Тартиби таъминоти моддии қисмҳо ва сохторҳои ҳарбикунонидашудаи наҷотдиҳии кӯҳии Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон

1. Муқаррароти умумӣ

1) Тартиби мазкур низоми таъминоти моддии қисмҳо ва сохторҳои ҳарбикунонидашудаи наҷотдиҳии кӯҳиро муайян намуда, ҷиҳати ҳавасмандгардонӣ ва баланд бардоштани омодагии ҷангии сохторҳои онҳо баҳри наҷоти одамон ва рафъи садамаҳои зеризаминӣ равона карда шудааст. Инчунин тартиб ва шартҳои пардохтҳои иловагиро ҳангоми фаъолияти ҳамарӯза ва дар рафти рафъи садамаҳо муқаррар намуда, ҳифзи иҷтимоии кормандони қисмҳои ҳарбикунонидашудаи наҷотдиҳии кӯҳӣ ва аҳли оилаи онҳоро таъмин менамояд.

2. Таъминоти моддии қисмҳо ва сохторҳои ҳарбикунонидашудаи наҷотдиҳии кӯҳӣ

2) Системаи таъминоти моддии қисмҳо ва ҷузъу томҳои ҳарбикунонидашудаи наҷотдиҳии кӯҳӣ аз ҳисоби воситаҳои ба таври шартномавӣ бадастомада, воситаҳои иншооти хизматрасонӣ ва воситаҳои Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон, инчунин дигар маблағҳое, ки қонунгузорӣ манъ накардааст, ташкил карда мешаванд.

3) Низоми таъминоти моддии қисмҳои ҳарбикунонидашудаи наҷотдиҳии кӯҳиро таъминоти пулӣ, таъминоти шайъӣ ва таъминоти техникӣ ташкил медиҳанд.

4) Низоми таъминоти моддии қисмҳои ҳарбикунонидашудаи наҷотдиҳии кӯҳӣ ба он равона карда шудааст, ки сатҳи баланди омодагии сохторҳо, пуррагардонии штатҳо бо ҳайати оперативӣ ва сафарбаршавии мунтазами кормандони баландихтисос ба хизмат, инчунин иҷрои корҳои садамавию наҷотдиҳӣ таъмин карда шавад.

5) Ҷадвали штатӣ ва сметаи хароҷоти қисмҳои ҳарбикунонидашудаи наҷотдиҳии кӯҳӣ тибқи тартиби муқаррарнамудаи қонунгузории Ҷумҳурии Тоҷикистон тасдиқ карда мешаванд.

3. Таъминоти пулии ҳайати шахсии қисмҳо ва сохторҳои ҳарбикунонидашудаи наҷотдиҳии кӯҳӣ

6) Таъминоти пулии ҳайати шахсии қисмҳои ҳарбикунонидашудаи наҷотдиҳии кӯҳӣ аз таъминоти пулии доимӣ ва иловапулиҳо, Изофапулӣ аз рӯи иҷрои корҳои садамавию наҷотдиҳӣ ва техникӣ, ҳавасмандгардонӣ ва мукофотонидан барои собиқаи хизматӣ дарозмуддат, инчунин аз пардохтҳои иҷтимоӣ ва ғайра иборат аст.

7) Ҳайати ҳарбикунонидашуда, ки дар қисмҳои ҳарбикунонидашудаи наҷотдиҳии кӯҳӣ хизмат менамоянд, баъди гузаштани мӯҳлати санҷишӣ аз лаҳзаи қабул шудан ба хизмат дар қисмҳои ҳарбикунонидашудаи наҷотдиҳии кӯҳӣ ҳукуқи гирифтани ҳамаи намудҳои таъминоти пулӣ ва таъминоти шайъиро доранд. Дар давраи мӯҳлати санҷишӣ фақат маоши вазифавӣ пардохт карда мешавад.

8) Ҳисобу китоби ҳаррӯзаи музди меҳнат бо роҳи тақсими маблағи музди меҳнати якмоҳа ба 30 муайян карда шуда, ба ин ҳисоб рӯзҳои истироҳат ва рӯзҳои ид дохил мегарданд.

