ҲУКУМАТИ ҶУМҲУРИИ ТОҶИКИСТОН

ҚАРОР

Мутобиқи моддаҳои 8 ва 14 Қонуни Ҷумҳурии Тоҷикистон «Дар бораи сармоя ва ҳавасмандгардонии фаъолияти сармоягузорӣ» Ҳукумати Ҷумҳурии Тоҷикистон қарор мекунад:

1. Лоиҳаи созишномаи сармоягузорӣ байни Ҳукумати Ҷумҳурии Тоҷикистон ва Ҷамъияти дорои масъулияти маҳдуди «Филиззот» оид ба лоиҳаи бунёди маҷмааи саноатӣ маъқул дониста шавад.

2. Номгӯйи молҳо, воситаҳои нақлиёт, техника ва таҷҳизоте, ки аз ҷониби Ҷамъияти дорои масъулияти маҳдуди «Филиззот» оид ба лоиҳаи бунёди маҷмааи саноатӣ бо мақсади азхудкунии конҳои канданиҳои фоиданок, сохта ба истифода додани корхонаҳои истихроҷи канданиҳои фоиданок, коркарди онҳо ва истеҳсоли маҳсулоти ниҳоӣ ба Ҷумҳурии Тоҷикистон воридшаванда, ки пас аз тасдиқ гардидани созишномаи сармоягузорӣ аз ҷониби Маҷлиси намояндагони Маҷлиси Олии Ҷумҳурии Тоҷикистон аз пардохтҳои гумрукӣ тибқи созишномаи сармоягузорӣ озод карда мешаванд, тасдиқ карда шавад (замима мегардад).

3. Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон созишномаи сармоягузории мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.

4. Кумитаи давлатии сармоягузорӣ ва идораи амволи давлатии Ҷумҳурии Тоҷикистон бо тартиби муқарраргардида бо Ҷамъияти дорои масъулияти маҳдуди «Филиззот» сана ва маҳалли имзои созишномаи сармоягузории мазкурро мувофиқа намояд.

5. Созишномаи сармоягузории мазкур пас аз ба имзо расидан ба Маҷлиси намояндагони Маҷлиси Олии Ҷумҳурии Тоҷикистон барои тасдиқ равона карда шавад.

6. Хадамоти гумруки назди Ҳукумати Ҷумҳурии Тоҷикистон саривақт гузаронидани расмиёти гумрукии молҳо, воситаҳои нақлиёт, техника ва таҷҳизоти воридшаванда ва назорати истифодабарии мақсадноки онҳоро таъмин намояд.

СОЗИШНОМАИ САРМОЯГУЗОРӢ БАЙНИ ҲУКУМАТИ ҶУМҲУРИИ ТОҶИКИСТОН ВА ҶАМЪИЯТИ ДОРОИ МАСЪУЛИЯТИ МАҲДУДИ «ФИЛИЗЗОТ» ОИД БА ЛОИҲАИ БУНЁДИ МАҶМААИ САНОАТӢ

Созишномаи сармоягузорӣ байни Ҳукумати Ҷумҳурии Тоҷикистон ва Ҷамъияти дорои масъулияти маҳдуди «Филиззот» (минбаъд – Тарафҳо) оид ба лоиҳаи бунёди маҷмааи саноатӣ (минбаъд – Созишнома) бо мазмуни зерин ба имзо расонида шудааст:

1) Ҳукумати Ҷумҳурии Тоҷикистон (минбаъд – Ҳукумат) дар шахсияти Кумитаи давлатии сармоягузорӣ ва идораи амволи давлатии Ҷумҳурии Тоҷикистон (минбаъд – мақоми ваколатдори давлатӣ) ва

2) Ҷамъияти дорои масъулияти маҳдуди «Филиззот» (минбаъд – Сармоягузор), ки тибқи қонунгузории Ҷумҳурии Тоҷикистон таъсис дода шудааст ва амал мекунад:

МУҚАДДИМА

- бо дар назар доштани муқаррароти Қонуни Ҷумҳурии Тоҷикистон «Дар бораи сармоя ва ҳавасмандгардонии фаъолияти сармоягузорӣ»;

- бо дар назар доштани он ки тамоми маъданҳои фоиданок, аз ҷумла конҳои дар рӯйи замин ё дар қаъри замини Ҷумҳурии Тоҷикистон ҷойгирбуда, моликияти истисноии Ҷумҳурии Тоҷикистон мебошанд;

- бо дар назар доштани он ки бо мақсади рушди соҳаҳои истихроҷи маъдан ва металлургияи иқтисоди кишвар, рушди иқтидорҳои истеҳсолӣ, афзоиши иқтидори содиротӣ ва ташкили ҷойҳои нави корӣ Ҳукумат ба Сармоягузор, дар маҷмуъ (инфрасохтори ҳамроҳи лоиҳа) тибқи шартҳои Созишномаи мазкур имкониятҳои зеринро пешниҳод менамояд: (i) истифода ва коркарди маҷмуии кони «Чоре» ва конҳои дигаре, ки ҳуқуқи ҷустуҷӯйӣ ва истифодабарии онҳо (минбаъд – кон) бо мақсади истихроҷи маъданҳои фоиданок ба Сармоягузор дода мешаванд, (ii) лоиҳакашӣ, сохтмон ва истифодабарии корхонаи истихроҷ ва коркарди маҷмуии маъданҳои фоиданок дар ҳамаи конҳо ва корхонаи металлургӣ, (iii) лоиҳакашӣ ва сохтмони инфрасохтори дигари зарурӣ, аз ҷумла иҷтимоии зарурӣ барои ноил гардидан ба мақсадҳои лоиҳа, рушди сармоягузор ва минтақа;

- бо дар назар доштани он ки амалисозии лоиҳа ва Созишнома набояд ба муҳити зист ва амнияти экологии минтақа зарар расонад;

- бо инобати он ки Сармоягузор уҳдадориҳоро ҷиҳати таъмини маблағгузории лоиҳа дар давоми муҳлат ва мақсадҳои дар Созишнома муайянгардида ба худ мегирад;

- бо эътирофи он ки низоми имтиёзу кафолатҳои дар Созишнома пешбинигардида бояд сармоягузориҳои хусусӣ ва рушди иқтисодро ҳавасманд гардонида, ба афзоиши истифодаи захираҳои иқтисодӣ ва баланд бардоштани сатҳи зиндагӣ дар минтақа мусоидат намоянд;

- бо дар назар доштани он ки Ҳукумат ба қарор омад, ки баимзорасонии Созишномаи мазкур тарзи самараноки маблағгузории Сармоягузор (i) барои амалисозии лоиҳа, (ii) рушди соҳаи канданиҳои фоиданок, (iii) рушди иқтидорҳои истеҳсолӣ ва зиёд гардонидани иқтидори содиротӣ эътироф менамояд;

- бо мақсади рушд додани соҳаи саноати кӯҳӣ, инчунин афзоиш додани истеҳсоли маҳсулоти ватанӣ, воридоти технологияи муосир, ҷалби сармоягузориҳои мустақими дохилӣ ва хориҷӣ;

- бо дар назар доштани он ки дар натиҷаи тибқи Созишномаи мазкур аз тарафи Сармоягузор ба зиммаи худ гирифтани уҳдадорӣ ҷиҳати ҳадди имкон истифода бурдани қувваи кории маҳаллии мавҷуда, ки дорои малакаи корӣ, таҷриба ва тахассуси дахлдор барои амалисозии лоиҳа мебошад, Созишнома бояд барои афзоиши шуғли аҳолии кишвар мусоидат кунад;

- бо дарназардошти он ки Сармоягузор бо истифода аз технологияҳои пешрафта, таҷҳизоти муосир ва омода намудани мутахассисони баландихтисос бо мақсади азхудкунии маҷмуии конҳои канданиҳои фоиданок, таъсис додан, сохтан ва ба истифода додани корхонаҳо ҷиҳати коркарди канданиҳои фоиданок; коркарди амиқ, маҷмуӣ ва омехтаи ашёи хоми минералӣ ва қонеъ намудани талаботи кишвар бо маҳсулоти ниҳоии соҳаи кӯҳкорӣ саҳмгузорӣ менамояд. Дар натиҷа тамоми фаъолияти номбурда занҷираи ягонаи истеҳсолии истихроҷи канданиҳои фоиданок ва маъданҳои минералиро ташкил дода, баҳри истеҳсоли маҳсулоти ниҳоии дорои арзиши иловагии баланд равона хоҳанд шуд;

- дар робита ба гуфтаҳои боло ва бо инобати уҳдадориҳои мутақобила, ки дар Созишномаи мазкур муқаррар гардидаанд, инчунин манфиати мутақобилаи аз он бароянда, Ҳукумат ва Сармоягузор (дар якҷоягӣ «Тарафҳо» ва дар алоҳидагӣ «Тараф» номида мешаванд) ба мувофиқаи зерин расиданд:

МОДДАИ 1. МАФҲУМҲО ВА ТАФСИРИ ОНҲО

1.1. Барои ноил шудан ба мақсадҳои Созишномаи мазкур мафҳумҳои зерин истифода мешаванд, ки агар матн маънои дигарро тақозо накунанд ва ё бо тарзи дигар муайян нашуда бошанд, ин мафҳумҳо маънои зеринро доранд:

- Созишнома – созишномаи сармоягузории баимзорасонидашудаи байни Ҳукумати Ҷумҳурии Тоҷикистон ва Сармоягузор оид ба амалисозии лоиҳа (аз ҷумла замимаҳо ва тамоми тағйиру иловаҳое, ки метавонанд минбаъд ба созишномаи сармоягузорӣ ворид карда шаванд);

- мақоми ваколатдори давлатӣ – Кумитаи давлатии сармоягузорӣ ва идораи амволи давлатии Ҷумҳурии Тоҷикистон;

- Ҳукумат – Ҳукумати Ҷумҳурии Тоҷикистон;

- Сармоягузор – ҶДММ «Филиззот», ҷамъиятҳои фаръиву вобаста ва шаклҳои дигари ташкилию ҳуқуқии шахсони ҳуқуқӣ, ки ҶДММ «Филиззот» муассис/иштирокдори онҳо мебошад ва барои амалисозии лоиҳа вобаста гардидаанд, ҳама гуна тарафҳои дигар, ки тавассути воридшавӣ ба сармояи оинномавии ҷамъиятҳои фаръиву вобастаи ҶДММ «Филиззот» сармоягузор (иштирокдор, ҳамсармоягузор) мешаванд;

