Ҳукумати Ҷумҳурии Тоҷикистон

ҚАРОР

Оид ба тасдиқи Намудҳои воситаҳои махсуси ҳимояи шахсӣ, алоқа ва огоҳонӣ аз хавфу хатар, ки ба шахси ҳимояшаванда дода мешавад ва тартиби додани онҳо

Мутобиқи моддаи 8 Қонуни Ҷумҳурии Тоҷикистон "Дар бораи ҳимояи давлатии иштирокчиёни мурофиаи судии ҷиноятӣ" Ҳукумати Ҷумҳурии Тоҷикистон қарор мекунад:

1) Намудҳои воситаҳои махсуси ҳимояи шахсӣ, алоқа ва огоҳонӣ аз хавфу хатар, ки ба шахси ҳимояшаванда дода мешавад ва тартиби додани онҳо тасдиқ карда шавад (замима мегардад).

2) Вазорати корҳои дохилии Ҷумҳурии Тоҷикистон, Кумитаи давлатии амнияти миллии Ҷумҳурии Тоҷикистон, Хадамоти гумруки назди Ҳукумати Ҷумҳурии Тоҷикистон, Агентии назорати давлатии молиявӣ ва мубориза бо коррупсияи Ҷумҳурии Тоҷикистон, Агентии назорати маводи нашъаовари назди Президенти Ҷумҳурии Тоҷикистон, Вазорати мудофиаи Ҷумҳурии Тоҷикистон чорабиниҳои заруриро ҷиҳати ба шахсони ҳимояшаванда додани воситаҳои махсуси ҳимояи шахсӣ, алоқа ва огоҳонӣ аз хавфу хатар таъмин намоянд.

3) Маблағгузорӣ ва таъминоти моддию техникӣ вобаста ба иҷрои қарори мазкур аз ҳисоби маблағҳои буҷетӣ мутобиқи қонунгузории Ҷумҳурии Тоҷикистон ба амал бароварда мешавад.

Намудҳои воситаҳои махсуси ҳимояи шахсӣ, алоқа ва огоҳонӣ аз хавфу хатар, ки ба шахси ҳимояшаванда дода мешаванд ва тартиби додани онҳо

1) Намудҳои мазкур мутобиқи Қонуни Ҷумҳурии Тоҷикистон "Дар бораи ҳимояи давлатии иштирокчиёни мурофияи судии ҷиноятӣ" таҳия шуда, намудҳои воситаҳои махсуси ҳимояи шахсӣ, алоқа ва огоҳонӣ аз хавфу хатарро (дар оянда - воситаҳои махсус), ҳамчун яке аз чораҳои таъмини бехатарӣ ба шахсони ба ҳимояи давлатӣ гирифташаванда (дар оянда - шахси ҳимояшаванда) ва тартиби додани онҳоро ба танзим медарорад.

2) Ба намудҳои воситаҳои махсуси ҳимояи шахсӣ дохил мешаванд:

- ҷавшан (бронежилет); - таҷҳизоти барқии беҳушкунанда;

- пошдиҳаки газии таркибаш озордиҳанда;

- дигар воситаҳои махсус, ки дар ихтиёри мақомоти татбиқкунандаи чораҳои амниятӣ мавҷуданд.

3) Ба намудҳои воситаҳои махсуси алоқа ва огоҳонӣ аз хавфу хатар дохил мешаванд:

- воситаи радиоии ҳамлу нақлшаванда;

- телефони ноқилӣ;

- телефони алоқаи мобилӣ ё пейҷер.

4) Додани намудҳои воситаҳои махсус ба шахсони ҳимояшаванда аз тарафи мақомоти татбиқкунандаи чораҳои амниятӣ, ки дар моддаи 3 Қонуни зикргардида пешбинӣ шудаанд, муқаррар ва амалӣ карда мешавад.

5) Воситаҳои махсус ба шахсони ҳимояшаванда дар ҳолати мавҷуд будани таҳдиди воқеӣ ба ҳаёт ва саломатии онҳо танҳо дар муддати ҷараёни тахдиди воқеӣ дода мешаванд.

Мақомоти татбиқкунандаи чораҳои амниятӣ ба шахсони ҳимояшаванда воситаҳои махсусро бо тартиби барои мақомоти дахлдор муқарраргардида медиҳад.

6) Асосҳои додани воситаҳои махсус ба шахсони ҳимояшаванда инҳоянд:

- аризаи шахсони ҳимояшаванда;

- муроҷиати раиси суд, роҳбари мақомоти ҳифзи ҳуқуқи дахлдор оид ба қабули чораҳои дахлдори амниятӣ;

- аз тарафи мақомоте, ки бехатарии шахси ҳимояшавандаро таъмин менамояд, гирифтани хабари оперативӣ ё дигар хабари воқеие, ки ба бехатарии ӯ тахдид менамояд.

7) Барои қабули қарор оид ба татбиқи чораҳои амниятӣ розигии шахси ҳимояшаванда ҳатмист.