9) Ба ҳайати қаторӣ ва фармондеҳии қисмҳои ҳарбикунонидашудаи наҷотдиҳии кӯҳӣ барои хизмат дар иншооти хизматрасонӣ ҷиҳати наҷоти одамон ва рафъи садамаҳо, дар сохтор ё дар хона, ки дар реҷаи омодагии шабонарӯзии доимӣ қарор доранд, таъминоти доимии пулӣ муқаррар карда мешавад. Ба таъминоти доимии пулӣ маоши вазифавии моҳона, пардохтҳо ва изофапулиҳо ва дигар иловапулиҳо дохил мешаванд. Маоши вазифавии моҳонаи кормандон дар ҷадвали штатҳо, шартномаҳои фаврии меҳнатӣ (қарордодҳо) пешбинӣ гардида, ҳаҷм ва тартиби пардохти таъминоти пулии доимӣ, иловапулиҳо ва изофапулиҳо тибқи тартиби муқаррарнамудаи қонунгузории Ҷумҳурии Тоҷикистон муайян карда мешавад.

10) Бо мақсади ба тарзи ягона ташкил намудани пардохти музди меҳнати соҳаҳои қисмҳои наҷотдиҳии кӯҳӣ, маоши вазифавии ҳайати оперативии қисмҳои ҳарбикунонидашудаи наҷотдиҳии кӯҳӣ бояд ба тарифҳо ва маоши кормандон ва кормандони муҳандисию техникии соҳаҳои ташкилотҳои коркарди маъданҳои кӯҳӣ, ки аз ҳисоби онҳо пурра карда шудаанд, баробар карда шавад.

4. Иловапулиҳо барои иҷрои корҳои садамавию наҷотдиҳӣ ва техникӣ

11) Иловапулиҳо ба кормандоне, ки ба таври доимӣ бо дараҷаҳои омодагӣ ҷиҳати рафъи садамаҳо ва маҳорати тахассусӣ барои омӯхтани касбу кори нав фаро гирифта мешаванд, муқаррар карда мешаванд.

12) Ба кормандони оперативии қисмҳои ҳарбикунонидашудаи наҷотдиҳии кӯҳӣ то командири взвод барои иштирок дар рафъи садамаҳо ва расонидани кӯмак ба зарардидагон иловапулӣ барои кори шабона дар ҳаҷми 40 фоизи музди соатбайъ барои ҳар як соати корӣ аз соати 22.00 то

06.00, ҳангоми кор бо реҷаи бисёрбастӣ бошад, дар ҳаҷми 20 фоизи маош дар басти бегоҳирӯзӣ ва 40 фоизи маош дар басти шабона барои ҳар як соати корӣ дар басти дахлдор мутобиқи реҷаи дар корхона амалкунанда пардохта мешавад.

13) Пардохти музди меҳнат ба ҳайати қаторӣ ва хурди фармондеҳӣ, инчунин ба командирони взводҳо ва ёрдамчиёни онҳо барои кор бо респираторҳо дар конҳо, нақбҳо ва дигар иншооти зеризаминӣ (рафъи садамаҳо ва гузаронидани корҳои профилактикӣ ва техникӣ) дар ҳаҷми маоши чорсоата барои ҳар як соати корӣ ё навбатдорӣ бо респираторҳо ба роҳ монда мешавад.

14) Пардохт барои гузаронидани корҳои садамавию наҷотдиҳӣ дар рӯзҳои ид бо дарназардошти Маоши вазифавӣ (ставкаи тарифӣ) дар ҳаҷми дукарата зиёд амалӣ карда мешавад.

