад. Барои қабули матни таҷдиди назаршудаи Конвенсия аксарияти аз чор се ҳиссаи давлатҳои аъзои Иттиҳод, ки дар конференсия иштирок намуда, овоз додаанд, талаб карда мешавад.

Моддаи 39 Беэътибор донистани Конвенсия

(1) [ Огоҳинома ] Ҳар Тарафи аҳдкунанда метавонад бо роҳи ирсоли огоҳинома ба Котиби генералӣ онро беэътибор донад. Котиби генералӣ дар хусуси расидани чунин огоҳинома бе таъхир ҳамаи аъзои Иттиҳодро огоҳ месозад.

(2) [ Санадҳои қаблӣ ] Огоҳинома дар бораи беэътибор донистани Конвенсия инчунин ҳамчун беэътибор донистани ҳар Санади қаблие баррасӣ мегардад, ки Тарафи аҳдкунандаи беэътибор донистаи Конвенсияи мазкур бо он алоқаманд мебошад.

(3) [ Эътибор пайдо кардан] Беэътибор донистан дар охири соли тақвимие, ки пас аз соли огоҳиномаи беэътибор донистанро гирифтани Котиби генералӣ фаро мерасад, эътибор пайдо мекунад.

(4) [ Ҳуқуқҳои додашуда ] Беэътибор донистан ба ҳуқуқи селексионерон, ки дар робита бо Конвенсияи мазкур ё ягон Санади қаблӣ то санаи эътибор пайдо кардани чунин бекоркунӣ дода шудааст, дахл надорад.

Моддаи 40 Нигоҳ доштани ҳуқуқҳои ҷойдошта

Конвенсияи мазкур ҳуқуқҳои мавҷудаи селексионеронро, ки тибқи қонунгузории Тарафҳои аҳдкунанда ё Санадҳои қаблӣ ва ё созишномаҳои аз Конвенсия фарқкунандаи байни аъзои Иттиҳод басташуда ба онҳо дода шудаанд, маҳдуд намесозад.

Моддаи 41 Матнҳои асл ва расмии Конвенсия

(1) [ Матнҳои асл ] Конвенсияи мазкур дар як нусха бо забонҳои англисӣ, фаронсавӣ ва немисӣ ба имзо расонида мешавад. Дар сурати ҳар ихтилоф байни матнҳо, матни фаронсавӣ афзалият дорад. Нусхаи асл барои нигоҳдорӣ ба Котиби генералӣ супорида мешавад.

(2) [ Матнҳои расмӣ ] Матнҳои расмӣ аз ҷониби Котиби генералӣ пас аз машварат бо ҳукуматҳои манфиатдор бо забонҳои арабӣ, голландӣ, итолиёӣ, испанӣ, ҷопонӣ, инчунин бо забонҳое, ки Шӯро муайян менамояд, тасдиқ карда мешаванд.

Моддаи 42 Вазифаҳои маҳфуздоранда

(1) [ Додани нусхаҳо ] Котиби генералӣ мувофиқи тартиби муқарраргардида нусхаҳои тасдиқшудаи Конвенсияи мазкурро ба ҳамаи давлатҳо ва ташкилотҳои байниҳукуматие, ки дар Конференсияи дипломатии қабулнамудаи Конвенсияи мазкур муаррифӣ шудаанд, инчунин тибқи дархост ба ҳар давлат ё ташкилоти байниҳукуматии дигар медиҳад.

(2) [ Бақайдгирӣ ] Котиби генералӣ бақайдгирии Конвенсияи мазкурро дар Котиботи Созмони Милали Муттаҳид анҷом медиҳад.