Низомномаи Гурӯҳи миллии ҳамоҳангсозии байниидоравӣ оид ба масъалаҳои татбиқи Стратегияи миллии идора намудани сарҳад

1) Гурӯҳи миллии ҳамоҳангсозии байниидоравӣ оид ба масъалаҳои татбиқи Стратегияи миллии идора намудани сарҳад (минбаъд-Гурӯҳи ҳамоҳангсозӣ) мақоми машваратӣ буда, дар давраи амалигардонии Стратегияи миллии идора намудани сарҳад (минбаъд Стратегия) таъсис дода мешавад ва фаъолияти вазорату идораҳои Ҷумҳурии Тоҷикистонро оид ба татбиқи Стратегия ҳамоҳанг месозад.

2) Дар фаъолияти худ Гурӯҳи ҳамоҳангсозӣ мутобиқи Конститутсияи (Сарқонуни) Ҷумҳурии Тоҷикистон, қонунҳо ва дигар санадҳои меъёрии ҳуқуқии Ҷумҳурии Тоҷикистон, санадҳои байналмилалии ҳуқуқӣ, ки аз ҷониби Ҷумҳурии Тоҷикистон эътироф шудаанд, ҳамчунин мутобиқи Низомномаи мазкур амал менамояд.

3) Вазифаи асосии Гурӯҳи ҳамоҳангсозӣ таъмин намудани татбиқи ҳамоҳангшудаи Стратегия аз ҷониби вазорату идораҳо мебошад.

4) Бо мақсади иҷрои вазифаҳои гузошташуда Гурӯҳи ҳамоҳангсозӣ вазифаҳои зеринро амалӣ менамояд:

- ташкили фаъолияти муштарак ва ҳамоҳангсозӣ байни вазорату идораҳои Ҷумҳурии Тоҷикистон ҳангоми омодасозии пешниҳодҳо оид ба татбиқи Стратегия;

- банақшагирӣ ва муайянсозии афзалиятҳо дар татбиқи Стратегия;

- назорати аз ҷониби вазорату идораҳои Ҷумҳурии Тоҷикистон иҷро намудани нақшаи татбиқи Стратегия ва карорҳое, ки аз ҷониби Гурӯҳи ҳамоҳангсозӣ қабул шудаанд;

- таъмини алоқаи доимӣ бо созмонҳои байналмилалии манфиатдор ва кишварҳои мададрасон, ки дар татбиқи Стратегия иштирок мекунанд, иттилоотонии онҳо дар бораи рафти татбиқи Стратегия;

- пешкаш кардани пешниҳодҳо ба Ҳукумати Ҷумҳурии Тоҷикистон оид ба татбиқи Стратегия, иттилоотонии Ҳукумати Ҷумҳурии Тоҷикистон оид ба рафти татбиқи Стратегия.

5) Гурӯҳи ҳамоҳангсозӣ ҳуқуқ дорад:

- бо тартиби муқарраршуда ба Ҳукумати Ҷумҳурии Тоҷикистон дар бораи татбиқи Стратегия таклифҳо пешниҳод кунад;

- аз вазорату идораҳои дахлдор дар бораи амалисозии Стратегия пешниҳодҳо қабул намояд;

- бо вазорату идораҳои дахлдор масъалаҳои вобаста ба амалисозии Стратегия ва такмили санадҳои меъёрии ҳуқуқиро ҳамоҳанг созад;

- дар ҷаласаҳои худ гузоришҳои вазорату идораҳои дахлдорро оид ба татбиқи чорабиниҳои мушаххас, ки дар Нақшаи иҷрои Стратегия пешбинӣ шудаанд, гӯш кунад, пешниҳод кардани маводи заруриро талаб намояд;

- ба Ҳукумати Ҷумҳурии Тоҷикистон, созмонҳои байналмилалии манфиатдор ва кишварҳои мададрасон лоиҳаҳоро барои ворид кардан ба буҷети давлатӣ ва дастрас кардани кӯмаки байналмилалӣ пешниҳод намояд;

- гурӯҳҳои кории байниидоравӣ ва комиссияҳои коршиносонро барои амалисозии бандҳои алоҳидаи Стратегия таъсис диҳад;

- аз вазорату идораҳои дахлдор иттилоот дар бораи лоиҳаҳои ба нақша гирифта ва амалишавандаро дархост намояд, ки ба масъалаҳои идора намудани сарҳад вобастаанд;

- бо тартиби муқарраршуда барои кор дар Гурӯҳи ҳамоҳангсозӣ кормандони вазорату идораҳои дахлдори Ҷумҳурии Тоҷикистонро ҷалб намояд.

