Замима

ба қарори Ҳукумати

Ҷумҳурии Тоҷикистон

аз 29 сентябри соли 2020, № 528

Регламенти техникии бехатарии орди ғанигардонидашуда

1. МУҚАРРАРОТИ УМУМӢ

1. Регламенти техникии бехатарии орди ғанигардонидашуда (минбаъд - Регламенти техникӣ) бо мақсади муқаррар намудани талаботи техникӣ ба бехатарии орди ғанигардонидашуда, ки дар ҳудуди Ҷумҳурии Тоҷикистон ба муомилот бароварда мешавад, таъмини ҳифзи саломатӣ ва ҳаёти инсон ҳангоми истеъмоли орди ғанигардонида, инчунин пешгирӣ намудани амалҳои аз ҷониби истеҳсолкунандагон ва паҳнкунандагон барои гумроҳ намудани истеъмолкунандагон таҳия шудааст.

2. Иҷрои Регламенти техникии мазкур дар раванди истеҳсол, нигоҳдорӣ, интиқол, фурӯш, коркард ва нобудсозии орди гандумии ғанигардонидашудаи навъҳои якум ва олӣ ва истеҳсоли нон ва маҳсулотҳои нонӣ амалӣ карда мешавад.

3. Дар Регламенти техникии мазкур мафҳумҳои асосии зерин истифода мешаванд:

- таҳлили хавфҳо - ҷараёни ҷамъоварӣ ва баҳодиҳии иттилоот дар бораи хавфҳо ва шароите, ки боиси ба миён омадани онҳо мегардад, барои қабул кардани қарор дар мавриди он, ки кадоме аз ин хавфҳо метавонад ба бехатарии орди ғанигардонидашуда таъсир расонад ва инъикос намудани онҳо дар нақшаи низоми менеҷменти бехатарии маҳсулоти хӯрокворӣ;

- омехтаҳои зарарнок - омехтаҳои аз растанӣ пайдошуда, ки барои саломатии инсон ва ҳайвонот хатарнок мебошанд;

- намнокӣ - миқдори намӣ бо фоиз нисбати вазни умумии орди ғанигардонидашуда;

- зараррасонҳо - зараррасонҳои анборӣ, ҳайвоноте, ки ҳангоми нигоҳдорӣ ва интиқол ғалла ва маҳсулоти ғалларо нуқсондор ва нобуд мекунанд;

- сироятёбӣ бо зараррасонҳо - мавҷудияти ҳашароти зараррасон дар орди ғанигардонидашуда - ҳашарот ё канаҳо;