- лоиҳа – лоиҳаи сармоягузорӣ оид ба омӯзиш, ҷустуҷӯ, истихроҷ, истифода, коркарди маҷмуии кон бо мақсади истихроҷи канданиҳои фоиданок ва маъданҳои минералӣ барои истеҳсоли маҳсулоти ниҳоӣ, инчунин маънои ҳама гуна чорабиниҳои дар асосноккунии техникию иқтисодии лоиҳа пешбинигардида;

- объектҳои лоиҳа – ҳамаи объектҳои (аз ҷумла корхонаҳо ҳамчун комплекси молумулкӣ) дар лоиҳа пешбинишуда, ки бояд дар доираи амалисозии лоиҳа сохта, таҷдид, барқарор ва истифода шаванд;

- инфрасохтори ҳамроҳи лоиҳа – инфрасохтори махсуси истеҳсолию техникӣ ё истеҳсолию техникии ёрирасон, ки дар лоиҳа пешбинӣ шуда, барои амалисозии босамари лоиҳа ё таъиноти дигар зарур мебошад;

- корхонаҳо – ҳамаи корхонаву воҳидҳои сохторӣ ва алоҳидаи Сармоягузор, ки ҷиҳати истихроҷи маъдан ва коркарди он бо мақсади истеҳсоли маҳсулоти ниҳоӣ, аз ҷумла корхонаҳои бойгардонӣ ва металлургӣ, ки дар онҳо маъданҳо ғанӣ гардида, ба гудохтан омода карда мешаванд; коргоҳҳои аффинаж ва коргоҳҳои дигаре, ки дар соҳаи коркарди маъданҳо истифода бурда мешаванд ва баҳри амалӣ намудани корҳои иктишофӣ-геологӣ, азхудкунии кон, истихроҷ, логистика, коркард, фурӯш ва баста шудани кон равона карда мешаванд;

- қонунгузории татбиқшаванда – санадҳои меъёрии ҳуқуқии амалкунандаи Ҷумҳурии Тоҷикистон;

- санаи эътибор пайдо намудан – маънои дар банди 2.1. моддаи 2 Созишномаи мазкур пешбинишударо дорад;

- муҳлати созишнома – муҳлати дар банди 2.2. моддаи 2 Созишнома пешбинишуда;

- созишномаи паймонкорӣ – дар маҷмуъ ҳамаи созишномаҳое, ки Сармоягузор бо як ё якчанд паймонкор барои лоиҳакашӣ, тарҳрезӣ, сохтмон, таҷдид ва ба истифода додани объектҳои лоиҳа, иҷрои корҳо ва пешниҳоди хизматрасониҳои дигар дар ҷараёни амалисозии лоиҳа ба имзо мерасонад;

- паймонкор – шахси ҳуқуқӣ ва шахси воқеие, ки дар асоси Созишномаи паймонкорӣ бо Сармоягузор ҷиҳати амалисозии лоиҳа бо таҳвили молҳо, иҷрои корҳо, пешниҳоди хизматрасониҳо ва дар шакли дигар ҳамкорӣ менамояд;

- ҳуҷҷатҳои лоиҳавӣ – маҷмуи тамоми ҳуҷҷатҳо ҷиҳати ба таври пурра ва дахлдор татбиқ намудани лоиҳа;

- ҳуҷҷатҳои молиявӣ – дар маҷмуъ ҳамаи созишномаҳои маблағгузории қарзӣ ва ҳиссавие, ки Сармоягузор бо мақсади маблағгузории амалисозии лоиҳа бастааст ё мебандад ва ҳама гуна ҳуҷҷатҳои дигареро, ки Сармоягузор метавонад бо мақсади амалисозии лоиҳа ба расмият дарорад, ба истисноӣ ҳуҷҷатҳои лоиҳавӣ;

- ҳолати рафънопазир (форс-мажор) – ҳодисае, ки аз иродаи Тарафҳо вобаста набуда, тағйироти заминаи меъёрии ҳуқуқӣ, буҳрони иқтисодӣ, эпидемия, ҳолати фавқулода, офатҳои табиӣ, амалиёти ҳарбӣ, таҳдидҳои мустақими ҳуҷум ё ҳодисаҳои дигарро, ки метавонанд ба амалисозии лоиҳа таъсир расонанд, дар бар мегирад;

- андоз – ҳамаи андозҳое, ки мувофиқи қонунгузории андоз муқаррар карда мешаванд;

- (АТИ) асосноккунии техникию иқтисодӣ – ҳуҷҷате, ки бояд тамоми ҷанбаҳои дорои аҳаммияти муҳим барои амалисозии лоиҳаро бо дарназардошти меъёрҳои ҳатмии қонунгузории татбиқшаванда дар соҳаи ҳифзи муҳити зист ва бехатарии саноатиро дар бар гирифта, мутобиқи таҷрибаи қабулшуда тартиб дода шавад;

- мақомоти ваколатдори давлатии дахлдор – вазоратҳо, кумитаҳо, агентиҳо, хадамотҳо, ташкилотҳо, муассисаҳо, мақомоти иҷроияи ҳокимияти давлатӣ ва мақомоти дигаре, ки дар амалисозии лоиҳа уҳдадориҳо доранд;

- иҷозатҳо – ҳамаи иҷозатномаҳо; ҳамаи ҳуҷҷати маъмурии дорои хусусияти иҷозатдиҳӣ дар шакли иҷозат, сертификат, хулоса, шаҳодатнома, аттестат, рухсатнома, бақайдгирӣ, супориш, қарор ва намуди дигари ҳуҷҷати дорои хусусияти иҷозатдиҳӣ, ки аз ҷониби мақомоти иҷозатдиҳанда ба субъекти хоҷагидор барои анҷом додани фаъолият ё амали муайян ва ё барои намудҳои муайяни мол, кор ва хизматрасонӣ бо нишон додани муҳлати амали он бо риояи ҳатмии шартҳои иҷозатдиҳӣ ва талаботу шартҳои тахассусӣ дода мешаванд; инчунин иҷозати кор ба шаҳрвандони хориҷӣ, ҳуҷҷатҳои ҳуқуқмуайянкунанда ва ё техникие, ки тибқи қонунгузории Ҷумҳурии Тоҷикистон дода мешаванд, дар бар мегирад;

- санаи истифодаи тиҷоратӣ – моҳе, ки дар он истеҳсоли молҳо оғоз меёбад;

- амалияи байналмилалӣ – амалияи пешрафтаи байналмилалӣ, усулҳо, стандартҳо ва расмиётҳое, ки ба муқаррароти Созишномаи мазкур ва қонунгузории татбиқшаванда мухолифат намекунанд;

- муҳлати истифодаи имтиёзи андозӣ – муҳлати дар сархати чоруми банди 4.4. моддаи 4 Созишномаи мазкур пешбинишуда;

- тасдиқ – тасдиқ гардидани Созишномаи мазкур аз ҷониби Маҷлиси намояндагони Маҷлиси Олии Ҷумҳурии Тоҷикистон мувофиқи қонунгузории татбиқшаванда;

- кормандони хориҷӣ – ҳайати техникӣ ва кормандони дигари Сармоягузор, ки тибқи эҳтиёҷот ва дар асоси қонунгузории татбиқшаванда бо дар назар доштани муқаррароти Созишномаи мазкур ва барои амалисозии лоиҳа аз хориҷи Ҷумҳурии Тоҷикистон ҷалб карда мешаванд;

- ҳуқуқи оммавии убур – маънои дар моддаи 16 пешбинишударо дорад;

- пардохтҳои ҳатмӣ – пардохт ва хироҷҳое, ки ба буҷети давлатӣ тибқи қонунгузории татбиқшаванда ситонида мешаванд;

- тарифҳои хизматрасонии пулакӣ – тарифҳои хизматрасонии пулакии мақомоти ҳокимияти давлатӣ, мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот, корхонаву идораҳое, ки ба доираи идоракунии онҳо дохиланд ва дар ҳолатҳои дар қонунгузории татбиқшаванда пешбинишуда бо мақоми ваколатдори давлатӣ дар соҳаи зиддиинҳисорӣ ба мувофиқа расонида шудаанд;

- пардохтҳои гумрукӣ – боҷи гумрукӣ, андоз аз арзиши иловашуда, аксиз ва пардохти махсуси гумрукӣ, ки ҳангоми воридоти мол ба ҳудуди гумрукии Ҷумҳурии Тоҷикистон ситонида мешаванд;

- мол – канданиҳои фоиданок ва маъданҳои минералӣ, консентрат, сабика, новобаста аз шакли бадасторӣ;

- корҳо – тамоми чорабиниҳои Сармоягузор ва Паймонкор, ки ба амалисозии лоиҳа равона карда шудаанд;

- кон – кони «Чоре» ва конҳои дигаре, ки ба Сармоягузор бо ҳуқуқи омӯзиш, ҷустуҷӯй, истихроҷ ва истифодабарӣ дода мешаванд;

- азхудкунии маҷмуии конҳо – низоми амалҳои самараноки техникӣ ва технологие, ки барои пурраю сарфакорона истихроҷи тамоми намуди маъданҳо зарур буда, аз марҳилаҳои зерин иборат мебошад: корҳои иктишофӣ-геологӣ, истихроҷ, логистика, коркард, фурӯш ва баста шудани кон;

- ашёи хоми минералӣ – маҳсулоти тиҷоратӣ, ки дар натиҷаи фаъолияти иқтисодӣ-хоҷагидории корхона ҳангоми истихроҷи канданиҳои фоиданок ба даст оварда шуда, аз рӯйи сифат ба талаботҳои стандартӣ ҷавобгӯй мебошад;

- коркарди амиқ ва маҷмуии ашёи хоми минералӣ – маҷмуи чорабиниҳо, аз ҷумла истихроҷ ва коркарди маъдан, ғанисозӣ, коркарди металлургии ашёи хоми минералӣ, ки барои ноил шудан ба сатҳи баландтарини истихроҷи ҷузъҳои асосӣ ва алоқаманди канданиҳои фоиданок дар ҳар як марҳалаи технологии занҷираи истеҳсолӣ равона шудаанд;

- коркарди омехтаи ашёи хоми минералӣ – омезиши усулҳо ва равандҳои ғанисозӣ ва металлургӣ барои самаранокии ҷудокунии ҷузъҳои ашёи хоми минералӣ;

- майдони сохтмон (ҳудуди амалисозии лоиҳа) – ҳудуде, ки дар он корҳо марбут ба тарҳрезӣ, сохтмон, ба истифода супоридани объектҳои лоиҳа ва корҳои вобаста ба амалисозии лоиҳа иҷро мешаванд, бо назардошти ҳудудҳое, ки дар он кон, комбинати ғанигардонӣ ва инфрасохтори дигари иловагӣ вобаста ба лоиҳа ҷойгиранд, инчунин ҳудудҳои гирду атрофи онҳо.