6) Ҳайати Гурӯҳи ҳамоҳангсозӣ аз ҷониби Ҳукумати Ҷумҳурии Тоҷикистон тасдиқ карда мешавад.

7) Раиси Гурӯҳи ҳамоҳангсозӣ, ҳамзамон ҳамоҳангсози миллӣ оид ба масъалаҳои татбиқи Стратегия буда, дорои ваколатҳои зерин мебошад:

- фаъолияти Гурӯҳи ҳамоҳангсозиро роҳбарӣ менамояд;

- роҳбарии умумии фаъолияти Котиботи байниидоравиро амалӣ менамояд;

- барномаҳо ва нақшаҳои кории Гурӯҳи ҳамоҳангсозиро тасдиқ менамояд;

- вазифаҳоро байни аъзои Гурӯҳи ҳамоҳангсозӣ тақсим менамояд;

- назорати бевоситаро аз рӯи иҷрои қарорҳои Гурӯҳи ҳамоҳангсозӣ амалӣ менамояд;

- дар ҳамоҳангсозӣ бо аъзои Гурӯҳи ҳамоҳангсозӣ афзалиятҳоро дар татбиқи Стратегия муайян менамояд;

- низомнома ва ҳайати Котиботи байниидоравиро тасдиқ менамояд;

Гурӯҳи ҳамоҳангсозро дар муносибат бо созмонҳои байналмилалии манфиатдор ва кишварҳои мададрасон муаррифӣ менамояд;

- ба Ҳукумати Ҷумҳурии Тоҷикистон дар бораи натиҷаҳои фаъолияти Гурӯҳи ҳамоҳангсозӣ ва татбиқи Стратегия ҳисобот медиҳад.

8) Барои ташкили кор ва таъмини фаъолияти Гурӯҳи ҳамоҳангсозӣ Котиботи байниидоравӣ таъсис дода мешавад (минбаъд Котибот), ки мақоми кории Гурӯҳи ҳамоҳангсозӣ мебошад.

9) Котибот фаъолияти худро дар асоси Низомнома, ки аз ҷониби Гурӯҳи ҳамоҳангсозӣ тасдиқ мегардад, ба poҳ монда, вазифаҳои зеринро амалӣ менамояд:

- ташкил ва роҳбарии фаъолияти гурӯҳҳои кории байниидоравӣ оид ба масъалаҳои татбиқи Стратегия;

- ташкили ҳамоҳангсозӣ ва фаъолияти муштарак байни вазорату идораҳо, созмонҳои байналмилалии манфиатдор ва кишварҳои мададрасон ҳангоми таҳияи пешниҳодот ва татбиқи лоиҳаҳо;

- баҳисобгирӣ, таҳлил ва ба танзим даровардани лоиҳаҳо дар соҳаи идора намудани сарҳад, ки аз ҷониби вазорату идораҳои дахлдор ва созмонҳон байналмилалии манфиатдор ва кишварҳои мададрасон татбиқ мешаванд;

- расонидани кӯмаки методӣ, машваратӣ ва техникӣ ба вазорату идораҳо, гурӯҳҳои кории дохилиидоравиву байниидоравӣ оид ба омодасозии пешниҳодҳо, таҳия ва татбиқи лоиҳаҳои мушаххас;

- ҷамъоварӣ, таҳлил, арзёбӣ ва ҷамъбасти пешниҳодоте, ки аз ҷониби гурӯҳҳои кории байниидоравии вазорату идораҳо оид ба татбиқи Стратегия ворид мешаванд, пешниҳоди онҳо барои тасдиқи Гурӯҳи ҳамоҳангсозӣ;

- муаррифии лоиҳаҳои аз ҷониби Гурӯҳи байниидоравӣ тасдиқшуда дар назди созмонҳои байналмилалии манфиатдор ва кишварҳои мададрасон, ташкили татбиқи ин лоиҳаҳо ва назорат аз ҷараёни иҷрои онҳо, огоҳсозии донорҳо дар бораи рафти татбиқи Стратегия;

- таъмини алоқаи доимӣ бо созмонҳо ва донорҳои байналмилалӣ, баргузор намудани машваратҳо, мизҳои мудаввар, мулоқотҳои кӯтоҳ ва семинарҳо;

- пеш бурдани коргузории Гурӯҳи ҳамоҳангсозӣ, омодасозии ҷаласаҳо ва таҳияи маводҳои ҷаласаҳои Гурӯҳи ҳамоҳангсозӣ, омодасозӣ ва пешниҳоди гузоришҳо ба Гурӯҳи ҳамоҳангсозӣ дар бораи фаъолияти вазорату идораҳо, гурӯҳҳои кории дохилиидоравӣ ва байниидоравӣ дар доираи татбиқи лоиҳаҳо;

- омодасозии пешниҳодҳо оид ба ворид кардани тағйироту иловаҳо ба Стратегия ва Нақшаи иҷрои он.

