Низомномаи Шӯрои ҳамоҳангсозии экспертӣ оид ба идоракунии татбиқи Барномаи рушди инноватсионии Ҷумҳурии Тоҷикистон барои солҳои 2011-2020

1. Шӯрои ҳамоҳангсозии экспертӣ оид ба идоракунии татбиқи Барномаи рушди инноватсионии Ҷумҳурии Тоҷикистон барои солҳои 2011-2020 (минбаъд-Шӯро) мақоми ҷамъиятии экспертӣ-таҳлилӣ мебошад, ки бо мақсади идоракунии раванди татбиқи Барномаи рушди инноватсионии Ҷумҳурии Тоҷикистон барои солҳои 2011-2020, бо қарори Ҳукумати Ҷумҳурии Тоҷикистон аз 2 ноябри соли 2011, № 553 таъсис дода шудааст.

2. Шӯро мақоми ҳамоҳангсоз буда, вазифаҳои худро дар ҳамкории зич бо мақомоти давлатии Ҷумҳурии Тоҷикистон, муассисаҳои илмӣ, ташкилотҳои ҷамъиятӣ ва иттиҳодияҳо, ҳамчунин иштирокчиёни дигари фаъолияти инноватсионӣ анҷом медиҳад.

3. Шӯро фаъолияти худро дар асоси Конститутсияи (Сарқонуни) Ҷумҳурии Тоҷикистон, қонунҳои Ҷумҳурии Точикистон, фармону амрҳои Президенти Ҷумҳурии Тоҷикистон, қарору супоришоти Ҳукумати Ҷумҳурии Тоҷикистон, санадҳои ҳуқуқии байналмилалии эътирофнамудаи Ҷумҳурии Тоҷикистон ва Низомномаи мазкур татбиқ менамояд.

4. Вазифаҳои асосии Шӯро:

- назорат ва ҳамоҳангсозии фаъолияти инноватсионӣ дар Ҷумҳурии Тоҷикистон;

- таҳияи пешниҳодоте, ки ба баланд бардоштани самараи фаъолияти инноватсионӣ дар Ҷумҳурии Тоҷикистон мусоидат менамояд;

- муайян кардани самтҳои афзалиятноки корҳои илмӣ-таҳқиқотӣ, таҷрибавӣ-тарҳкашӣ ва лоиҳавие, ки барои рушди инноватсионии Ҷумҳурии Тоҷикистон мусоидат менамоянд;

- гузаронидани озмун ва интихоби лоиҳаҳои инноватсионии дорои аҳамияти илмӣ ва иҷтимоӣ бо мақсади шомил намудани онҳо ба Барномаи мақсадноки инноватсионӣ, инчунин коркарди тавсияҳо ба мақомоти иҷроияи ҳокимияти давлатӣ ҷиҳати пешниҳод намудани лоиҳаҳои бехтарини инноватсионӣ барои истифодаи минбаъдаи маблағҳои Буҷети давлатии ҷумҳурӣ, инчунин имконоти истеҳсолот ва фурӯхташавии маҳсулоти корхонаҳои ҷумҳурӣ дар бозори дохилӣ ва хориҷӣ;

- омода намудани пешниҳодоти асоснок барои таҳияи тавсияҳои методӣ оид ба масъалаҳое, ки бо рушди фаъолияти инноватсионӣ дар Ҷумҳурии Тоҷикистон алоқаманд мебошанд;

- иштирок дар таҳияи самтҳои афзалиятноки рушди илмӣ-техникӣ ва инноватсионӣ тибқи тартиби муқарраршуда;

- ҳамоҳангсозии фаъолияти муассисаҳои илмӣ-таҳқиқотӣ ва тарҳкашию технологӣ, муассисаҳои таҳсилоти олӣ, иттиҳодия ва корхонаҳо вобаста ба тартибдиҳии номгӯи лоиҳаҳои илмӣ-техникӣ ва инноватсионӣ;

- омода намудани пешниҳодҳо ба Ҳукумати Ҷумҳурии Тоҷикистон бо мақсади муҳайё намудани шароити мусоид барои рушди фаъолияти инноватсионӣ ва дастгирии субектҳои фаъолияти инноватсионӣ;

- иҷрои дигар вазифаҳо, ки ба рушди фаъолияти инноватсионӣ мусоидат менамоянд.

5. Шӯро барои татбиқи мақсаду вазифаҳои худ чунин ҳуқуқҳоро дорост:

- дар ҳолати зарурӣ гурӯҳи экспертҳоро дар назди Шӯро аз рӯи соҳаҳои муайяни илму истеҳсолот, ки аз олимон ва мутахассисони баландихтисос иборат аст, таъсис диҳад.

- барои баррасӣ ва арзёбии масъалаҳои рӯзмарра комиссияҳои махсус таъсис диҳад;

- матахассисони соҳаҳои мухталифи иқтисодиёти ҷумҳуриро, ки ба фаъолияти илмӣ-инноватсионӣ машғуланд ба кори Шӯро ҷалб намоянд;

- фаъолияти вазорату идораҳо ва сохторҳои онҳоро дар самти таъмини иҷрои чорабиниҳои Барномаи рушди инноватсионии Ҷумҳурии Тоҷикистон барои солҳои 2011-2020 ҳамоҳанг, арзёбӣ ва баррасӣ намояд.

6. Ҳайати Шӯро бо қарори Ҳукумати Ҷумҳурии Тоҷикистон тасдиқ карда мешавад ва дар мавридҳои зарурӣ ба он тибқи муқаррарот тағйирот ворид карда мешавад.

7. Ба фаъолияти Шӯро Раиси Шӯро роҳбарӣ менамояд. Ҳангоми набудани Раиси Шӯро, фаъолияти Шӯроро муовини ӯ роҳбарӣ менамояд.

8. Ҷаласаҳои Шӯро дар се моҳ як маротиба ва ҳангоми зарурат ғайринақшавӣ баргузор мегарданд.

9. Қарори Шӯро дар сурате салоҳиятнок ҳисобида мешавад, агар дар маҷлиси Шӯро на камтар аз нисфи аъзои Шӯро иштирок дошта бошад. Қарорҳо бо аксарияти овозҳои аъзоёни дар ҷаласаи Шӯро иштирокдошта қабул мегарданд. Дар сурати баробар будани шумораи овозҳо, овози Раиси Шӯро ҳалкунанда мебошад. Узви Шӯро наметавонад ваколати худро ба узви дигари Шӯро вогузор намояд. Шӯро метавонад ба маҷлисҳои худ намояндагони дигар вазорату идораҳои дахлдорро даъват намояд.

10. Қарори Шӯроро Раиси Шӯро бо имзои худ тасдиқ намуда, ҳамчун тавсияҳои методӣ ба тамоми вазорату идораҳои ҷумҳурӣ ирсол менамояд.

11. Ҷараёни маҷлиси Шӯро дар протокол дарҷ карда мешавад, ки ба он Раис ва Котиби масъули Шӯро имзо мегузоранд.

12. Тартиби кори Шӯро дар маҷлиси аввали он муҳокима гардида, низомномаи корӣ бо роҳи овоздиҳӣ бо қарори Шӯро тасдиқ карда мешавад.

13. Тартиби гузаронидани озмун ва ташхиси лоиҳаҳои инноватсионӣ, ташкили комиссияҳои махсус, таъсиси гурӯҳи экспертҳо бо қарори Шӯро тасдиқ карда мешавад.