1.2. Дар Созишномаи мазкур:

- агар аз матн маънои дигар барнаояд, калимаҳои шакли танҳо маънои калимаҳои шакли ҷамъро ҳам дар бар мегиранд ва баръакс калимаҳои шакли ҷамъ маънои калимаҳои шакли танҳоро дар бар мегиранд, истифодаи мафҳуми «шахс» бошад, ҳамчунин маънои вориси ҳуқуқӣ ва сессионарҳоро дар бар мегирад;

- агар аз матн маънои дигар барнаояд, ишора ба банд ё замимаи муайян маънои ишора ба банд ё замимаи дахлдори Созишномаи мазкурро дорад. Замимаҳо қисми ҷудонопазири Созишномаи мазкур ба ҳисоб мераванд, ишора ба «Созишномаи мазкур» бошад, ҳамчунин маънои ишора ба замимаҳоро ҳам дорад;

- агар аз матн маънои дигар барнаояд, ишора ба Созишнома, қонун, санади қонунгузорӣ, фармон, қоида ё санади ҳуқуқии дигар ва ҳар қонунгузории татбиқшаванда, қонунгузории татбиқшавандаи андоз, қонунгузории ҳифзи табиат, қонунгузорӣ дар соҳаи сарватҳои зеризаминӣ ҳамчун ишора ба чунин санадҳои дар боло зикргардида бо ҳамаи тағйиру иловаҳо, ки баъзан метавонанд ҷой дошта бошанд, навовариҳо ё такроран мавриди амал қарор додан шарҳ дода мешавад;

- сарлавҳа ва мундариҷа танҳо ба мақсадҳои истифодаи муносиби Созишномаи мазкур оварда шудаанд ва набояд ба шарҳи Созишномаи мазкур таъсир расонанд;

- ибораҳои «аз ҷумла», «дар бар гирифтан» ё ибораҳое, ки ҳамин ибора асосашон мебошад, маънои «бе маҳдудият дар бар гирифтан»-ро доранд;

- пайвандаки «ё» маънои истисноиро надорад;

- ишора дар ҳуҷҷат ба модда, фасл, сурат, ҷадвал, замима ё иловаи ин ишора ба модда, фасл, сурат, ҷадвал, замима ё иловаи чунин ҳуҷҷат мебошад, агар ҳуҷҷати дигар зикр нашуда бошад. Сурат, ҷадвал, замима ё илова ба ҳар ҳуҷҷат ба чунин ҳуҷҷат бо ишора воридшуда ба ҳисоб мераванд;

- ишора ба ҳама гуна ҳуҷҷат, восита ё Созишнома (i) ҳамаи суратҳо, ҷадвалҳо, замимаҳо, изофаҳо ва иловаҳои дигарро ба онҳо дар бар мегирад, (ii) ҳама гуна ҳуҷҷат, восита ё Созишномаҳои тартибдодашуда ё ба ивази онҳо баимзорасидаро дар бар мегирад ва (iii) маънои чунин ҳуҷҷат, восита ё Созишнома ва ё ҳуҷҷат, восита ё Созишномаи ивазкунандаро бо тасҳеҳ тағйир ва иловаҳое, ки бо мурури замон ворид гашта дар айни замон амал карда истодаанд;

- калимаҳои «Созишнома», «Созишномаи мазкур», «дар Созишномаи мазкур» ва «тибқи Созишномаи мазкур», инчунин калимаҳои маънояшон ҳаммонанд, ки дар ҳама гуна ҳуҷҷатҳо истифода бурда мешаванд, дар маҷмуъ ишора ба ҳамон ҳуҷҷат буда, на ишора ба ягон муқаррароти муайяни чунин ҳуҷҷат аст.

МОДДАИ 2. ЭЪТИБОР ПАЙДО КАРДАНИ СОЗИШНОМА

2.1. Созишномаи мазкур аз рӯзи тасдиқ гардидани он аз тарафи Маҷлиси намояндагони Маҷлиси Олии Ҷумҳурии Тоҷикистон эътибор пайдо мекунад.

2.2. Муҳлати амали Созишномаи мазкур аз рӯзи тасдиқ гардидани он аз тарафи Маҷлиси намояндагони Маҷлиси Олии Ҷумҳурии Тоҷикистон 12 (дувоздаҳ) солро дар бар мегирад.

2.3. Муҳлати амали Созишнома метавонад аз ҷониби Тарафҳо таҷдиди назар карда шавад.

МОДДАИ 3. МАВЗУИ СОЗИШНОМА ВА АМАЛИСОЗИИ ЛОИҲА

3.1. Сармоягузор нияти татбиқи Лоиҳаро дошта, барои ин мақсад захираҳои молиявӣ, технологӣ, кадрӣ ва ғайраҳоро барои татбиқи Лоиҳа, ки моҳиятан аз:

- Сохтмони корхонаҳои бойгардонӣ ва металлургӣ, ки дар онҳо маъданҳо ғанӣ гардида, ба гудохтан омода карда мешаванд; коргоҳҳои аффинаж ва коргоҳҳои дигаре, ки дар соҳаи коркарди маъданҳо истифода бурда мешаванд ва баҳри амалӣ намудани корҳои иктишофӣ-геологӣ, азхудкунии кон, истихроҷ, логистика, коркард, фурӯш ва баста шудани кон иборат аст. Муҳлати дақиқи сохтмони корхонаҳо бо дар назардошти АТИ ва ҳуҷҷатҳои лоиҳавӣ мушаххас карда мешавад (муњлати сохтмони корхонањо таќрибан 36 (сиву шаш) моњ). Ҳаҷми умумии маблағгузориҳо дар амалисозии лоиҳа на кам аз 500 (панҷсад) миллион сомониро ташкил медиҳад .

3.2. Сармоягузор ҳаҷми назарраси маблағро сармоягузорӣ менамояд ва Ҳукумат бошад, ба Сармоягузор кафолатҳои ҳимояи давлатии амалисозии лоиҳаро пешниҳод менамояд. Ҳукумат иҷрои пурра ва саривақтии чорабиниҳои пешбининамудаи Созишномаи мазкурро, ки барои амалисозии пурраи лоиҳа аз ҷониби мақомот ва ташкилоту муассисаҳои давлатӣ дар тамоми ҳудуди Тоҷикистон зарур мебошанд, таъмин менамояд.

3.3. Бо мақсади амалисозии муқаррароти Созишномаи мазкур Сармоягузор уҳдадор мегардад, ки фаъолияти худро дар самти ба даст овардани маҳсулоти ниҳоӣ анҷом диҳад. Сармоягузор дар давраи амали Созишномаи мазкур номгӯйи ҷамъиятҳои фаръиву вобаста ва шаклҳои дигари ташкилию ҳуқуқии шахсони хуқуқии аз ҷониби Сармоягузор бо мақсади амалисозии лоиҳа таъсис, азнавташкилдиҳӣ ва ё бо роҳҳои дигари муқаррарнамудаи қонунгузорӣ вобастакардашуда, аз ҷумла паймонкорони асосиро ба мақоми ваколатдори давлатӣ пешниҳод менамояд.

3.4. Сармоягузор барои амалисозии ҳамаи ҷузъиёти лоиҳа мутобиқи нақшаҳои муфассал ва таснифот, шартҳои ҳуҷҷатҳои лоиҳавӣ (аз ҷумла ҳамаи замимаҳо ба он) ва қонунгузории татбиқшаванда чораҳои зарурӣ меандешад.

3.5. Бо мақсади иҷрои уҳдадориҳои худ тибқи банди 3.4. Сармоягузор паймонкоронро интихоб менамояд ва ҳамаи шартномаҳои дахлдорро бо чунин паймонкорон мебандад, ки барои таҳвили молҳо, иҷрои корҳо ва пешниҳоди хизматрасониҳо дар раванди амалисозии лоиҳа, ки дар нақшаҳои муфассал, таснифот ва ҳуҷҷатҳои лоиҳавӣ зикр шудаанд, масъул мешаванд. Ҳеҷ кадом таъиноти ягон паймонкор тибқи Созишномаи мазкур Сармоягузорро аз масъулият, вазифа ё уҳдадории дар назди Ҳукумат доштааш, ки мувофиқи Созишномаи мазкур ба вуҷуд меояд, озод намекунад.

3.6. Сармоягузор нияти амалисозии лоиҳаро дошта, барои ин мақсад захираҳои зарурии молиявӣ, техникӣ, тахассусӣ ва ғайраро ҷудо мекунад. Ҳукумат розӣ мешавад, ки тибқи қонунгузории татбиқшаванда бо дарназардошти имтиёзу кафолатҳои дар Созишномаи мазкур пешбинигардида низоми махсуси ҳуқуқӣ, аз ҷумла имтиёзҳои андозӣ ва гумрукиро барои амалисозии самарабахши лоиҳа пешниҳод намояд.

3.7. Тарафҳо уҳдадор мешаванд, ки барои таъмини самаранокии амалисозии лоиҳа шартҳо ва муҳлатҳои дар Созишномаи мазкур муайянгардидаро риоя намоянд.

3.8. Дар рафти амалисозии лоиҳа Сармоягузор талабот оид ба ҳифзи муҳити зистро, ки қонунгузории татбиқшаванда пешбинӣ намудааст, иҷро менамояд. Дар ҳуҷҷатҳои лоиҳавии таҳиягардида фаслҳо оид ба ҳифзи муҳити зисти дар қонунгузории амалишаванда пешбинишуда дарҷ карда мешаванд.

3.9. Сармоягузор барои сохтмон ва ба истифода додани объектҳои лоиҳа масъул мебошад. Ҳукумат ба Сармоягузор тибқи қонунгузории татбиқшаванда пешниҳоди ҳамаи иҷозатҳои барои амалисозии лоиҳа заруриро кафолат медиҳад. Баъд аз ба анҷом расонидани сохтмони объектҳои лоиҳа онҳо бо тартиби пешбининамудаи қонунгузории татбиқшаванда ҳамчун моликияти Сармоягузор ба расмият дароварда мешаванд ва Ҳукумат барои чунин барасмиятдарорӣ мусоидат менамояд. Ба Сармоягузор барои ҳамчун фармоишгари корҳои сохтмонӣ баромад кардан иҷозатномаи фармоишгар талаб карда намешавад.