10) Ҳайати Котибот аз намояндагони вазорату идораҳои Ҷумҳурии Тоҷикистон, ки дар татбиқи Стратегия иштирок мекунанд, иборат буда, ба ҳайати он метавонад дар асоси созишҳои дуҷониба бо созмонҳои байналмилалии манфиатдор ва кишварҳои мададрасон, мушовирони байналмиллаливу миллӣ ва кормандони маъмуриву техникӣ ба кор ҷалб карда шаванд.

11) Гурӯҳи ҳамоҳангсозӣ фаъолияти худро мутобиқи барномаву нақшаҳои аз ҷониби он тасдиқшуда ташкил менамояд.

Ҷаласаҳои Гурӯҳи ҳамоҳангсозӣ ҳангоми зарурат, вале на камтар аз як маротиба дар як семоҳа, баргузор мешаванд.

12) Қарорҳои Гурӯҳи ҳамоҳангсозӣ дар сурате қабул мегарданд, ки агар дар онҳо камаш аз се ду ҳиссаи аъзои Гурӯҳи ҳамоҳагсозӣ иштирок дошта бошанд. Қарорҳо бо аксарияти умумии овозҳои аъзои ҳузурдоштаи Гурӯҳи ҳамоҳангсозӣ қабул карда мешаванд.

13) Қарорҳои Гурӯҳи ҳамоҳангсозӣ ба таваҷҷӯҳи мақоми манфиатдор дар шакли иқтибос аз протоколи ҷаласаҳои Гурӯҳи ҳамоҳангсозӣ расонида мешаванд.

14) Тавсияҳои Гурӯҳи ҳамоҳангсозӣ, ки ба ҳалли масъалаҳои бо татбиқи Стратегия алоқамандандбуда мусоидат менамоянд, бояд бо тариқи ҳатмӣ аз ҷониби мақомоти дахлдори давлатӣ баррасӣ карда шаванд.

Ҳайати Гурӯҳи миллии ҳамоҳангсозии байни идоравӣ оид ба масъалаҳои татбиқи Стратегияи миллии идора намудани сарҳад

1. Раиси Гурӯҳи миллии ҳамоҳангсозии байнмидоравӣ, Ҳамоҳангсози миллӣ оид ба масъалаҳои татбиқи Стратегияи миллии идора намудани сарҳад - муовини якуми раиси Кумитаи давлатии амнияти миллии Ҷумҳурии Тоҷикистон-фармондеҳи қӯшунҳои сарҳадии Кумитаи давлатии амнияти миллии Ҷумҳурии Тоҷикистон.

2. Муовини раиси Гурӯҳи миллии ҳамоҳангсозии байниидоравӣ - муовини вазири корҳои хориҷии Ҷумҳурии Тоҷикистон

3. Аъзои Гурӯҳи ҳамоҳангсозӣ:

- муовини раиси Кумитаи давлатии амнияти миллии Ҷумҳурии Тоҷикистон;

- муовини вазири адлияи Ҷумҳурии Тоҷикистон;

- муовини вазири молияи Ҷумҳурии Тоҷикистон;

- муовини вазири рушди иқтисод ва савдои Ҷумҳурии Тоҷикистон;

- муовини вазири корҳои дохилии Ҷумҳурии Тоҷикистон;

- муовини вазири нақлиёти Ҷумҳурии Тоҷикистон;

- муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон;

- муовини вазири меҳнат, муҳоҷират ва шуғли аҳолии Ҷумхурии Тоҷикистон;

- муовини раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон;

- муовини якуми раиси Кумитаи давлатии идораи замин ва геодезии Ҷумҳурии Тоҷикистон;

- муовини раиси Кумитаи бехатарии озуқавории назди Ҳукумати Ҷумҳурии Тоҷикистон;

- муовини директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон;

- муовини директори Агентии назорати маводи нашъаовари назди Президенти Ҷумҳурии Тоҷикистон;

- муовини якуми фармондеҳи қӯшунҳои сарҳадии Кумитаи давлатии амнияти миллии Ҷумҳурии Тоҷикистон

- сардори сарситоди қӯшунҳои сарҳадии Кумитам давлатии амнияти миллии Ҷумҳурии Тоҷикистон;

- муовини якуми сардори Хадамоти гумруки назди Ҳукумати Ҷумҳурии Тоҷикистон;

- муовини директори Агентии авиатсияи граждании назди Ҳукумати Ҷумхурии Тоҷикистон.