Низомномаи Фонди чорабиниҳои зиддиэпизоотӣ

1. Муқаррароти умумӣ

1) Фонди чорабиниҳои зиддиэпизоотӣ (минбаъд Фонд) тибқи моддаи 3 Қонуни Ҷумҳурии Тоҷикистон "Дар бораи байторӣ" ва бо мақсади самаранок гузаронидани чорабиниҳои зиддиэпизоотӣ, ҷуброни зарар дар натиҷаи мусодира ва нобуд кардани ҳайвонот ва маҳсулоти ҳайвонот, ки барои саломатии ҳайвонот ва инсон хатарнок мебошанд, таъсис дода шудааст.

2) Фонд дар назди Хадамоти назорати давлатии байтории Вазорати кишоварзии Ҷумҳурии Тоҷикистон ташкил карда шуда, мувофиқи қонунгузории Ҷумҳурии Тоҷикистон ва ҳамин Низомнома амал мекунад.

3) Фонди мазкур аз ҳисоби маблағҳои дар Буҷети давлатӣ барои чорабиниҳои зиддиэпизоотӣ пешбинигардида, ҷалби грантҳои ташкилотҳои байналмилалӣ, сарчашмаҳои худӣ ва дигар сарчашмаҳои маблағгузорӣ, оид ба қонунгузории Ҷумҳурии Тоҷикистон мухолифат намекунанд, ташаккул меёбад.

4) Истифодаи мақсадноки Фондро Хадамоти назорати давлатии байторӣ амалӣ мекунад. Назорати истифодаи мақсадноки Фонд мувофиқи қонунгузории Ҷумҳурии Тоҷикистон аз тарафи Вазорати кишоварзии Ҷумҳурии Тоҷикистон амалӣ карда мешавад. Ҳангоми зарурат ва бо мақсади пешгирии паҳншавии бемориҳои ниҳоят хавфнок, ки барои ҳайвонот ва одам умумӣ мебошанд, бояд пешниҳоду дастурҳои Хадамоти назорати давлатии санитарию эпидемиологии Вазорати тандурусгии Ҷумҳурии Тоҷикистон ба инобат гирифта шаванд.

5) Ташхис ва гузаронидани ҳар гуна чорабиниҳои пешгирикунанда, ки ба гурӯҳи номгӯи бемориҳои дар қарори Ҳукумати Ҷумҳурии Тоҷикистон аз 3 апрели соли 2007, № 182 "Дар бораи Хадамоти назорати давлатии байторӣ" нишондодашуда дохил намешаванд, аз тарафи сохторҳои Хадамоти назорати давлатии байтории Вазорати кишоварзии Ҷумҳурии Тоҷикистон музднок анҷом дода шуда, маблағҳои аз ин ҳисоб бадастомада ба суратҳисоби маркази хазинадорӣ таҳвил дода мешаванд ва истифодаи минбаъдаи онҳо бо тартиби муайяннамудаи қонунгузории Ҷумҳурии Тоҷикистон сурат мегирад.

6) Банди 5 Низомномаи мазкур бо дарназардошти сатҳи даромаднокии ҳар як хоҷагӣ, новобаста аз шакли моликияташ ва сатҳи

зиндагии шаҳрвандон амалӣ гардида, дараҷаи камбизоатии мардум ба асос гирифта мешавад.

2. Сметаи хароҷоти Фонд

7) Маблағгузории Фонди чорабиниҳои зиддиэпизоотӣ дар асоси меъёрҳои хароҷоти молиявӣ сурат гирифта, ба қисми хароҷоти буҷети ҳамаи сатҳҳо дар зерфасли "Чорабиниҳои зиддиэпизоотӣ" нишон дода шуда, тибқи Низомномаи мазкур тақсим карда мешавад.

8) Харидорӣ намудани эмдоруҳо бар зидди бемориҳои сӯхтанӣ, ҳорӣ, вабои сумдарди ҳайвонот, тоуни ҳайвони майдаи шохдор, брутселлёз, сил, бемории нағзаки гӯсфанду буз, бемории Нюкаслаи паррандаҳо, инчунин маводи ташхисии онҳо (реактивҳо, рангҳо, ҳайвоноти озмоишӣ, диагностикумҳо, маводи безарарнамоӣ) барои муайян намудани ин бемориҳо бо дарназардошти вазъи эпизоотии ҷумҳурӣ тавассути тендер сурат мегирад.

9) Маблағҳои Фонд барои анҷом додани корҳои зерин дар шакли фоиз аз маблағи умумии солонаи Фонд истифода бурда мешаванд:

- харидорӣ, нигаҳдорӣ, интиқол ва истифодаи маводи пешгирӣ, ташхис ва безарарнамоии зидди бемориҳое, ки ташхис ва пешгирии онҳо барои ҳамаи шакли хоҷагидорӣ ва шаҳрвандон аз ҳисоби буҷети давлатӣ гузаронида мешаванд - 70 фоиз;

- хароҷоти сафарҳои хизматии байторон ба манбаҳои бемориҳои сироятии барои ҳайвонот ва одам умумӣ, маводи сӯхт ва молиданӣ барои нақлиёт ва сӯзонидани ҷасади ҳайвонот, либосҳои махсус - 4,5 фоиз;

- пардохти музди меҳнати иловагии мутахассисони байтории дар манбаҳои эпизоотӣ фаъолияткарда ба андозаи дукаратаи музди меҳнати вазифавии онҳо - 0,5 фоиз;

- маблағ барои таҳрир ва чопи ҳарсолаи шиносномаи фардӣ ва варақаҳои бақайдгирии ҳайвонот, бо мақсади нишонагузории онҳо, бо дарназардошти ҷуброн кардани хароҷот аз тарафи соҳибони чорво, - 5 фоиз;

- ҷуброни зарар дар натиҷаи мусодира ва нобуд кардани ҳайвонот ва маҳсулоти ҳайвоноти шахсони воқеӣ ва ҳуқуқӣ, ки барои саломатии ҳайвонот ва инсон хатарнок мебошанд - 10 фоиз;

- харидорӣ намудани дастгоҳ ва таҷҳизоти махсус - 10 фоиз.