3.10. Ҳама гуна маъданҳои фоиданок ва маҳсулоти дигаре, ки дар натиҷаи коркарди маҷмуии кон аз ҷониби Сармоягузор ба даст оварда мешаванд, объекти ҳуқуқи моликияти Сармоягузор эътироф гардида, Сармоягузор бо салоҳдиди худ онҳоро тибқи қонунгузории татбиқшаванда ихтиёрдорӣ менамояд.

МОДДАИ 4. МАБЛАҒГУЗОРИИ ЛОИҲА

4.1. Сармоягузор ҳуқуқ дорад ҷалби маблағгузории лоиҳаро бо истифода аз ҳама воситаҳои қонунӣ, аз ҷумла сармоягузорӣ ба сармояи оинномавӣ, иштирок дар сармояи дигар шахсони ҳуқуқӣ, истифодабарии манбаъҳои худӣ, фоидаи софи аз фаъолияти корхонаи истеҳсолӣ, корхонаҳои муштарак ва/ё ҷамъиятҳои фаръӣ, филиал ва намояндагиҳои худ бадастоварда, ҷалби қарзҳо, таъсиси корхонаҳои муштарак бо шахсони сеюм ва/ё истифодабарии қарзҳои имтиёзноке, ки аз ҷониби шахсони сеюм дода мешаванд, инчунин карзҳои бефоиз ва ё имтиёзноки аз ҷониби муассисони/иштирокдорони Сармоягузор ва ташкилотҳои қарзии молиявӣ додашуда амалӣ намояд.

4.2. Ҳукумат инҳоро эътироф мекунад:

4.3. Барои амалисозии самараноки лоиҳа Сармоягузор маблағгузории лоиҳаро анҷом медиҳад. Ҳаҷми умумии маблағгузориҳо дар амалисозии лоиҳа на кам аз 500 (панҷсад) миллион сомониро ташкил медиҳад.

4.4. Маблағгузории лоиҳа аз ҷониби Сармоягузор бо дарназардошти дар давраи амали Созишномаи мазкур таъмин кардани шартҳои зерин амалӣ карда мешавад:

- ба объектҳои (иншооти) инфрасохтории барои амалисозии лоиҳа зарурбуда тибқи тартиби муқарраргардида дастрасӣ пайдо кардани Сармоягузор;

- Ҳукумат тибқи қонунгузории татбиқшаванда бо дарназардошти бандҳои дахлдори муқаррароти Созишномаи мазкур ба Сармоягузор барои гирифтани тамоми қарору иҷозатҳои зарурӣ, ки метавонанд барои амалисозии лоиҳа лозим шаванд, мусоидат менамояд;

- аз ҷониби Ҳукумат риоя гардидани тамоми кафолатҳо ва уҳдадориҳои тибқи Созишномаи мазкур базиммагирифта;

- аз ҷониби Сармоягузор истифодаи имтиёзҳои андозӣ дар муҳлати 5 (панҷ) сол аз санаи истифодаи тиҷоратӣ.

4.5. Маблағгузории лоиҳа инҳоро дар бар мегирад, вале маҳдуд намегардад:

- маблағгузории АТИ, лоиҳакашӣ ва воситаҳои гардон;

- маблағгузории харидории техника ва технологияи зарурии истеҳсолӣ;

- маблағгузории сохтмон, таҷдид, барқарорсозӣ ва ба истифода додани инфрасохтори зарурӣ дар доираи амалисозии лоиҳа;

- маблағгузории бозомӯзии мутахассисони маҳаллӣ дар дохил ва хориҷи кишвар ҷиҳати истифодаи техника ва технологияи муосир дар истеҳсолот;

- маблағгузории корҳои дигаре, ки ба амалисозии лоиҳа мусоидат менамоянд.

4.6. Сармоягузор дар рафти амалисозии лоиҳа ҳуқуқ дорад шакли ташкилию ҳуқуқӣ, номи фирмавӣ, роҳбарият ва шакли моликияти худро тағйир диҳад. Ҳукумат кафолат медиҳад, ки чунин тағйирёбӣ ба ҳуқуқ, озодкунӣ, имтиёзҳо ва кафолатҳое, ки ба Сармоягузор мувофиқи Созишномаи мазкур пешниҳод мешаванд, инчунин ба низоми махсуси ҳуқуқӣ, аз ҷумла имтиёзҳои андозӣ ва гумрукӣ, ки Созишномаи мазкур муқаррар намудааст, таъсир намерасонад.

4.7. Сармоягузор набояд таҳти ягон маҳдудияти ин ё он ҳуқуқ аз рӯйи Созишномаи мазкур қарор гирад. Сармоягузор ҳуқуқ дорад дар мавриди афзоиш ё коҳиш ёфтани хароҷот, ҳаҷми сармоягузорӣ ва нишондиҳандаҳои иқтисодии лоиҳаро бо мувофиқаи мақоми ваколатдори давлатӣ тағйир диҳад.

МОДДАИ 5. КАФОЛАТ ВА УҲДАДОРИҲО

5.1. Ҳукумат мустақилона ва ё бо воситаи мақомоти давлатӣ, аз ҷумла мақомоти худидоракунии маҳаллӣ кафолат ва уҳдадориҳои худро нисбати инҳо пешниҳод мекунад:

5.2. Сармоягузор бо банди мазкур нисбати инҳо кафолат ва тасдиқоти худро пешниҳод мекунад:

5.3. Агар дар ҷараёни амалисозии лоиҳа Сармоягузор конҳои аз ҷиҳати иқтисодӣ фоиданокеро ошкор намояд, ки онҳо дар Созишнома пешбинӣ карда нашудаанд, Сармоягузор бояд ба таври фаврӣ дар бораи чунин ошкорсозӣ ба Ҳукумат хабар диҳад ва ҳуқуқи афзалиятнокро барои гирифтани иҷозати дахлдор барои истифодаи минбаъдаи онҳо пайдо менамояд.

5.4. Агар ҳангоми амалисозии лоиҳа ба Сармоягузор васеъ намудани ҳудуди амалисозии лоиҳа зарур шавад, Ҳукумат аз санаи муроҷиати хаттии Сармоягузор дар асоси ҳуҷҷатҳои асосноккунандаи пешниҳодшуда, тибқи қонунгузории татбиқшаванда дар давоми 30 (сӣ) рӯз ҷиҳати ҳалли масъалаи васеъ намудани ҳудудҳои амалисозии лоиҳа мусоидат менамояд.

МОДДАИ 6. АСОСНОККУНИИ ТЕХНИКИЮ ИҚТИСОДӢ

6.1. Асосноккунии техникию иқтисодии лоиҳа тибқи қонунгузории татбиқшаванда аз ҷониби Сармоягузор бо ҷалби мутахассисони маҳаллӣ ё хориҷӣ таҳия карда мешавад.

6.2. Асосноккунии техникию иқтисодӣ раванди технологӣ, талаботи истеҳсолӣ, муҳлат, самаранокии иқтисодӣ, таъсири экологии лоиҳа ва масъалаҳои дигари заруриро дар бар гирифта, тибқи қонунгузории татбиқшаванда ва таҷрибаи байналмилалӣ дар давоми 12 моҳ тартиб дода мешавад.

6.3. Сармоягузор метавонад муҳлати дар банди 6.2. Созишномаи мазкур дарҷгардидаро ба муҳлати то як соли дигар бо воситаи пешниҳоди мактуби расмӣ ба мақоми ваколатдори давлатӣ тамдид намояд.

МОДДАИ 7. ИҶОЗАТҲО

7.1. Ҳукумат мустақилона ва ё тавассути мақоми ваколатдори давлатӣ амал намуда, дар ҳамкорӣ бо мақомоти ваколатдори давлатии дахлдор тибқи муқаррароти Созишномаи мазкур ва қонунгузории татбиқшаванда ба Сармоягузор иҷозатҳои барои амалишавии лоиҳа заруриро дар муҳлатҳои муқаррарнамудаи қонунгузории татбиқшаванда (вале на дертар аз муҳлати дар Созишномаи мазкур муқарраргардида) аз лаҳзаи муроҷиат кардан ба мақомоти дахлдори давлатӣ медиҳад ва/ё тамдид мекунад ва/ё аз нав ба расмият медарорад. Ҳукумат тибқи қонунгузории татбиқшаванда азнавбақайдгирӣ, иваз ё тамдиди муҳлати амали иҷозатҳои барои амалисозии самараноки лоиҳа чораҳои заруриро амалӣ менамояд, аз ҷумла:

- иҷозатномаҳои зарурӣ барои сохтмон, таҷдид ва ба истифода додани корхонаҳо ва иншооти ба онҳо алоқаманд, аз ҷумла хатҳои интиқоли барқ, гиреҳҳо, гузаронидани коммуникатсияҳои алоқаманд, инчунин гирифтани иҷозатҳо, ташхисҳо, ҳуҷҷатҳои ҳуқуқмуайянкунанда ва/ё техникӣ ва мувофиқаҳои мақомоти ваколатдори давлатӣ ва корхонаву идораҳои давлатии дахлдор вобаста ба лоиҳа;

- иҷозатномаҳо барои истеҳсол, фурӯш ва содироти маҳсулоти ниҳоӣ;

- иҷозатнома барои насб, танзим ва таъмини таҷҳизот;

- иҷозат барои воридоти таҷҳизот, маҳсулот ва молу мулки дигаре, ки барои лоиҳа ва иншоотҳои ба он алоқаманд зарур мебошанд;

- иҷозат барои фурӯш ва содироти таҷҳизот, маҳсулот ва молу мулки ғайрибозоргир;

- иҷозат барои дастрасӣ ба шабакаҳои обтаъминкунӣ, обтақсимкунӣ ва пайвастшавӣ ба хатҳои интиқоли барқ, барои кандани чоҳҳои чуқур, насб намудани таҷҳизоти иловагии барқӣ, аз ҷумла трансформаторҳо ва кабелҳои барқӣ, сохтмони истгоҳҳои обтозакунӣ, гузаронидани қубурҳо ва кандани нақбҳо ва иҷозат барои сохтмон, таҷдид ва ба истифода додани инфрасохтори зарурӣ барои фурӯши маҳсулот;

- квотаи кафолатшуда барои фурӯши маҳсулот;

- мувофиқаҳо ва хулосаҳои мақомоти ваколатдори давлатии дахлдор;

- иҷозат ва хулосаҳои мақомоти давлатӣ нисбат ба АТИ ва ҳуҷҷатгузории дигари дорои хусусияти лоиҳавӣ ва техникӣ (дар ҳолати зарурӣ);

- иҷозат барои ташкили анбор ҷиҳати амалисозии лоиҳа (дар ҳолати зарурӣ);

- мусоидат барои бақайдгирии тамғаҳои молӣ, намунаҳои саноатӣ ва ҳуқуқҳои дигари моликияти зеҳнӣ ҷиҳати амалишавии лоиҳа (дар ҳолати зарурӣ);

- иҷозат барои интиқоли техника ва таҷҳизоти зарурӣ ба қитъаҳои лоиҳа дар ҳудуди Ҷумҳурии Тоҷикистон (дар ҳолати зарурӣ);

- иҷозат барои истифодаи низоми алоқаи кайҳонӣ, телефонҳо, низоми моҳворавии мавқеъмуайянкунӣ (GPS), технологияҳои тадқиқоти фосилавӣ тибқи талаботи лоиҳа (дар ҳолати зарурӣ);

- иҷозатҳо ва ҳуҷҷатҳои дигаре, ки барои амалисозии лоиҳа зарур мебошанд.