15) Музди меҳнат барои иҷрои корҳои садамавию наҷотдиҳӣ бевосита дар конҳо бо истифодаи респираторҳои зиддигазӣ ба респираторчиҳо ва командирони шӯъбаҳо барои вақти амалан сафшуда аз рӯи ставкаҳое, ки барои кормандони дараҷаи 5-и корҳои зеризаминӣ муқаррар гардидаанд, пардохта мешавад. Гузаронидани чунин пардохти меҳнат ҳар дафъа ба роҳбарони корҳои рафъи садамаҳо вобаста аз хусусият, ҳаҷм ва миқдори корҳои садамивию наҷотдиҳии иҷрошуда, вазнинӣ, заранокӣ ва дараҷаи хатарнокии онҳо иҷозат дода мешавад.

16) Пардохти иловапулиҳо барои иҷрои коҳои садамавию наҷотдиҳӣ аз ҳисоби корхонае, ки корҳои мазкур анҷом дода мешавад, ба роҳ монда мешавад.

. Фонди ягонаи ҳавасмандгардонӣ

17) Фонди ягонаи ҳавасмандгардонӣ аз ҳисоби фонди аз музди меҳнат ҷудогардидаи ҳайати ҳарбикунонидашуда дар ҳаҷми 25 фоиз, ки дар созишнома бо иншооти хизматрасонӣ пешбинӣ гардидааст, ба амал кӯмаки яквақтинаи моддӣ мукофотпулиҳои моҳона (се моҳа), кӯмакпӯлӣ барои натиҷаҳои умумии фаъолияти солонаи кормандони қисмҳои ҳарбикунонидашудаи наҷотдиҳии кӯҳӣ истифода бурда мешавад.

18) Мукофотонидани командони ҳарбикунонидашудаи наҷотдиҳии кӯҳӣ мувофиқи тартиби муқарагардида ба амал бароварда мешавад. Ба мукофонидани коргарони қисмҳои ҳарбикунонидашудаи наҷотдиҳии кӯҳӣ ҳамчунин воситаҳои молиявии захираҳои мавҷудаи конҳо буришҳо ва иншооти хизматрасонӣ, ки бо қарори онҳо аз ҳисоби кам кардани мӯҳлати бартарафсозии садамаҳо, иҷрои босифат ва саривақтии корҳои наҷотдиҳии кӯҳӣ ва шартномавӣ гузаронида шудааст, истифода бурда мешавад.

6. Фонди таъминоти давлатии (Фонди захиравии) қисмҳо ва сохторҳои ҳарбикунонидашудаи наҷотдиҳии кӯҳӣ

19) Барои пардохти эҳтиёҷоти иҷтимоӣ дар қисмҳо ва сохторҳои ҳарбикунонидашудаи наҷотдиҳии кӯҳӣ Фонди таъминоти давлатӣ (Фонди захиравӣ) таъсис дода мешавад, вазифаи дахлдори иҷтимоиро ҳал намуда, хусусияти корҳоро дар шароитҳои экстремалӣ ва барои ҳаёти наҷотдиҳандагони кӯҳӣ махсусан хавфнок, инчунин навбатдории шабонарӯзиро ба ҳисоб мегирад. Фонди таъминоти давлатӣ (Фонди захиравӣ)-и қисмҳо ва сохторҳои ҳарбикунонидашудаи наҷотдиҳии кӯҳӣ ҳармоҳа аз ҳисоби гузаронидани маблағ аз фонди музди меҳнати ҳайати ҳарбикунонидашуда дар ҳаҷми 20 фоиз ташкил карда мешавад.

20) Фонди таъминоти давлатӣ (Фонди захиравӣ) муқаррар гаштааст, барои:

- пардохти кӯмакпулӣ ҳангоми таваллуди фарзанди ҳайати ҳарбикунонидашуда ва марги ҳайати ҳарбикунонидашуда ва аъзои оилаи он;

- пардохти арзиши роҳхатҳо ба санаторияҳо, пансионатҳо ва хонаҳои истироҳат дар ҳудуди Ҷумҳурии Тоҷикистон;

- додани кӯмакпулиҳо барои муолиҷа дар ҳудуди Ҷумҳурии Тоҷикистон;

- пардохти кӯмакпулиҳо барои кор дар рӯзҳои идҳои давлатӣ;

