бо қарори Ҳукумати
Ҷумҳурии Тоҷикистон
аз 26 июни соли 2026,
№ 401тасдиқ шудааст
СОЗИШНОМА байни Ҳукумати Ҷумҳурии Тоҷикистон ва Ҳукумати Ҷумҳурии Ӯзбекистон оид ба татбиқи мутақобилаи низомҳои электронии сертификатсияи пайдоиши молҳо
Ҳукумати Ҷумҳурии Тоҷикистон ва Ҳукумати Ҷумҳурии Ӯзбекистон, ки минбаъд Тарафҳо номида мешаванд,
бо дарназардошти муқаррароти Протокол оид ба ворид намудани тағйирот ба Созишнома дар бораи Қоидаҳои муайян кардани кишвари пайдоиши молҳо дар Иттиҳоди Давлатҳои Мустақил аз 20 ноябри соли 2009, ки 20 ноябри соли 2013 ба имзо расидааст,
Қоидаҳои муайян кардани кишвари пайдоиши молҳоро, ки бо Карори Шурои сарони ҳукуматҳои Иттиҳоди Давлатҳои Мустақил аз 24 сентябри соли 1993 (минбаъд - Қоидаҳо аз 24 сентябри соли 1993) тасдиқ шудаанд, ба роҳбарӣ гирифта,
бо эътирофи зарурати сода кардани расмиёт ва кам кардани муҳлати назорати гумрукӣ барои воридоти молҳо ба ҳудуди давлатҳои Тарафҳо,
ба мувофикаи зерин расиданд:
Моддаи 1 Мафҳумҳо
Барои мақсадхои Созишномаи мазкур мафҳумҳои зерин истифода мешаванд:
«сертификат» - сертификати пайдоиши мол бо шакли СТ-1, ки ҳуҷҷате мебошад, ки аз ҷониби мақоми ваколатдор дода шуда, пайдоиши молро тасдиқ мекунад;
«санҷиш» - муқаррар кардани далели дода шудани сертификат аз ҷониби мақомоти ваколатдори Тарафҳо ва дурустии маълумоти дар онҳо мавҷудбуда;
«низоми электронии сертификатсияи пайдонши молҳо» (минбаъд - НЭСПМ) - низоми иттилоотии мақоми ваколатдори марказӣ, ки маълумотро дар бораи сертификатҳои аз ҷониби мақомоти ваколатдори давлатҳои Тарафҳо додашуда дар бар мегирад;
...