7.2. Ҳукумат тавассути мақомоти ваколатдори давлатии дахлдор тибқи қонунгузории татбиқшаванда иҷозатҳои дар боло зикргардидаро дар ҳолати дархост шудан аз ҷониби Сармоягузор иваз менамояд, аз нав тасдиқ мекунад ва тамдид менамояд.

7.3. Сармоягузор ҳангоми гирифтани иҷозатҳо тамоми боҷҳои давлатӣ ва пардохтҳои ҳатмии тибқи қонунгузории татбиқшаванда пешбинишударо, ба истиснои тарифҳои хизматрасонии пулакӣ, мувофиқи меъёру усули дар санаи гирифтани ҳар як иҷозат муқарраршуда пардохт мекунад.

МОДДАИ 8. ИНФРАСОХТОРИ ЛОИҲА

8.1. Тарафҳо эътироф менамоянд, ки то санаи эътибор пайдо кардани Созишномаи мазкур ба андозаи кофӣ муайян кардани мақсаднокӣ, дастрасӣ ё талабот нисбат ба инфрасохтори дахлдор (манбаи махсуси истеҳсолию техникӣ ё манбаи истеҳсолию техникии иловагӣ) барои амалисозии лоиҳа ғайриимкон мебошад. Новобаста аз ин, Ҳукумат дарк менамояд, ки инфрасохтор барои амалисозии лоиҳа аҳаммияти муҳим дорад, барои амалисозии лоиҳа рушди иловагии инфрасохтор зарур мешавад ва барои амалҳои зерин розигии худро изҳор мекунад:

8.2. Сохтмони инфрасохтори барқӣ барои бо барқ таъмин намудани иншооти лоиҳавӣ аз ҳисоби маблағҳои сармоягузор таъмин карда мешавад.

МОДДАИ 9. ИНТИҚОЛ, ХАРИДИ АСЪОРИ ХОРИҶӢ ВА ИХТИЁРДОРИИ ОН

9.1. Мутобиқи қонунгузории татбиқшаванда Ҳукумат бо он розӣ мешавад, ки ба Сармоягузор иҷозат медиҳад, то бо мақсади (i) воридоти таҷҳизот, қисмҳои эҳтиётӣ, маҳсулот, мол, сӯзишворӣ, кор ва хизматрасонии зарурӣ барои босамар анҷом додани лоиҳа ва инчунин эҳтиёҷоти маъмурии Сармоягузор (ii) пардохти қарз бо доллари ИМА ва ё асъори хориҷии дигар аз рӯйи ҳуҷҷатҳои молиявӣ ва (iii) бо риояи ҳамаи талаботи қонунгузории татбиқшаванда ба таври мунтазам ва доимӣ мубодила ва ба суратҳисобҳои берун аз ҳудуди ҷумҳурӣ кушодашуда ва амалкунандаи Сармоягузор интиқол додани даромад, подош ва сармояи бадастомада пас аз пардохти андозҳо ва пардохтҳои ҳатмии дигар, маблағҳои худро марбут ба Созишномаи мазкур мубодила ва берун аз ҳудуди Ҷумҳурии Тоҷикистон интиқол диҳад.

МОДДАИ 10. АНДОЗҲО ВА ПАРДОХТҲО

10.1. Сармоягузор тамоми муқаррароти қонунгузории татбиқшавандаи Ҷумҳурии Тоҷикистонро дар самти андоз ва гумрук риоя мекунад ва андозу пардохтҳои гумрукиро мутобиқи қонунгузории татбиқшаванда, ба истиснои ҳолатҳое, ки Созишнома пешбинӣ намудааст, пардохт менамояд.

10.2. Сармоягузор дар муҳлати истифодаи имтиёзи андозӣ:

- аз пардохти андоз аз даромади шахсони ҳуқуқӣ ва суди саҳмия ба андозаи 50 (панҷоҳ) фоизи меъёри муқарраргардида озод мебошад;

- андоз аз объектҳои ғайриманқул ва роялти барои истихроҷ ба андозаи 50 (панҷоҳ) фоизи меъёри муқарраргардида пардохт менамояд.

10.3. Сармоягузор маблағи бонуси обунавии тибқи қонунгузорӣ муайяншударо аз санаи оғоз намудани корҳои истихроҷи канданиҳои фоиданок бо дарназардошти қисми 5 моддаи 301 Кодекси андози Ҷумҳурии Тоҷикистон дар давоми муҳлати 5 (панҷ) сол аз рӯйи ҳиссаҳои баробар барои ҳар сол дар охири соли молиявӣ пардохт мекунад.

10.4. Муассисони (иштирокдорони) Сармоягузор ҳуқуқ доранд ба молу мулки Сармоягузор бе тағйир додани ҳаҷм ва арзиши номиналии ҳиссаи сармояи оинномавии он бо роҳи гузоштани пул ва/ё молу мулк саҳм гузоранд. Саҳми ба молу мулки Сармоягузор гузошташуда барои мақсадҳои андоз аз даромад ҳамчун даромад ҳисобида намешаванд.

10.5. Дар сурати бо шартҳои имтиёзнок аз муассисони Сармоягузор ва ё шахсони вобастаи он гирифтани ҳама гуна қарзҳо, фарқияти байни фоизи имтиёзнок ва фоизе, ки аз фоидаи чунин қарзҳои ҳаммонанд пасттар бамиёномада, барои мақсадҳои андоз аз даромад ҳамчун даромад ҳисобида намешаванд.

10.6. Воридоти молу маҳсулот ва ашёи хоме, ки бевосита барои амалисозии лоиҳа истифода мешаванд, инчунин техника, воситаҳои нақлиёт (инчунин воситаҳои нақлиёти махсусгардонидашуда), таҷҳизоти истеҳсолию технологию ёрирасон, қисмҳои васлшавандаи онҳо, маҳсулоти сохтмонӣ ва маҳсулоти дигаре, ки бо мақсади амалисозии лоиҳа ворид карда мешаванд, дар давраи амали Созишнома аз андоз аз арзиши иловашуда ва аксиз ба андозаи 50 (панҷоҳ) фоиз меъёри муқарраршуда ва пардохти боҷи гумрукӣ дар ҳаҷми пурра озод карда мешаванд. Номгӯйи молу маҳсулот, воситаҳои нақлиёт (инчунин воситаҳои нақлиёти махсусгардонидашуда), ашёи хом, техника, таҷҳизоти истеҳсолию технологию ёрирасон, маснуоти васлшавандаи онҳо, масолеҳи сохтмонӣ ва маҳсулоти дигари ба Ҷумҳурии Тоҷикистон воридшаванда тибқи қарори Ҳукумат тасдиқ карда мешавад. Дар ҳолати зарурӣ дар давраи амалисозии лоиҳа Сармоягузор метавонад номгӯйи молу маҳсулот, воситаҳои нақлиёт (инчунин воситаҳои нақлиёти махсусгардонидашуда), ашёи хом, техника, таҷҳизоти истеҳсолию технологию ёрирасон, қисмҳои васлшавандаи онҳо, масолеҳи сохтмонӣ ва маҳсулоти дигари ба таври иловагӣ воридшавандаро ба воситаи мақоми ваколатдори давлатӣ барои тасдиқ ба Ҳукумат пешниҳод намояд. Банди мазкур Сармоягузорро аз истифодаи имтиёзҳои андозиву гумрукие, ки дар қонунгузории амалкунанда муқаррар шудаанд, маҳдуд намекунад.

10.7. Дар сурати мавҷуд будани молу маҳсулоти ватанӣ, ки арзиши онҳо дар қиёс ба молу маҳсулоти воридотӣ баробар ва/ё арзон буда, сифати он ба талаботи муқарраргардида ҷавобгӯ ва таҳвилаш дар муҳлати ба Сармоягузор мувофиқ имконпазир мебошад, Сармоягузор ҳуқуқ дорад дар амалисозии лоиҳа аз чунин молу маҳсулоти ватанӣ истифода барад.

10.8. Мақоми ваколатдори давлатӣ чунин маълумотномаҳо дар бораи озодкунӣ аз андоз ва ҳуҷҷатҳои дигареро, ки метавонанд аз ҷониби Сармоягузор барои тасдиқ кардани озодкунӣ аз андоз мувофиқи муқаррароти мазкури Созишнома ва имтиёзҳои дигари ба Сармоягузор ё паймонкор (паймонкорон), паймонкорони ғайриасосӣ (паймонкорони ғайриасосӣ) ё ягон корманди онҳо мувофиқи банди мазкур дархост карда шаванд, медиҳад.

10.9. Озодкунӣ аз андоз ва боҷҳои гумрукӣ ҳамчун шакли мусоидат барои амалисозии лоиҳа аз ҷониби Ҳукумат бо дарназардошти манфиат барои иқтисоди Ҷумҳурии Тоҷикистон аз натиҷаи амалисозии лоиҳа пешниҳод карда мешавад.

10.10. Тағйиру иловаҳо ба қонунгузории андоз ва гумруки Ҷумҳурии Тоҷикистон, ки баъди имзои Созишномаи мазкур қабул гардида, дар раванди амалисозии лоиҳаро монеа ва душвориҳоро эҷод мекунанд, вазъи молиявии Сармоягузорро бад менамоянд, дар муҳлати амали Созишномаи мазкур ба Сармоягузор татбиқ намешаванд.