- пардохти кӯмакпулиҳо ба занон барои нигоҳубини кӯдакон;

- пардохти арзиши роҳхатҳо ба муассисаҳои беҳдошти сиҳатии кӯдак;

- пардохти хароҷот барои муоинаи тиббӣ;

- протезмонии дандонҳои респираторчӣ ва ҳайати респираторӣ, ки бо хулосаи комиссияи тиббӣ тасдиқ шудааст;

- пардохти роҳкиро ҳангоми рухсатии меҳнатӣ ва барои муолиҷа танҳо дар ҳудуди Ҷумҳурии Тоҷикистон;

- гузаронидани дигар чорабиниҳо.

21) Кӯмакпулӣ барои чорабиниҳои беҳдошти сиҳатиро як маротиба ё роҳхат ба санатория ё кӯмаки яквақтаи моддӣ барои муолиҷа додан мумкин аст.

22) Пардохт аз воситаҳои молиявии таъминоти давлатӣ танҳо ба ҳайати шахсии қисмҳои ҳарбикунонидашудаи наҷотдиҳии кӯҳӣ бе дарназардошти аъзои оилаи онҳо, ба истиснои пардохти арзиши роҳхатҳо ба муассисаҳои беҳдошти сиҳатии кӯдак амалӣ карда мешавад.

7. Таъминоти нафақавии ҳайати ҳарбикунонидашудаи қисмҳо ва сохторҳои ҳарбикунонидашудаи наҷотдиҳии кӯҳӣ

23) Таъминоти нафақавии ҳайати ҳарбикунонидашудаи қисмҳои ҳарбикунонидашудаи наҷотдиҳии кӯҳӣ мутобиқи қонунгузорӣ амалӣ карда мешавад.

24) Нафақа аз рӯи синну сол барои командирони қисмҳо, дастаҳо ва взводҳои ҳарбикунонидашудаи наҷотдиҳии кӯҳӣ, муовинон ва ёрдамчиёни онҳо, командирони шӯъбаҳо, респираторчиҳо ва намунагирҳо тибқи тартиби муқарраргардида ҳисоб карда мешавад. Нафақа аз рӯи синну сол барои дигар кормандони қисмҳои ҳарбикунонидашудаи наҷотдиҳии кӯҳӣ дар асоси муқарароти умумӣ таъин мегардад.

8. Таъминоти шайъии ҳайати шахсии қисмҳо ва сохторҳои ҳарбикунонидашудаи наҷотдиҳии кӯҳӣ

25) Таъминоти шайъии ҳайати шахсии қисмҳо ва сохторҳои ҳарбикунонидашудаи наҷотдиҳии кӯҳӣ ҷиҳати таъмин бо сару либоси ягона равона карда шудааст.

26) Мақсади бо амволи шайъӣ таъмин намудан қонеъ гардонидани талаботи хизматчиёни ҳарбикунонидашуда бо либоси махсус, пойафзол, либоси тагпӯш, бистар, анҷому ашёи гарм, матоъҳо, нишонаҳои сарисинагӣ ва нишонаҳои фарқкунанда, амволи санитарию хоҷагӣ ва варзишӣ мебошад, ки имконияти фароҳам овардани шароити мусоидро ҷиҳати аз ҷониби онҳо иҷро гардидани вазифаҳо оид ба тайёрии ҳарбӣ ва махсус таъмин мегардонад.

9. Таъминоти техникии қисмҳо ва сохторҳои ҳарбикунонидашудаи наҷотдиҳии кӯҳӣ

27) Таъминоти қисмҳо ва сохторҳои ҳарбикунонидашудаи наҷотдиҳии кӯҳӣ бо техника, асбобу лавозимоти лабораторӣ аз ҳисоби асбобу техникаи қисмҳои ҳарбикунонидашудаи наҷотдиҳии кӯҳӣ, асбобу техникаи Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон, инчунин асбобу техникаи вазорату идораҳои дахлдор ва иншооти хизматрасонӣ тибқи шартнома ба роҳ монда мешавад.