8) Воситаҳои махсус ба шахсони ҳимояшаванда дар асоси қарори суд (судя), прокурор, сардори мақомоти таҳқиқ ё муфаттиш, роҳбари мақомоти амаликунандаи фаъолияти оперативӣ-ҷустуҷӯӣ, ки дар истеҳсоли онҳо ариза (маълумот) оид ба ҷиноят ё парвандаи ҷиноятӣ мавҷуд мебошад, тибқи талаботи моддаи 12 Кодекси мурофиаи ҷиноятии Ҷумҳурии Тоҷикистон дода мешавад. Инчунин, дар қарор мӯҳлати додани воситаҳои махсус нишон дода мешавад. Мӯҳлат метавонад тамдид шавад, агар тахдиди воқеӣ ба ҳаёт ва саломатии шахси ҳимояшаванда бартараф нашуда бошад (қарори Ҳукумати ҶТ аз 02.03.2013 № 112).

9) Қарор дар бораи додани воситаҳои махсус ҳангоми мавҷуд будани асосҳои кофӣ дарҳол аз лаҳзаи дохил гардидани ариза, муроҷиат ё ин, ки хабари тахдиди воқеии бехатарӣ нисбати шахси ҳимояшаванда қабул карда шуда, дар ин бора ба ин шахс ва суд (роҳбари мақомоти ҳифзи ҳуқуқи дахлдор), ки бо хоҳиши татбиқ намудани чораҳои бехатарӣ нисбати шахси мазкур муроҷиат намудааст, хабар дода мешавад.

10) Ҳангоми ворид гардидани қарори (таъиноти) асосноки аз ҷониби мақомоти қабулкунандаи қарор оид ба интихоб намудани чораҳои амниятӣ, мақомоти татбиқкунандаи чораҳои амниятӣ тибқи замимаи №1 Намудҳои мазкур қарори дахлдор кабул менамояд.

11) Мақомоти татбиқкунандаи чораҳои амниятӣ (бо риоя намудани маълумоти хусусияти махфиятдошта дар бораи шахси ҳимояшаванда), ба суд (судя), прокурор, сардори мақомоти таҳқиқ ё муфаттиш, роҳбари мақомоти амаликунандаи фаъолияти оперативӣ-ҷустуҷӯӣ, ки дар истеҳсолоти онҳо ариза (маълумот) дар бораи ҷиноят ё парвандаи ҷиноятӣ қарор дорад, оид ба интихоб ва натиҷаҳои татбиқи чораҳои амниятӣ, бо роҳи ирсол намудани хабарнома тибқи замимаи № 2 Намудҳои мазкур маълумот медиҳад (қарори Ҳукумати ҶТ аз 02.03.2013 № 112).

12) Ташкили кор, усул, шакл ва методи таъмини муҳофизони шахсӣ дар доираи салоҳияти мақомоти татбиқкунандаи ин чорабиниҳо бо риояи махфият доштани маълумот дар бораи шахсони ҳимояшаванда муайян карда мешавад.

13) Воситаҳои махсус аз тарафи мақомоти татбиқкунандаи чораҳои амниятӣ бо забонхати шахсони ҳимояшаванда дода мешаванд.

Шахсони ҳимояшаванда ӯҳдадоранд, ки истифодабарии бенуқсон ва мақсадноки онҳоро таъмин намояд. Фурӯхтан, ба гарав мондан, ё ба шахси дигар додани воситаҳои махсус тибқи қонунгузории Ҷумҳурии Тоҷикистон боиси ба ҷавобгарӣ кашидан мегардад. Дар ҳолати гум кардан ва вайрон намудани воситаҳои махсуси супоридашуда шахси ҳимояшаванда ӯҳдадор аст, ки арзиши воситаҳои махсусро (ба истиснои ҳолатҳои мудофиаи зарурӣ ва зарурати ниҳоӣ) ҷуброн намояд.

14) Мақомоти татбиқкунандаи чораҳои амниятӣ ба шахсони ҳимояшаванда дар хусуси қоидаҳои нигоҳдошт ва гирифта гаштан, қоидаҳои истифодабарии воситаҳои махсус машғулиятҳо гузаронида, дастурамал медиҳад, ҳамчунин аз тарафи шахсони ҳимояшаванда риоя шудани қоидаҳои истифодабарии воситаҳои зикршударо назорат мебарад.

15) Воситаҳои махсусе, ки ба шахсони ҳимояшаванда дода мешаванд, ҳангоми бекор гардидани чораҳои амниятӣ, бозпас гардонида мешаванд. Шахсони мансабдори салоҳиятдор дар ин бора қарори ваҷҳнок қабул карда, ба шахсони ҳимояшаванда хабар медиҳанд.

Аз болои қарори қабулшуда, шахсони ҳимояшаванда ҳуқуқ доранд ба мақомоти болоӣ, прокурор ва суд шикоят оранд. Шикоят аз лаҳзаи ворид шудан бетаваққуф баррасӣ карда мешавад.

Ниг. ба Замима.