10.11. Дар давраи амалисозии лоиҳа паймонкорони ѓайрирезиденти Сармоягузор оид ба таҳияи АТИ ва хизматрасонии лоиҳакашӣ ба андозаи 50 (панҷоҳ) фоизи меъёри муқарраргардида аз пардохти андоз аз арзиши иловашуда барои иҷрои корҳо ва пешниҳоди хизматрасониҳо озод карда мешаванд.

МОДДАИ 11. КИРО НАМУДАНИ ҲАЙАТИ КОРМАНДОН

11.1. Барои сохтмони объектҳои лоиҳа ва таъмини фаъолияти корхонаҳо Сармоягузор хизматрасонии паймонкорон, зерпаймонкорон ва кормандони дорои малакаи дахлдор, баландихтисос ва соҳибтаҷрибаро истифода мебарад. Дар давоми муҳлати амали Созишномаи мазкур на камтар аз 70 (ҳафтод) фоиз аз ҳисоби умумии кормандоне, ки тарҳрезӣ, таҷдид, барқарорсозӣ, сохтмон ва амалисозии лоиҳаро анҷом медиҳанд (новобаста аз он ки онҳо кормандони штатии Сармоягузор мебошанд ё не), бояд шаҳрвандони Ҷумҳурии Тоҷикистон бошанд.

11.2. Сармоягузор ҳангоми зарурат барои иҷрои кор дар доираи Созишномаи мазкур, аз ҷумла лоиҳакашӣ, сохтмон, таҷдид, барқарорсозӣ ва амалишавии лоиҳа ҳуқуқ дорад тибқи қонунгузории татбиқшаванда мутахассисонро аз ҳисоби шаҳрвандони хориҷӣ ҷалб намояд. Дар доираи имтиёзҳои тибқи Созишномаи мазкур пешниҳоднамудаи Ҳукумат Сармоягузор ва кормандони хориҷӣ аз гирифтани тамоми намуди иҷозатҳо барои ҷалби (истифодаи) қувваи кории хориҷӣ дар давраи амали Созишномаи мазкур озод мебошанд.

11.3. Сармоягузор кӯшиш ба харҷ медиҳад, ки сатҳи тахассуси кормандони дохилиро бо роҳи даъвати мутахассисони хориҷӣ ба истеҳсолот барои гузаронидани курсҳои таълимӣ, равона кардани кормандони маҳаллӣ ба семинарҳои омӯзишию таълимӣ ҳам дар ҳудуди Ҷумҳурии Тоҷикистон ва ҳам берун аз он такмил диҳад.

МОДДАИ 12. ҲУҚУҚИ МОЛИКИЯТ БА ЗАХИРАҲОИ ТАБИӢ ВА ИТТИЛООТ ОИД БА ОНҲО

12.1. Сарватҳои зеризаминӣ, аз ҷумла кон, моликияти истисноии Ҷумҳурии Тоҷикистон мебошанд.

12.2. Иттилоот оид ба сохтори геологии сарватҳои зеризаминӣ дар ҳудуди қитъа, маъданҳои фоиданоки дар онҳо мавҷудбуда, миқдор ва сифати онҳо, шароити истихроҷи онҳо, инчунин хусусиятҳои дигари сарватҳои зеризаминӣ дар ҳисобот, харитаҳо ва маводди дигари геологӣ баёнгардида дар ҳудуди қитъа аз ҷониби Сармоягузор ташаккул дода шудааст, ҳамчун моликияти Сармоягузор ба ҳисоб мераванд.

12.3. Асосноккунии техникӣ-иқтисодӣ, лоиҳаи техникӣ ва ҳуҷҷатҳои дигари лоиҳавӣ моликияти Сармоягузор ҳисобида мешаванд.

12.4. Маҳсулоти ниҳоӣ метавонад аз ҳудуди Ҷумҳурии Тоҷикистон бо риояи талаботҳои қонунгузории татбиқшаванда ба содирот бароварда шавад. Њуќуќи афзалиятнок ба бастани шартномањо бо Сармоягузор оид ба харидории мол, бо нархи Ассотсиатсияи иштироккунандагони бозори металлњои ќиматбањои Лондон дар рўзи фурўш, бо маќсади ѓанигардонии Фонди давлатии металлњои ќиматбањо ва сангњои ќиматбањои Љумњурии Тољикистон, инчунин захираи тиллои Љумњурии Тољикистон, ба Љумњурии Тољикистон дар шахси Вазорати молияи Љумњурии Тољикистон ва Бонки миллии Тољикистон тааллуќ дорад.

МОДДАИ 13. СЕРТИФИКАТСИЯИ МАҲСУЛОТ, ҲИФЗИ МУҲИТИ ЗИСТ ВА САЛОМАТӢ

13.1. Сармоягузор уҳдадор аст, ки тамоми маҳсулоти истеҳсолшавандаро бо сертификати пешбининамудаи қонунгузории татбиқшаванда ба ин навъи мол таъмин намояд. Ҳукумат тибқи қонунгузории татбиқшавада сари вақт гирифтани сертификат барои маҳсулотро аз тарафи мақоми дахлдори давлатӣ кафолат медиҳад.

13.2. Сармоягузор кафолат медиҳад, ки меъёрҳои қонунгузории татбиқшавандаро вобаста ба ҳифзи муҳити зист риоя мекунад.

13.3. Мақоми дахлдори давлатӣ дар муҳлатҳои кӯтоҳтарин (дар давоми АТИ) ба Сармоягузор оид ба ҳар масъалаи экологӣ ва муҳити зист, ки метавонанд барои амалисозии лоиҳа таъсири худро расонанд, барои аз тарафи Сармоягузор муқаррар намудани имконияти амалисозии лоиҳа таклифҳо пешниҳод мекунад.

13.4. Сармоягузор уҳдадор мегардад, ки риоя гардидани меъёрҳоро оид ба ҳифзи саломатӣ, ки бо қонунгузории татбиқшаванда муқаррар гардидаанд, ҳангоми гузаронидани тамоми корҳои вобаста ба сохтмон, таҷдид ва ба истифода додан таъмин намояд. Сармоягузор ҳамчунин уҳдадор мегардад, ки корхонаҳо қонунгузории татбиқшавандаро оид ба меҳнат, саломатӣ ва бехатарӣ риоя менамоянд.

МОДДАИ 14. СУҒУРТА

14.1. Сармоягузор уҳдадор мегардад, ки суғуртаҳои ҳатмии давлатиро, ки тибқи қонунгузории татбиқшаванда пешбинӣ шудаанд, дар ҳолатҳои барои амалисозии лоиҳа зарурӣ ва ба дар ҳолатҳои пешбинишудаи Созишнома, дар ширкатҳои суғуртавии маҳаллӣ ё хориҷӣ амалӣ намояд.

МОДДАИ 15. КУМАК ВА КАФОЛАТҲОИ ИЛОВАГӢ, КИ БА САРМОЯГУЗОР АЗ ҶОНИБИ ҲУКУМАТ ПЕШНИҲОД КАРДА МЕШАВАНД

15.1. Ҳукумат эътироф мекунад ва розӣ аст, ки дар давоми муҳлати Созишномаи мазкур ба Сармоягузор инҳо пешниҳод мешаванд: (а) низоми мусоиди ҳуқуқӣ ва бартариҳои сатҳашон на пасттар аз сатҳи низоми ба шахсони ҳуқуқӣ ва воқеии Тоҷикистон тибқи санадҳои меъёрии ҳуқуқӣ пешниҳодшуда ва ё пешниҳодшаванда, (б) низоми мусоиди ҳуқуқу бартариҳое, ки ба ҳар сармоягузори хориҷӣ ё корхонаи иштироки хориҷидошта пешниҳод шудаанд ва ё мешаванд ва (в) арзиши истифодаи қувваи барқ баробари арзиши фурӯши он ба корхонаҳои соҳаи металлургия, вале на зиёда аз пастарин арзиши фурӯши қувваи барқ дар ин соҳа.

15.2. Ҳукумат тамоми кӯшишҳои қобили қабулро, ки тибқи қонунгузории татбиқшаванда зарур ва мақсаднок мебошанд, ҷиҳати ба Сармоягузор расонидани кумак барои аз Ҳукумат ва мақомоти ваколатдори давлатии дахлдор ба зудӣ гирифтани иҷозатҳо, қитъаҳои замини ҷудошуда, ки бо шаҳодатномаҳои дахлдор барои ҳуқуқи заминистифодабарӣ тасдиқ шудаанд ва ҳамаи барасмиятдарориҳои зарурӣ, иҷозатҳо барои анҷом додани таҷдид ва ба истифода додан, розигиҳо, қарорҳо, ҷонибдориҳо, озодкуниҳо, таъинот, иҷозатномаҳо, тағйир додани минтақабандӣ, маълумотномаҳо ва ҳуҷҷатҳо, воситаҳо ва навъҳои дигари онҳо монанд ба харҷ медиҳад, инчунин тамоми амалу кӯшишҳои тибқи қонунгузории татбиқшаванда зарур ё мақсаднокро ба харҷ медиҳад, то ба Сармоягузор ҷиҳати босамар ва ба таври судманд амалӣ намудани лоиҳа кумак расонад.

15.3. Ҳукумат барои эътироф ва қабул намудани ҳамаи сертификатҳои мутобиқати аз ҷониби ташкилотҳои байналмилалии сертификатсионӣ барои таҷҳизот ва молу мулк баровардашуда розигӣ медиҳад ва барои дар Феҳристи дахлдори миллӣ ба қайд гирифтани чунин таҷҳизоту молу мулк иҷозат медиҳад.

15.4. Ҳукумат бо он розӣ мешавад, ки муқоисакунӣ (калибровка)-и ибтидоии нишондодҳо, эътимоднокӣ ва талаботи дигари зарурии таҷҳизот ва молу мулк бо сертификатҳо дар Ҷумҳурии Тоҷикистон қабулшуда, ҳар муқоисакунӣ (калибровка), эътимоднокӣ ва амалҳои дигари зарурии минбаъдаи таҷҳизот ва молу мулк тибқи тавсияҳои истеҳсолкунандаи онҳо гузаронида мешавад.

15.5. Бо мақсади амалисозии самараноки Созишномаи мазкур, Ҳукумат мустақилона ва ё тавассути мақоми ваколатдори давлатӣ уҳдадор мешавад, ки:

15.6. Ҳукумат иловатан ба Сармоягузор тибқи қонунгузории татбиқшаванда кафолат медиҳад:

15.7. Ҳукумат иловатан тасдиқ мекунад ва кафолат медиҳад, ки Сармоягузор ҳуқуқ дорад, натиҷаҳои сармоягузории худ, аз ҷумла сармоягузории такрорӣ ва амалиёти тиҷоратиро дар ҳудуди Ҷумҳурии Тоҷикистон ва берун аз он соҳибӣ, истифода ва ихтиёрдорӣ намуда, даромади худро дар ҳар шакл, тибқи талаботи қонунгузории татбиқшаванда, аз ҷумла маҳсулот, мол ва/ё хизматрасонӣ, ки дар ҳудуди Ҷумҳурии Тоҷикистон харидорӣ гардидааст, ба хориҷи кишвар барорад.

15.8. Ҳукумат ҳуқуқи Сармоягузорро барои мубодилаи озод ба ҳама гуна асъор, аз ҷумла ба хориҷи кишвар интиқол додани фоидаи софи он пас аз пардохт намудани андозҳо ва пардохтҳои ҳатмии дигар (ба истиснои ҳолатҳои дар Созишномаи мазкур пешбинигардида) кафолат медиҳад, аз ҷумла:

15.9. Ҳукумат кафолат медиҳад, ки Сармоягузор метавонад озодона фоидаи худро бо дарназардошти имтиёзҳои муқаррарнамудаи Созишномаи мазкур пас аз пардохт намудани андозҳо ва пардохтҳои ҳатмии дигар ба асъори хориҷӣ мубодила намояд ва чунин фоидаро ҳар вақт дар ҷараёни амалисозии лоиҳа, новобаста аз тағйироти минбаъда дар қонунгузории татбиқшаванда, ба хориҷи Ҷумҳурии Тоҷикистон интиқол намояд.

МОДДАИ 16. СЕРВИТУТҲО (ҲУҚУҚИ ОММАВИИ УБУР)

16.1. Барои мақсадҳои амалисозии лоиҳа дар давраи амали Созишномаи мазкур, дар сурате агар ба Сармоягузор лозим шавад, ба Сармоягузор сервитути зер ва болои биноҳо, пулҳо ва молу мулки дигари дар моликияти давлат қарордошта, инчунин қад-қади онҳо, ки кӯчаҳо, роҳҳои мошингард ва пиёдагард, кӯчабоғҳо, роҳҳои дар моликияти давлатибударо дар бар мегиранд, бо мақсади сохтмон, насб, хизматрасонӣ ва истифодаи такягоҳҳо, симчӯбҳои интиқоли барқ, кабелҳои интиқоли барқи зеризаминӣ, қубурҳои зеризаминӣ, инчунин хатҳои дигари қубургузар ва хатҳои интиқоли барқ, чоҳҳои кабел, худи кабел, симу таҷҳизот ва дастгоҳҳои дигаре, ки барои мақсадҳои дар Созишномаи мазкур зикргардидаи лоиҳа зарур мусоидаткунанда ё муносиб мебошанд (ҳуқуқи оммавии убур) ва ба Сармоягузор ҳуқуқу ваколатҳо ҷиҳати амалигардонӣ ва истифодаи ҳуқуқи оммавии убур дар асоси чунин сервитут, ки бо тартиби муқаррарнамудаи қонунгузории татбиқшаванда ба расмият дароварда шудааст, пешниҳод карда мешавад. Ғайр аз ин, барои мақсадҳои лоиҳа ва дар давоми амали Созишномаи мазкур ба Сармоягузор иҷозат дода мешавад, ки дар мувофиқа бо мақомоти ваколатдори давлатӣ ва бо риояи қонунгузории татбиқшаванда ҳама гуна корҳои зарурии вобаста ба заминро дар роҳҳо, роҳҳои фаръӣ, кӯчаҳо, кӯчабоғҳо, роҳҳои мошингард, пиёдагард ва молу мулки дигар анҷом диҳад ва чунин корҳои заминӣ бояд дар муддати кӯтоҳ ва бо халалёбии камтарин барои аҳолӣ, бо дарназардошти мувофиқи мақсад будани он дар шароити мавҷуда анҷом дода шаванд.

МОДДАИ 17. ҲУҚУҚҲОИ МАХСУСИ ҲУКУМАТ

17.1. Илова ба ҳуқуқҳои дар муқаррароти дигари Созишномаи мазкур пешбинигардида Ҳукумат мустақилона ва ё тавассути мақоми ваколатдори давлатӣ амал намуда, ба инҳо ҳуқуқ дорад:

- назорати фаъолияти Сармоягузор тибқи тартиби муқарраргардидаи ќонунгузорї ва шарту талаботе, ки дар Созишномаи мазкур дарҷ карда шудааст;

- аз Сармоягузор талаб намудани иҷрои муқаррароту меъёрҳои қонунгузории татбиқшаванда бо дарназардошти меъёрҳои Созишномаи мазкур;

- аз Сармоягузор дархост намудани ҳисоботи даврӣ дар бораи амалишавии лоиҳа;

- ба Сармоягузор пешниҳод намудани тавсияҳо ва таклифҳо барои амалисозии самараноки лоиҳа.

17.2. Ҳукумат тавассути мақоми ваколатдори давлатӣ амал намуда, кафолат медиҳад, ки дар давоми амалисозии лоиҳа ба фаъолияти хоҷагидории Сармоягузор ва инчунин мақомоти дахлдори давлатии дигар берун аз талаботи қонунгузории татбиқшаванда дахолат намекунанд.

МОДДАИ 18. УҲДАДОРИҲОИ УМУМИИ САРМОЯГУЗОР

18.1. Сармоягузор уҳдадор мешавад, ки:

МОДДАИ 19. УҲДАДОРИҲОИ ТАРАФҲО

19.1. Тарафҳо бояд мубодилаи маълумоти ба лоиҳа дахлдорро бо дарназардошти муқаррарот дар бораи маълумот ба амал бароранд. Чунин маълумот метавонад аз маълумоти ба ҳама дастраси оморӣ, таҳлилҳо, натиҷаи тадқиқотҳои маркетингӣ, инчунин маълумот дар бораи қонун ё санадҳои меъёрии ҳуқуқии Ҷумҳурии Тоҷикистон, ки нисбати лоиҳа татбиқ карда мешаванд, иборат бошад.

19.2. Тарафҳо пурра дар доираи лоиҳа ҳамкорӣ мекунанд ва барои ин мақсад тамоми манбаъҳои доштаро истифода мекунанд ва барои асос Созишномаи мазкур ва қонунгузории татбиқшавандаро истифода мекунанд. Тарафҳо уҳдадор мешаванд, ки барои ноил шудан ба мақсадҳо ва манфиатҳои умумӣ ҳуқуқҳои худро софдилона риоя ва уҳдадориҳои худро сари вақт иҷро менамоянд.

19.3. Тарафҳо розӣ мешаванд, ки уҳдадориҳои дар боло зикргардида ва уҳдадориҳои дигаре, ки дар қисматҳои дигари Созишномаи мазкур зикр гардидаанд, тибқи қонунгузории татбиқшаванда ва муқаррароти Созишномаи мазкур уҳдадориҳои иловагии умумии Тарафҳо мебошанд.

МОДДАИ 20. МУНОСИБАТИ ҲУҚУҚИИ ТАРАФҲО

20.1. Ҳукумат розӣ мешавад, ки ба имзо расонидан ва иҷрои Созишномаи мазкур аз ҷониби он муносибатҳои хусусӣ, тиҷоратӣ ва баробарҳуқуқи байни Тарафҳои Созишномаро ташкил медиҳанд.

МОДДАИ 21. МАЪЛУМОТИ МАХФӢ

21.1. Дар доираи Созишномаи мазкур мафҳуми «маълумоти махфӣ» маънои маълумотеро дорад, ки дар шакли хаттӣ ҳамчун махфӣ ё ин ки аз рӯйи хусусияти худ ҳамчун сирри тиҷоратӣ (новобаста аз тарзи додан ё ҳифзи чунин маълумот) қайд карда шудааст, аз ҷумла бе маҳдудият:

- ҳамаи маълумот вобаста ба таҳия, сохтмон, таҷдид, истифодабарӣ ва хизматрасонии техникӣ, фаъолияти техникӣ ва намудҳои дигари фаъолиятро, ки ба Ҳукумат пешниҳод карда мешаванд, аз ҷумла АТИ, АТИ-и пешакӣ, новобаста аз тасдиқ шудани онҳо, навгониҳо ва тағйиру иловаҳое, ки дар лаҳзаи дахлдор эътибор доранд;

- маълумот оид ба робитаҳои тиҷоратӣ, молу мулк, дороиҳо, таҷрибаи тиҷоратӣ, хизматрасониҳо, ҳуқуқҳои моликияти зеҳнӣ, сирри тиҷоратӣ (ноу-хау), маълумот оид ба кормандон, муштариён, пудратчиён ва маълумоти дигари махфии тиҷоратӣ ва шахсии Сармоягузор.

21.2. Тарафҳо набояд маълумоти махфиро бе розигии пешакии хаттии ҳамдигар, ба истиснои ҳолатҳои дар қонугузории татбиқшаванда ва Созишномаи мазкур пешбинишуда, инчунин барои мақсадҳои ҳалли баҳсҳо, ба шахсони сеюм пешниҳод намоянд ё ифшо кунанд.

МОДДАИ 22. ҲОЛАТИ РАФЪНОПАЗИР (ФОРС-МАЖОР)

22.1 Тарафҳо аз масъулият барои иҷро накардан ё боздоштани иҷрои ҳама гуна уҳдадорӣ дар доираи Созишномаи мазкур танҳо дар сурате озод карда мешаванд, ки агар чунин иҷро накардан ё боздоштан ба ҳолати рафънопазир (форс-мажор) алоқаманд бошад. Давраи чунин иҷро накардан ё боздоштан ва даврае, ки барои рафъи зиёни дар ҳолати мазкур расонидашуда зарур аст, ба муҳлати барои иҷрои уҳдадорӣ зарур ва ба давраи муқаррар ва пешбининамудаи Созишномаи мазкур ҷиҳати иҷрои ҳама гуна уҳдадориҳо ё амалисозии ҳама гуна ҳуқуқҳое, ки ба чунин уҳдадориҳо вобаста мебошанд, илова карда мешавад.

22.2. Дар сурати фаро расидани ҳолати рафънопазир (форс-мажор), Ҳукумат ва Сармоягузор бояд:

22.3. Дар мавриди ба миён омадани ҳолати рафънопазир (форс-мажор) Тарафҳо баҳри пайдо кардани роҳҳои баромадан аз чунин ҳолат машваратҳо доир карда, тамоми воситаҳои заруриро барои кам кардани оқибатҳои ҳолатҳои бавуҷудомада истифода мебаранд.

22.4. Дар ҳолати пурра ё қисман қатъ шудани амалисозии лоиҳа, ки дар натиҷаи ҳолати рафънопазир (форс-мажор) ба вуҷуд омадаанд, давраи иҷрои амалисозии лоиҳа ба муҳлати амали ҳолати рафънопазир (форс-мажор) дароз карда шуда, аз лаҳзаи ба охир расидани чунин ҳолат аз нав барқарор хоҳанд шуд.

22.5. Ҳолати рафънопазир (форс-мажор) ҳамчун асос барои талаби ҷуброни зарар маҳсуб намеёбад.

МОДДАИ 23. УСТУВОРИИ СОЗИШНОМА

23.1. Ҳуқуқҳои махсус, озодкунӣ ва имтиёзҳои Сармоягузор, инчунин муқаррароти дигари шабеҳи Созишномаи мазкур, сарфи назар аз тағйироти минбаъда ба қонунгузории татбиқшаванда, дар давраи муҳлати амали Созишномаи мазкур мавриди амал қарор дода мешаванд ва татбиқ мегарданд.

23.2. Мақоми ваколатдори давлатӣ Созишномаи мазкурро ба Феҳристи давлатии созишномаҳои сармоягузорӣ ворид менамояд ва мақомоти давлатии ваколатдори дахлдорро дар бораи эътибор пайдо кардани Созишномаи мазкур хабардор месозад.

23.3. Дар робита ба иҷрои Созишномаи мазкур Сармоягузор АТИ, лоиҳа, қонунгузории татбиқшаванда, Созишномаи мазкур ва таҷрибаи байналмилалиро риоя менамояд. Ҳеҷ тағйирот дар қонунгузории татбиқшаванда пас аз имзои Созишномаи мазкур наметавонад ҳуқуқ ва уҳдадориҳои Сармоягузорро, ки дар Созишномаи мазкур зикр карда шудаанд, бадтар гардонад. Тамоми шартҳои Созишномаи мазкур эътибори худро дар давоми муҳлати амали он, новобаста аз тағйироти минбаъда дар қонунгузории татбиқшаванда, нигоҳ медоранд. Тағйири шартҳои Созишномаи мазкур танҳо бо розигии мутақобилаи Сармоягузор ва Ҳукумат амалӣ карда мешавад.

23.4. Ҳукумат бо шарти аз ҷониби Сармоягузор риояи муқаррароти Созишномаи мазкур тасдиқ менамояд, ки ҳама гуна санадҳои меъёрии ҳуқуқии тамоми мақомоти ваколатдори давлатии дахлдор, ки бо ин ё он усул ҳуқуқ ва манфиатҳои мувофиқи Созишномаи мазкур ба Сармоягузор фароҳам оварда ё ба таври дигари қонунӣ аз ҷониби Сармоягузор тибқи Созишномаи мазкур бадастовардаро вайрон мекунанд ё маҳдуд месозанд, нисбат ба Сармоягузор татбиқ намегарданд.

23.5. Ҳангоми пеш аз анҷоми муҳлати муқарраргардида, инчунин тағйир ёфтани ҳаҷми сармоягузорӣ ё нишондиҳандаҳои иқтисодии лоиҳа, эътибори Созишномаи мазкур дар тамоми муҳлати амали он нигоҳ дошта мешавад, аз ҷумла имтиёзҳои махсуси андозӣ ва гумрукӣ, ки Созишномаи мазкур муқаррар намудааст, эътибори худро гум намекунанд.

23.6. Ҳукумат кафолат медиҳад, ки баъд аз ба охир расидани муҳлат ва ё қатъ гардидани Созишномаи мазкур мутобиқи шартҳои дар он дарҷёфта нисбати Сармоягузор, паймонкорон, паймонкорони фаръӣ, таҳвилгару харидорон талаб карда намешавад, ки андозу боҷҳоеро, ки аз пардохтҳои гумрукӣ онҳо мутобиқи шартҳои Созишномаи мазкур ва қонунгузории татбиқшаванда дар давраи мавриди амал қарор гирифтани Созишномаи мазкур озод карда шуда буданд, аз ҷумла дар мавриди бегона кардани молу мулк пардохт намоянд.

МОДДАИ 24. ҚАТЪИ АМАЛ ВА ПЕШ АЗ МУҲЛАТ БЕКОР КАРДАНИ СОЗИШНОМА

24.1. Бе расонидани зарар ба муқаррароти дигар вобаста ба бекор кардани Созишномаи мазкур Созишномаи мазкур метавонад бо розигии Тарафҳо дар шакли хаттӣ бекор карда шавад.

24.2. Созишномаи мазкур танҳо дар ҳолатҳои зерин метавонад яктарафа бекор карда шавад:

24.2.1. Бо ташаббуси Ҳукумат:

(i) дар ҳолате ки, агар Сармоягузор ба таври дахлдор уҳдадориҳо ва шартҳои муҳимми Созишномаи мазкурро бо сабаби вобаста аз худи Сармоягузор иҷро накунад;

(ii) дар сурати ба амал омадани ҳолати пардохтнопазирӣ аз ҷониби Сармоягузор.

24.2.2. Бо ташаббуси Сармоягузор:

(i) агар Ҳукумат ё мақомоти дахлдори давлатии дигар ба амалисозии лоиҳа монеа ва мушкилоти ҷиддӣ эҷод намоянд;

(ii) агар тибқи ҳисоботи Сармоягузор пас аз як соли имзои Созишномаи мазкур аён гардад, ки мавриди амал қарор додани лоиҳа бо сабабҳои вобаста аз Ҳукумат ё мақомоти давлатии дахлдор имконнопазир мебошад.

24.3. Амали Созишномаи мазкур пас аз ба анҷом расидани муҳлати амали он қатъ мегардад. Амали Созишномаи мазкур метавонад бо мувофиқаи Тарафҳо, инчунин бо асосҳои дигари пешбининамудаи қонунгузории татбиқшаванда ва Созишномаи мазкур пеш аз муҳлат қатъ карда шавад.

24.4. Агар вайронкунии Созишномаи мазкур аз ҷониби Сармоягузор содир гардида бошад, ки дар банди 24.2.1. моддаи 24 Созишномаи мазкур муайян шудааст ва боиси қатъи амали ин Созишнома гардида бошад, Ҳукумат ҳуқуқ дорад ҳамаи ҳуқуқҳо, афзалиятҳо ва имтиёзҳоеро, ки Сармоягузор баъди эътибор пайдо кардани Созишномаи мазкур ба даст овардааст, бекор кунад. Дар сурате ки, агар вайронкунии Созишномаи мазкур аз ҷониби Ҳукумат содир гардида бошад, ки дар банди 24.2.2. моддаи 24 Созишномаи мазкур муайян шудааст ва боиси қатъи амали он гардида бошад, Сармоягузор ҳамаи ҳуқуқҳо, афзалиятҳо ва имтиёзҳоеро, ки Сармоягузор баъди эътибор пайдо кардани Созишномаи мазкур ба даст овардааст, нигоҳ медорад.

МОДДАИ 25. ҚОНУНГУЗОРИИ ТАТБИҚШАВАНДА ВА ҲАЛЛИ БАҲСҲО

25.1. Созишномаи мазкур тибқи қонунгузории татбиқшаванда тафсир ва танзим карда мешавад.

25.2. Тарафҳо бояд кӯшиш ба харҷ диҳанд, ки баҳсҳо бо роҳи машварат ва гуфтушунид ба танзим дароварда шаванд.

25.3. Агар баҳс бо роҳи машварат ва гуфтушунид дар муддати 60 (шаст) рӯз аз санаи ирсоли огоҳиномаи хаттӣ ҳаллу фасл нагардад, он барои баррасӣ ба мақомоти судии Ҷумҳурии Тоҷикистон пешниҳод мегардад.

25.4. Ҳангоми баррасии баҳс суд инҳоро ба асос мегирад:

- Созишномаи мазкур;

- қонунгузории татбиқшаванда;

- принсипҳои ҳуқуқи байналмилалӣ ва санадҳои ҳуқуқии байналмилалии эътирофнамудаи Тоҷикистон оид ба сармоягузорӣ.

МОДДАИ 26. ОГОҲИНОМА ВА МУРОСИЛОТ

26.1. Ҳама гуна огоҳинома ё иттилооти дигаре, ки дар доираи Созишномаи мазкур ба Ҳукумат ё Сармоягузор пешниҳод мегардад, бояд дар шакли хаттӣ сурат гирад.

26.2. Агар дар Созишномаи мазкур тартиби дигар пешбинӣ нашуда бошад, чунин огоҳинома ё иттилооти дигар ба таври дахлдор пешниҳодгардида ба ҳисоб меравад, агар он бевосита ё тавассути почта, почтаи электронӣ ё бо воситаи факс ба суроғаи ҳуқуқии Тарафи дахлдор фиристода шуда бошад.

МОДДАИ 27. ТАҚСИМПАЗИРӢ

27.1. Ҳамаи муқаррароти Созишномаи мазкур алоҳида буда, амали ҷудогона доранд ва агар яке аз онҳо ғайриқонунӣ, беэътибор ё бо санксияи ҳуқуқӣ таъминнабуда дониста шавад, ин ба эътибор доштан, қонунӣ будан ё бо санксияи ҳуқуқӣ таъмин будани ҳар муқаррароти дигари Созишномаи мазкур ё қисми он дахл надорад.

МОДДАИ 28. ГУЗАШТ КАРДАН

28.1. Созишномаи мазкур наметавонад ба тарафи сеюм гузашт карда шавад, агар Тарафҳо ба созиши дигар наомада бошанд.

МОДДАИ 29. ТАРТИБИ ВОРИД НАМУДАНИ ТАҒЙИРУ ИЛОВАҲО БА СОЗИШНОМА

29.1. Ҳамаи тағйиру иловаҳо ба Созишномаи мазкур танҳо дар сурати аз ҷониби Тарафҳо ба имзо расонида шудани ҳуҷҷати иловагии дахлдор тибқи қонунгузории татбиқшаванда эътибори ҳуқуқӣ пайдо мекунанд.

МОДДАИ 30. МУҚАРРАРОТИ ХОТИМАВӢ

30.1. Созишномаи мазкур дар шањри Душанбе «____» ________ соли 20___ дар ду нусхаи асл ба забони тоҷикӣ ба имзо расонида шуд.